Damna Rûn – Birla Hospital, Kolkatta
Heart attack avangin hun eng emaw chen Trinity Hospital, Silaimual-a ICU leh ward-a ka awm hnuah Pathian khawngaihna changin, dam lam kan pan deuh avangin Trinity Hospital chu kan chhuahsan a, inenkawlna ṭha zawk beiseiin Birla Hospital, Kolkatta kan pan leh ta a.
Birla Hospital kan thlen hian ngaihsakna kan dawng ṭhain he hmuna thawkte hian an theihtawpin min lo enkawl a, kan lawm takzet zet a ni. Lung lam doctor – Dr. TK Praharaj phei chuan Mizote hi min lo duhsakin enkawlna ṭha tak min lo pe a, a chungah lawmthu kan sawi a ni. He hospital-ah hian ka hriat theih chinah Mizo nurse pathum thawk mek an lo awm bawk a, kan tana an inpekna a ropui takzet a ni. Mizote tan he hospital hi pan a nuamin an lo inhawng em em a ni.
Uluk tak leh enkawlna ṭha tak kan dawngin, min enkawlnaah an ti mai mai lo tih a hriat hle a, an mi ngaihsakna kha a ropui em em a ni. Hun eng emaw chen enkawlna ka dawn hnuah Pathian khawngaihna changin tunah chuan dam lam ka lo pan chho thei ta a, Lalpa'n a mite ṭawngṭaina a chhang ṭhin a, chu chu ka hnenah pawh a thleng dik hle a ni.
He hospital hi Mizote tan pan nahawm tak niin, lung lama harstna nei Mizo eng emaw zat pawhin damna an lo chang tawh ṭhin a ni. Keimah ang bawka lung lama harsatna nei chuan he hospital hi lo panin, inenkawlna atana lo hmang ve turin ka duhsakpui hle che u a ni.
Birla Hospital-a kan awm chhung khan Mizo nurse fel tak tak pathumte'n min buaipui ṭhin a, heta lang chiang ta chu - Mizote hi hmun hrang hranga kan lo awm darh leh hna thawka kan lo awm hi, keini ang mi mawltê tan a thlamuanthlak takzet, tih hi a ni.
Mizote hi kan la tlem rualin hna hrang hrang thawka Mizoram pawn mai bakah, India ram pawn thlenga awmte kan lo awm ve ta. Birla Hospital-a hnam dang kara kan awm lai khan mahni ram ni lo na na na chu rilru khawhar changte kha a awm ve ṭhin, mahse kan Mizo pui ngeite'n min lo buaipui dan leh inpekna ropui tak khan thlamuanna min pe a; hmun hrang hranga hna leh zirna vanga Zohnahthlak awm mekte hi keini Mizoram aṭanga rawn kalte tan hian in hluin, ṭanpui ngaite ṭanpuitu ni zel turin ka ngen che u a, in tan tihtheih nei tam lo mah ila, kan tih theih tawk ṭawngṭaipuinain ka'n thlah ang che u.
- Rev. Biaksangzuala, Mualpui, Salem
Ph. – 8974309849