DAMDAWI A HLAUHAWM EM?

Damdawi hi damlo ei tura siam a ni a, natna leh nat dan azira doctor-in a tawk chauhva a chawh anga ei tur a ni. Ei tam luat emaw tlem emaw a pawi theih avangin doctor rawn lova ei hauh loh tur a ni. Hmanlai ata tawh mihringin a hun tawn ang zelin a mamawh tawk damdawi, a hliam enkawl damna tur a hmuchhuak ve zel a. Pharmaceutical Sciences leh Technology ṭhang zelah tunah chuan damdawi ṭha ber ber leh, khawl/hmanrua (medical device) changtlung ber her kan lo nei ta a, natna chi hrang a tam rualin a enkawlna tur a awm zel a, a lawmawm hle a ni.

Damdawi zawrhna dawr hi Aizawl veng tinah a tam hle a, thingtlang lamah pawh damdawi dawr awm lohna khua a awm tawh awm lo ve. Mizoten damdawi kan ei nasa hle a ni tih a chianna chu a zawrhna dawr pung zel hi a ni.

Damdawi siam chhuah tam leh hralh tam hi a siamtute tum ber a ni a, an thil tum a hlawhtlin theih nan company medical representative (MR) hovin doctor an hmu chamchi a. An damdawi siam an chawhsak theih nan thilpek chi hrang hrang nen doctor tihlungawi an tum nasa ṭhin a, doctor-te zingah MR-te thu zàwm leh zàwm duh lem lo an awm ang.

Damlo tana damdawi hlutzia chu sawi ngai lova chiang a ni. Doctor-in damlo a en a, a natna leh nat dan a hmuh chhuah ang zelin damdawi a chawh ṭhin a, damlo chu a lo dam ta ṭhin a ni. Mi ṭhenkhat doctor ráwn lova mahni thua damdawi ei mai ching kan awm ṭhin a, hei hi a pawi hle. Doctor lehkha nei lo, mahni duhthua damdawi lei tum hnena a zuartuten an lo hralh mai ṭhin hi a pawi hle bawk.

Damdawi lama mi thiam zawkten damdawia hman lohna tura hman emaw, mahni thua hman ve ngawt pawi theihzia an sawi ṭhin a, tûr (poison) ang maia hlauhawm a ni an ti ṭhin. Damdawi ei hlimah hmuh theih chhiatna thleng nghal rup rup lo mah se, a hnu lama taksa a khawih pawi zui theihna hi pawina lai tak chu a ni a; mak leh rapthlak tak taka vual chhuak, pán leh durh pep pup damlote zingah hmuh tur an awm fo a ni. Damdawi azawnga pawimawh ber mai – antibiotics hman dik loh hi a pawi hle. Pawlawh taka hman avangin 'antibiotic resistance' a thleng thei a, a awmzia chu damdawi khan a taksaah hna a thawk zui zel thei tawh lo tihna a ni. Mizote'n damdawi kan hman ṭhin dan ngaihtuahin antibiotic resistance lakah kan him dawn lo nasa niin a lang. Mizorama damlo tam takah antibiotic resistance a thlen tawh thu sawi a ni a, chu'ng mite tan chuan antibiotics hman tur a vang hle dawn tihna a nih chu!

Antibiotic resistance hi khawvel ram hrang hrangah eng eng emaw avangin a thleng vek a, damdawi thiamte lu tihai em emtu a ni. Control a nih lohva a zau zel chuan antibiotics hmuhchhuah hma hun (pre-antibiotic era) kum l928 (penicillin) angah khawvel hi a kir leh thei dawnin an hria a, an mangang hle a ni. Antibiotics thar hmuhchhuah hi a harsa ngang a ni ang, hmuhchhuah hnuhnun her aṭangin kum 35 chhung zet a thar hmuhchhuah a awm tawh lo. Damdawi hman fimkhur loh avanga harsatna awm thei pumpelh nan damdawi siam leh zawrh kawngah ram dang, Drugs Regulator-te chu an duhtuiin an duh fîr em em a, damdawi quality an duhtui hle hawk. Zalen taka damdawi zawrh leh hralh a nih loh nan dan khauh tak siamin khawng takin an lekkawh a, damdawi dawr aṭangin damdawi duh ang ang a lei ngawt theih ngai reng reng loh a ni.

India ram hi hemi kawngah hian a hnufual tih loh theih a ni lo va, damdawi khuahkhirhna dan ṭha tak 'Drugs & Cosmetics Act/Rules' chu awm mah se, a nihna anga lekkawh a ni lo nasa a ni. Mizoramah pawh hian kan damdawi zuartute thlir ila, a tam her chu damdawi ningkhawng hre lo, eizawnna atana damdawi zuar ve mai an ni tih kan hmu ang. Tun hnaiah erawh pharmacy zirchhuak (pharmacist) kan lo ngah ve ta hle a, a zirna college hial pawh kan lo nei ve ta a, a lawmawm khawp mai. Damdawi hian thih leh dam, hriselna leh bawrhsawmna a khawih tlat avangin a khuahkhirhna dan kan neih hi khauh taka kalpui a ngai a, licence pek thu-ah pawh duhsak zawng leh hmelhriat ṭha tih mai mai vanga inpe lovin, danin a phut ang taka kan kal a ngai a ni.

Damdawi hman fimkhur zual ngai bikte chu doctor chawh chauhva hralh theih niin, 'prescription drugs' tih an ni a, damdawi zuartuten doctor prescription nei hnenah chauh an hralh tur a ni. Danin a sawi ṭhat tehlul nen; a zuartu lam chuan doctor lehkha nei lo hnenah pawh an hralh reng tho va, hei hi a him loh avangin khap a ngai a ni. Khap hian damlo leh a zuartu dikna a rap bet lo va, damlo himna tura danin a phut a ni zawk.

Doctor ṭhenkhatte damdawi chawh dan pawh hi a him em tih ngaihtuah a ngai. Damlo natna nena inzawmna nei fahran lo damdawi dang chawh tel a awm fo. Chu'ng damdawite chu vitamins lam emaw, damdawi chawh dang nena active ingredient (API) inang thuakte a ni ṭhin bawk. Damdawi ṭhenkhat hetianga hralh ral hi a siamtu (company) thil tum, doctor-te kaltlanga an tih fo ṭhin a ni a, India ram pum hri vei ṭha lo tak a ni. Hei hian damlo tan senso a titam a, hriselna a khawih tel phei chuan a pawi lehzual ang.

A tawp berah chuan hei hi a pawimawh – Pharmacist-te khawiah nge an awm? Licence diltuin a rawih avanga licence pek a ni a, pharmacist ngei chuan damdawi dawr enkawlin damdawi leitu hmachhawn se, damdawi hlauhawmna lakah damlo an him zual ang. Tin, chu chu an inrawihnain a tum her pawh a ni awm a ni. Pharmacist rawih avanga licence lian, damdawi huam chikim zawk pek an ni a, damdawi thiam lovin dawr an enkawl leh si chuan mipui hriselna a derthawng zual thei a ni.

- Vanlaltluanga