KA THIL VEI ṬHENKHATTE

1. Footpath :-

Sorkar-in Mipui kea kal ṭhinte an lo him theih nan leh accident pumpelh nan tiin, Aizawl Khawpui chhungah Footpath eng emaw zat a siam a, a bikin kan Aizawl khawpuiah hmuh tur a tam khawp mai. Heng kan footpath mipui kea kalna tur atana siam ni na na na, thil zawrh nan kan hmang ta tlat mai hi! A dawrtute lah a chepa chepin mipui kalna tur ngaihtuah miah lovin, mawng pauh tawrha kan thil lei tur kan han en ta tlat ṭhinte, a bikin Second hand kan han thing ta mai ṭhinte hi kea kal ṭhinte tan chuan a va ninawm ṭhin tak em!

Hei mai bakah hian kan dawr kawt a nia, tih vang emaw ni, kea kalte tan pawha hnawksak tak maia Two-wheeler kan park duh tlat ṭhinte hi a va'n veiawm ṭhin tak em. Mipui kalna tur tichep zawnga footpath-a thil zawrh leh two wheeler park ṭhin hi Aizawl khawpui enkawltu leh thuneitu, AMC lam hian vil thei deuh se a va ṭha em?

2. Parking :-

Motor kan lei a, (eng motor pawh 2 wheel a ni emaw 4 wheel pawh ni se) Registration kan tih dawna Garage ka nei ngei e, tia hming kan signed ve thlap si, Motor dahna nei leh si lo, Vantlang kawng dunga dah lui tlat si. Turning Point, No Parking tih intar kulh pawh pawisa miah loa motor dah lui tlat ṭhinte. Mimal kawng a ni emaw, Vantlang kawng a ni emaw, Step hnawh tlata mipui kea kalte kalna tur awm mang lo khawp a, motor kan park duh ta tlat mai ṭhin ang chite hi! (Motor park duh dah chungchang hi Social Media-ah a thlalak nen ka tarlang a, a ziaawm phian mai! Mipui lam pawh hi au chhuak ngam teh ang u).

Aizawl khawpui chhunga Local Council ṭhenkhatte Parking chungchanga hma la ṭha duh lo leh la ṭha ngam lo an awm tak tlat avangin, kan AMC Councillors te hian mahni bial ṭheuhte tun ai hian vil ngun deuh se. Tin, Traffic Police lam hian Flying Squad insiamin Aizawl khawpui kilkhawr lam deuh thleng pawhin zan lam thlengin a khát tawkin endik thei se, tun ai hian kan kawng hi lirtheia tlan a nawm zawk bakah State Revenue ṭha tak a nih hmel e.

3. Kawng kal chungchang :-

Footpath a ni emaw, kawngpui pangngai a ni emaw, kawng chep takah pawh a ruala kala ti ti kan tum tlat ṭhinte, anmahni tawk zawnga lo kalte kawng lo ken tum chuang miah lo te, an hnung lama kalte tan pawh lehpelh tum pawha kawng lo ken mai nachang hre lo, pelh hleih theih si loh te. Kum upa zawkte an han tawh pawh a, kawng han ken zeuh nachang hre miah lo te, Foothpath a ni emaw, kawngpui dung a ni emaw, kalkawng en miah loa Mobile Phone hmanga message thawn tum tlat mai (a bikin ṭhalaiin an ching, insut maite pawh a awl ṭhin) ang chi te.

4. Waiting Shed :-

Mipui kea kal ṭhinte han hahchawlh zawkna atana Sorkarin khua leh khua inkarahte Waiting Shed ṭha tak tak a siam a, Aizawl Khawpui chhung bikah New Capital Complex-ah pawh hian a awm nual a. Heng Waiting Shed kea kalte hahchawlhna tur atana siam ni si, zu leh ruihhlo tih nana hman lo tum tlat pawl awmte hmuh hi a van hrehawm ṭhin tak em.

5. Motor khalh chung chang :-

Aizawl Khawpui hi kan kawng neih hi zauh lehna tur vak a awm lo a, tlangram kawngah rau rau chuan zim chhe lutuk chu a ni chuang lo, amaherawhchu, a remchang lai apianga motor kan park (Two wheeler thlengin) ṭhin hian, keimahni leh keimahni hi kan intichep lehzual niin a lang a. Chutih laiin kawng chep tak karah pawh mahni hmaa motor tlante tlan pelh hram kan tum tlangpui ta mai hi, a bikin two wheeler khalhtute, two wheeler rau rauah pawh Two wheeler Taxi-ho hi engtik lai pawh hian an hmanhmawh fal bik em aw a tih theih. Hmanhmawh chhan ṭha takte pawh an nei a ni thei e. Tin, chhuk a ni dek dek a, swichtoff-a motor khalh kan ching leh, kan hnung lama motor lo tlan hanin tlan pelhtir mai kan tum tlat lo ang chite hi hmuh a hrehawm ṭhin e.

Mipui lam pawh hi ngawi reng lovin kan chanvo neih ve tichhe zawng leh tichep zawnga hmalakna ang chi hrang hrang hi chu, do ngamin auchhuahpui ṭhin ila a va ṭha dawn em, tihte ka ngaihtuah e.

- R.L.Rindika (Diktea), Ph no. 9436146933, N- 83, Bungkawn, Aizawl.