THINLUNG THLéRIN
Kan Bible thianghlimah chuan Pathianin a mi Israelte sualna ngaihdama an lo awm a, malsawmna tam tak vura an lo awm leh theih nan Sima hawikir leh turin Zawlneite hmangin an hnenah thu a sawi ṭhin tih kan hria. Thupui atana kan hman pawh hi Zawlnei Joela hmanga Pathian thu a ni a, heti hian kan hmu, "Lalpa chuan, "...tunah in thinlung zawng zawngin, chawngheiin, ṭapin, lungngaiin ka lam lo hawi rawh u. In puan ni lovin in thinlung thlér ula, LALPA in Pathian lam chu hawi rawh u...." a ti a ni ( Joela 2: 12f).
Zofa te hi Pathianin a Missionary te hmangin min zawng chhuak a, a hnam puma Kristian tih turin kan lo awm ta a, keini ang hi hnam dang sawi tur an tam lo mai thei. Kan mi hmasa tu tute emaw phei chuan kan ram zimte pawh hi, "Lalpa zawn chhuah ram," ti hialin an lo sawi a ni. Pathian ringtute kan nih tlat avangin kan nun phung leh khawsak engkim, kan ram leh hnam ang pawhin kan Pathian thu aṭangin kan inchhut a lo ngai ta a ni.
Tunlai hian mi ṭhahnemngaiten Politics lama kan hruaitute chauh ni lovin Kohhran lam thlenga pawhin min lepse ta hlawm chu a ni a, hengte hi kan hmuin kan hria a, tangka sum duh luat avanga dik lo taka eirukna, natna ṭha lo - HIV Aids leh Cancer ah te India rama a ber kai kan nihdante hi ngaihtuah ila, Lalpa ringtute hi kan in enchian takzet a ṭul ta a ni.
Kuminah hian kan Sawrkar chuan 20th Feb, State Day chu rampum huapa Sual thupha chawia ṭawngṭai ni (State Day of Prayer) atana hmang turin ruahmanna a lo siam ta hi a lawmawm hle mai. Hemi ni hi rilru zawng zawnga Pathian hnena ṭawngṭai nan i hmang ang u. Tichuan Lalpan min ngaithla ang a, kan ram tidamin mal min sawm ang.
Pathianin Lalte a en:
Kan Bible kan chhiar chuan Pathianin roreltu, lalte a en tlat tih kan hmu, an lalte thiltihsual avangin ram leh mipuiten an thar ṭhin, tih kan hmu. Natna leh thil ṭha lo hrang hranga India rama ber kan kainate hi a tam tain a zahthlak ta mah mah a ni. Ṭha vea kan inhriatnate pawh a tam ang, mahse chungte chu ringlo mite hian an hre lémin a lang lo, a hnam angin a zahthlak a, Kristian kan nihna aṭangin kan rin Pathian hming kan tichhe bawk. Aw le, kumina kan Sawrkarin hetia Sual thupha chawia ṭawngṭaina ni a lo siam hi a lawmawm a, Lalpa hriat tlak ṭawngṭaina nei turin mipuite pawhin i hmang ang u. Inthlan kan zo tawh a, politics lam dah ṭhain ram leh hnam angin LALPA Pathian i au ang u.
Pathianin Puithiamte a en:
Kan Bible vék kan en chuan, Pathianin lalte chauh ni lovin, Puithiam (Sakhaw hotute) a en tih kan hmu bawk. Kan rama sualna leh harsatna kan tawh zozaiah hian kan Sakhaw rawngbawltute hian mawhphurin an inhre ve em le? Nge, saw pa saw a lawm tiin tute emaw kan kawk zawk. Mipuite sual thupha chawia an ṭawngṭai lai leh, kohhran pawhin rorelna aṭanga programme hmanga kan ṭawngṭai fo lai hian, kan Sakhaw hruaitu ber berte hi Pathian hriattur khawpin kan inphah hniam ve ṭhin em aw? Nge, ṭha kan la inti em em zawk?
Thuthlung hlui Zawlnei Amosa lehkhabu kan en chuan thu mak ang reng tak kan hmu tlat mai, hei hi a ni, "Nangni chauh hi khawvela chhungkua zawng zawnga ka hriat in ni a; chuvangin, in khaw lohna zawng zawngahte chuan ka hrem ang che u," (Amosa 3: 2) he thu hi Juda hote hnena a sawi a ni. He thu aṭanga kan hmuh chu Pathian hi hmangaihtu a nih rualin, dikna Pathian, sualna pawm zam ngai lo a ni. Nangni zawng ka hria che u, chuvangin in lo sual deuh a nih pawhin ka ngaidam ang che u, ti lovin, "Ka hrem ang che u," a ti zawk.
Kum 2020 khan Kohhran pakhat rorelna sang ber chuan State Day of Prayer neih a lo rawt tawh a, nimahsela kan Sawrkarin a ngaihsak lo va, hun a lo kal zel a, kan Sawrkarin mi zawng zawng huapa Sual thupha chawi leh ṭawngṭaina "State Day of Prayer," ni a lo buatsaih hi a lawmawm hle a, politics party leh kohhran pawl dahboin, a hnam leh ram anga ngaihtuahin he ni hi i hmang ṭheuh ang u.
IN PUAN NI LOVIN IN THINLUNG THLéR ULA, LALPA IN PATHIAN LAM CHU HAWI RAWH U.
- Rev Lalbiaksanga Chinzah