KṬP Inkhawmpui Lian
Hmân kum khan KṬP General Confence-ah kan kal ve a, Pathianni a thlen hma kha chuan kan ṭhianpa pakhat chuan pandal-a inkhawm dawnah jeans kekawr a ha mai ṭhin a, chappal pum deuh hlûn hi a bun mai bawk a. Inchei duhdah an ti deuh nge, hmeichhe ho khan an hau nak nak a. Ani lah chuan, kan vengah pawh Inrinniah Sunday dress ka ha ngai lo, a ti mai a, engah vak a ngai lo!
Kan ṭhianpa pakhat ve leh thung chu KṬP General Conference-ah Zirtawpni zana rawn kalin, Inrinni zing khawvar rual velin an rawn thleng a, Inrinni chawhma aṭangin a inkhawm ve ṭan hman a nih chu. Inrinni chawhmaa kan inkhawm tur chu, keini'n 'sunday dress' ni pha chiah lo, zahpuiawm loh tâwk tura kan ngaiha kan inchei mai laiin, kan ṭhianpa erawh chu suit a rawn ha chhuak zuih mai a. A duh dan a ni a, kan sawi zui lem lo. Mahse, khua a lum deuh tawh bawk nen, hmuh erawh a hahthlak deuh!
KṬP General Conference a hnai leh ta hle mai, Mizoram kil tin aṭang mai bakah, state pawn aṭangin palai sing tél an kal leh ngeiin a rinawm. Mi tam tak chu an 'best dress' neih ang ang nen an kal ngei dawn a, eng emaw zat chu a ṭan zan aṭangin suit leh high heels nen an tek chhuak leh nghal pawh a ni mai thei.
Mi inchei dan tur lo sawi chiam hi a ṭul lo thei a, chutihrualin, a nachang hriat loh vanga inchei chiam a awm ve thei bawk. Inkhawmpui ṭan aṭanga sunday dress nena inchei ṭan nghal a, ni tin, sunday thlenga 'sunday dress' nena inchei chûk loh a ṭha hle. Khawpui nula tlangvalte hi chuan an chíng vak tawh lo a, thingtlang lam aṭanga palaite hian an ti leh chiam ṭhin. Inkhawmna hmun biak in pangngai a ni chiah lo bawk nen, Pathianni a nih loh hi chuan zângkhai taka inchei chíng ila a ṭha hle; mahni tan a nuam a, mi tan hmuh a nuam fo bawk. Ṭawp taka inchei tur tihna erawh a ni lo, a mawi tâwk a awm ve a ni.
Hei hi han zep leh lawk ila. KṬP General Conference avanga lo hah ngawih ngawih te, lo tâwt up up te, lo na ngawih ngawih an awm tawh ṭhin niin a lang a; mi ṭhenkhat chuan social media-ahte an lo ziak kúr duah tawh. Chutiang mite chu lo hahdam hram hram tawh se a duhawm hle. KṬP inkhawmpui lian kaihhnawih thlalak hmuh avanga lu na búrte an awm leh dawn a nih chuan, nachhâwkna damdawi lo inring lâwk ta se, a zia phian mai thei.
KṬP General Conference hi vawi tam a awm tawh a, ṭhalaite'n hlim takin hun an hmang ṭhin. Ṭhalaite'n hlim taka hun an hmang hi lo thinrim phah nan te, lo ân bawrh bawrh phah nante hmang lo turin i inthunun hram hram ang u!
- Kezo