Party worker ho hi an hneawm!
Facebook group ṭhenkhat leh WhatsApp group ṭhenkhata political party worker ho ṭawng tam lutuk hi a ninawm a, a hneawm ngawt mai. Mipui tam tak pawhin in hne ve tho ka ring.
Party worker-te hian thu dik lo te, thu dik teuh ve deuh, dik tluantling si lo te, thu phuahchawpte an duh duhin a post mai ṭhin si a. Tam tak hi chu mi fingvâr lo ve tak tak, zirna lamah pawh turu lo fe fe, social media hmang ve si, duh duh sawia post ve thiam site an ni hlawmin a lang a. A ṭawng peih peih, a post peih peih an ni ṭhin si a, a Mizo hnam ang pawhin a zahthlak ṭhin deuh roh a, a manganthlak ngawt mai.
Social media-a an thu ziah leh post tam tak hi an copy-paste kual a, group hrang hrangah an darh a. Politics leh ram inrelbawl dan ngaihtuah thui vak lem lo mipuiin an lo chhiar a, an rilru tibuai tawk vel a ni ngei bawk a. Mi fingvar lo zawkte thu dik lo leh phuahchawp thehdarh hian, lehkhathiam tak takte rilru pawh a chawk buai fo ve ṭhin niin a lang.
Thil reng reng politics thila an la lut zel leh politics-a inbeihna, mi beihna atana an hmang zel maite hi a hneawm em em mai bawk. Tun hnaiah Mizoram State Day-ah tute emaw huaihawtin Aizawl leh khawpui hrang hrangah ṭawngṭai rualna hun hman a ni a. Thil ṭha tak nia a lan laiin, political party worker-te chuan politics-a inbeih nan an han hmang zui a. A zialo lulai ngawt mai. Tin, khatiang thil, miin tihtakzeta Pathian pawlna hun an hmanna politics-a inbeihna atana an hmang duh hi a mâwlthlak a, a sualthlak bawk.
Eng pawh ni se, social media hrang hranga politics kaihhnawih thil thehdarh tam tak hi mi beihna tura an phuahchawp te, thu dik tawk lote a ni fo a ni tih hi mipuiin hria ila a ṭha khawp mai. Thil âwm ang lo tak tak an phuahchawpte hi kan rilru leh ngaihtuahna tibuaitu atan i hmang lo ang u.
A tawp nan, tun hnaiah Facebook group ṭhenkhata thu phuahchawpa kan ram hruaitu pakhat chanchin ziak chiamtu, mi thattu ang hiala chhuahtu an man hi a lawmawm ka lo ti ve khawp a. Khatiang mi kha mi dang pawh an la awm nual ang. Sorkar hian dîm lo se. Party worker dangte pawhin fimkhur phah nan hmang se a va ṭha dawn em.
- Zothana Khiangte