ZPM SORKAR - 'VIBRANT' SORKAR

Kan thupui 'vibrant' hi 'thatho, viak ṭha, chak tak' ti ila a sual lem lo ang chu maw?

Chief Minister Pu Lalduhoma kaihhruai zet chu ka lo beisei aia nasa daihin an che chakin an che ṭha ngei mai. Ka lo beisei sang khat chungin ka rin phak lohin an che ṭhain an che rang vat vat ka ti hle mai. A minister-te chan tur ṭheuh pawh a thlang fuh hlein ka hria. Amah Pu Lalduhoma ngei pawh hi ṭha hle tura ka rinsa a nih tho avangin ka lo beiseina green line chung daihah a chuang hial mai. A hote nen kan ram hi kum thum kum liah chuan hmel danglam puin a changkang dawrhin ka ring. A han Chief Minister aṭang khan amah hmu duh mi chi hrang hrang Mizoram chhunga pawl hrang hrang leh pawn lam mi, BRTF hotu Major General leh Brigadier te leh Assam Rifle hotu India rama lal ber Lt. General leh a hnuaia mi, Brigadier General leh Officer dangten an mamawh thlenin Chief Minister hi an lo hmu nghal vat a. Bank hotute pawhin an mamawh thlenin CM hi an hmu thuai bawk a. Amah Pu Duha hi mi thar a nih bakah IPS Officer lo ni tawhte a nih vang pawh a ni thei e. Central Sawrkar hotute hian an lo dawnsawn ṭhat hle bakah a thil zu sawite tihhlawhtlinsak an lo tum maite hi a lawmawmin a ropui takzet a ni. Chèt chhuahna tur a ngahin mawng vawm ba ang maiin Delhi leh Assam a kartawn chhen mai te hi, rah chhuah ṭha tak a nei zel a ni tih TV aṭangin kan hre ṭheuh awm e.

A minister leh MLA te pawh an mahni hna ṭheuhah an che chawl lo a ni ber e. TV-a chanchin thar puan aṭang maia Minister te leh Chief Minister chet chhuahnate hi lo hre ve mai ka nih avangin ka hre kim lo em em a. Kan lo hriat phak chinah ngawt pawh he ZPM Sawrkar thar hi a thlamuanpuiawm nghal pang mai. Minister ṭhenkhat chet tawhna kan han hriat chinah Home Minister Pu K. Sapdanga chet tawh dan; Burma ram atanga kuhva ro lo lut nasa em em titawp ṭhak tura thupek khawng tak a chhuah te, Police Department pawhin thupek an bawhzui ṭhain a lang a, a lawmawm hle a ni. Chubakah Home Minister a nih hnu lawkah Cachar nena kan ramria Police post zawng zawng a zuk tlawh chhuak vek leh, an harsatnate zuk hriatpuia duty-ho mamawh an lo sawite a zuk bengkhawnte leh, a zuk thlamuante kha a fakawm thlawt a ni. DP&AR Minister a nih angin Sawrkar hnathawk aikalte tihtawp dan tur a ngaihtuah chhuakte kha thil lawmawm tak a ni. Aikal laten aikal an lak chhan an dinhmun ṭheuh insawifiahna hun a pete hi thil lawmawm tak a ni.

Pi Lalrinpuii Department pathum a chan zinga pakhat, Health Department hi ka lo huphurhpui viau mai a. Health Minister hmasa Pu Thangtea, Dr R. Lalthangliana khan hmachhawn khirh tak tak Covid-19 hneh taka a enkawl ang kha a ni. Pi Rinpuii hian he hna rit tak hi a tlin loh mai ka lo hlau khawp mai a, mahse hei, ka lo ralrin ang ngawt chu a lo ni hauh lo mai. Mipa tam takina kan tluk loh mi vibrant tak mai a lo ni reuh a, ka lo ring sual hle mai. ZMC Central kuta pek mai ṭha zawka hriatna kan neih tawh hial hnuin India Sawrkar Health Minister a zuk hmuh khan, theihtawpa puih a lo tiam a. ZMC chu Mizote ta ngei a nih theih nan Special Package pek mai a lo tiam ta hial a ni.

Lunglei Civil Hospital tihchangtlunna tur a buaipui nghal te, Kulikawn Hospital te tak té Hospital thar lian zawk khum 100 awm theihna tur, CM Pu Lalduhoma nen an ruat fel ngatte hi thil ropui tak a tling. Hei lo pawh hi lung zai ngaite phai panpui kher ngai lova ZMC-a zai tura a chah chhuakte hi, thil namai lo tak a ni. Heng bakah hian thil tam tak sawi sen loh tun thla hnih pawh la liam loah hian hnuhma a nei hman hi namai lo tak a ni. A department chan dangte Social Welfare Department leh Tourism Department ah te a thawk hman nual bawk. Heti khawp hian Mizo hmeichhia hian hneh takin hna a lo thawk thei a ni tih a chiang hle a ni.

PWD changtu Pu Vanlalhlana hi tunhma deuh tawh khan Assembly Dy.Speaker lo ni tawh ṭhin a ni a. Pu Hlana hi mi rinawm, hlemhletna laka fihlim ber tur zinga mi a ni tih, MPC Party-a kan thawhho lai aṭanga ka mi hriat chian ber zinga mi a ni bawk a, eiruk tam berna nia ngaih department lian ber a chang hi lawmawm ka ti khawp mai. Tun hun reilote chhung hian Lunglei leh Haulawng inkar kawng chhe reng mai, remchang a neih hmasak berah a va tlawh kha a lawmawm takzet a ni. Tin, kan ei lakna kawngpui ber Sairang aṭanga Vairengte thlenga kawng siam ṭhat ran ngai a mit ngeia hmu tura a zuk kalte kha a viak a ṭha teh e. Heng bakah Bairabi leh Hortoki khaw chengkerh deuh thleng pawha a tlawh chhuakte kha fakawm tak a ni.

Education Minister Vanlalthlana hian department pali lai a chang bawk a, tihtakzeta a theihna zawng zawng hmanga hna thawk mi a nih avangin, tun thla hnih chhung lek pawh hian amah hmutute chuan a chér sawt hman an ti hial mai. Mi thil chik mi, chhut neuh neuh chi, mahni hnaa inpe zo vek mi a nih avangin tun maiah a hnathawh hi lang nghal duak duak lo mah se, Mizoram hian a hnathawh rah ṭha tak hi kan la seng ngei ang.

Excise Minister Pu Lalnghinglova Hmar, Tetea hian Sports and Youth Services Department a chang hi kan vaia kan hriatsa angin, SYS Promotion nasa taka hma la thei tur a ni tih hriatsa a ni a, a thlamuanthlak tak meuh a ni. Tetea hian eng department pawh chang se, a ngaihtuahna thluak hi a chakin thil a man hma a, Minister ngaihtuahawm loh tur tak a ni.

Power & Electricity, P&E Minister Pu F. Rodingliana hian Department lian tak Industry, Trade and Commerce a chan bakah Printing & Stationary Department a chang tel a. Pu Rova hian a department chante hi a hre hneh hman hle tih TV aṭang chauh pawhin kan lo hria a, a thlamuanthlak dawn hle a ni.

Minister dang an hming kan lam chhuah loh te pawh hi hun rei lo te chhung, thla hnih chhung lek pawh hian an department enkawlte hi an ngaihsakin an inpe zo tak meuh meuh a ni tih a lang chiang hle. Tuna ka rawn sawi chhuahte hi a kimchang lo em em vek tih ka hria a. Ka phak tawk ang lek tlem te ka rawn sawi hmawrhmuh lek a ni. A pumpui thu h kan Chief Minister Pu Lalduhoma hi CM namai lo tak, Central lam hotute pawhin an mi bengkhawn tak leh rin kai tak a ni tih, tun hnaia a Delhi kal a rawn hlawhtlinzia kan hmuh aṭang khan kan hre ṭheuh mai.

Pathian malsawmnain Pu Lalduhoma Sawrkar hian tluang takin Mizoram mipuite hi min enkawl zui thei zel se ka va ti em.

- S. Lianhrima Hauhnar