...AN LUNGNGAI VE NGEI ANG!

Kum 10 zet chu a ni ta, khua a lo ṭhal ṭan a, Lo leh huan ram hal a lo hun a, chu vang chuan chenna in leh ram kang a awm ṭhin avangin February thla chawlhkar hnihna aṭang hi chuan, kangmei avanga chhiatna hrang hrang thleng thei laka kan him theih nan, Inrinni zan leh zing ṭawngṭai inkhawmah te ṭawngṭai thupuiah te ka lo sawi ve ṭhin a, kuminah pawh hian ṭum thum chu ka sawi ve leh ta.

Aw le, mi tam ber Lo/Huan neia eizawng kan la nih avangin kan kum tin dan angin, lo leh huan ram hal a lo hun leh ṭan ta reng mai. Kan lo leh huan ramte kan han hál leh ang a, loh theih lohvin kan mamawh bak ramkang a awm leh ngei dawn tih chu a chiangsa leh reng mai. Kuminah hian kan ram thing leh mau kangchhia a tam leh dawn a, chu aia rilru tihrehawm làwktu chu nungcha, mahni insaseng thei lo te eng zat tak kàng hlum leh maw? tih hi a ni. Mei chakzia kan sawi thiam lo, chho zawnga thliin a han beng phei chuan, a vungin a vung mai ṭhin a nia. He kan ram chhunga thlamuang taka cheng nungcha te, ni khat thilthua an kan hlum leh chiamna ni leh hun chu a lo thleng leh ṭep ta.

Kum 2005 March thla bul khan nikhat chu Champhai aṭangin Lunglei thleng ka zin a, kawng tluanin, a hma ni leh khami ni lo hal avang khan kawng tluanin ram kang karah kan tlan a ni deuh ringawt mai, chutah mahni insaseng thei lo/hman lo nungcha khau, laiking etc... kanghlumte awm dan tur ka ngaihtuah a, khami ni ka zinkawng kha chu a khat tawkin mittui a tla kawngtluan a ni. Lunglawnah Baptist kohhran Upa inah ka thleng a, an felin min lo lawm thiam hle a, chuti chungin nilenga ka thil hmuh leh ngaihtuahna khan min tihahdam ṭha thei lo khawp mai.

Kum a lo thar a, hei kan kum tin danin lo leh huan ram hàl a lo hun leh ta chu a ni a, a lovin kan awm thei lova, tu tihsual lam vang a ni lo ve. Chutih lai mek chuan, kan lo leh huan ram hàl tur chhehvela nungcha awm zawng zawngte hian, kan lo hal hun turte hi lo hre lawk ve ni ta se la chuan, an mu tuiin a rinawm loh, AN LUNGNGAI VE NGEI ANG. Lalpa, kan Pathian engkim hria leh engkim ti thei chuan hriattir se la, hmun himah lo dah kiang vek hlawm se la, a ṭha hle tur.

Kan Thurin bu ber Bible-ah chuan, thilsiamte rilru put hmang heti hian kan hmu, "Thilsiam zawng zawngte chuan beisei em emin Pathian fate lo lanna chu an nghakhlel hle si," tiin. Tirhkoh Paula chuan ti hian a lo sawi leh a, "Thil siam zawng zawngte chu, tun thlengin rûm leh nau vei na tuarin an awm hlawm tih kan hre si a," (Rom 8: 22) tiin, a lo sawi leh bawk a ni.

"...HRIA SE LA CHUAN, AN LUNGNGAI VE NGEI ANG..."

- Biaka, Ramhlun South