AMC HMALAKNA ATANA ṬUL LEH PAWIMAWH

Aizawl khawpui hmasawnna atana a enkawl tura din Aizawl Municipal Corporation (AMC) hmalakna kawng hrang hrang hmuh tur a awm hi a lawmawm a. Kan khawpui pawhin kawng hrang hrangah a ṭhatpui hle. A lawmawm e. A ṭum hnihna atan AMC chuan Aizawl Day a hmang leh ta a. Sum tam tak sen ral a ni leh ngei ang a. An sum sen tura ruahman hian hmasawnna rotling eng nge min pek dawn tih hi rilruah zawhna a awm nghal a ni.

AMC hmalakna atana ṭul leh pawimawh hrang hrang awm theiah a hnuaia mi ang hian rawtna ka han siam ve teh ang.

1. Aizawl khawpui daiah inthiarna ṭha leh changkang siam : Aizawl khawpui hian luhka pali a nei a. Chhim leh Hmar, chhak leh thlang aṭangin. Heng kawngpuiahte hian Aizawl luh dawnah hmun zau deuh laiah Aizawl chhuansan leh lut turte tan inthiarna phuahchawp angreng tak a awm vek a (Aizawl chhuahsan turten ṭawngṭaina hmun atan an hmang bawk). Mahse, he’ng hmuna inthiarna ṭawpzia leh tenawmzia chu sawi ngaihna awm mang lo khawp a ni. Hei hian kan hmel a tibal hle a. A nawlpuia faina leh thianghlimna lama kan la hnufualzia a lantir. Hnam dang Aizawla zin turte hmuh atan phei chuan zahthlak tawpkhawk a tling a ni.

Chuvang chuan, he’ng hmuna inthiarnate hi kan hmang kumkhua tho si a. Siam ṭhat law law a, changkang zawk leh mawi zawk, hman nuam zawk, thianghlim zawkin AMC hian siam law law teh se. A hmunhma kan siam danin a zir a, zahawm tak leh mawihnai taka kan siam phawt chuan mipui lam hi chuan fel takin kan zàwm leh thei mai ang. A ṭul angin Tui te pawh supply mai ni se, a enkawltu dah ni bawk se la. Inthiar duh mipui pawhin pawisa chhe té chawi ve se la. Na kan ti lo vang. Hetiang inthiarna ṭawp leh tenawm lutukin kil tin aṭanga kan Aizawl khawpui lut leh chhuak tur min lo hmachhawn reng ringawt hi chu, a hrehawmin a zahthlak ngawih ngawih a nih hi.

2. Welcome Gate Lian siam : Kan sawi tàk angin Aizawl khawpui luhna atan hian luhka pali a awm a. AMC area chinah Welcome gate lian leh mawi tak siam ni teh se. Khawi hmunah pawh kan zinin, thingtlang khaw te tak té tè-ah pawh khaw luh dawn a, “Welcome to…” tih te, “…khuain kan lo lawm a che,” tih a lo intar te hian chhiar a nuam a, khualzinte min tihlim a, khaw luh hlan kan nghakhlel ṭhin. Hetiang deuh hian Aizawl khawpuiin khualzinte lo lawmna Gate mawi tak kan siam chuan, khualzinte tan a hahdamthlakin khawpui luh a tichakawm ang a. Hnam dang lo zinte tan phei chuan Aizawlah an zin ngei a ni tih hriat nan thla lakpui an chak ngei ngei ang. Tin, a chunga kan sawi tak inthiarna pawh khi Welcome Gate bulah hian siam ngei ni bawk se la.

3. Kawngpuia veivakte tan chawlhna siam : Aizawl khawpui chhunga mi veivakte hian hmun remchang laia ṭhut hahchawlhna an mamawh hle mai. Khaw lum lai phei chuan Millenium Center chhehvela chawl hahdam an tam ṭhinziate han hmuh phei hi chuan, chawlh hahdamna kan mamawhzia a lang chiang zual. Kan khawpui tawtzia leh hmun awl a vanzia kan hria. Mahse, khawi emaw lai laiah chuan ṭhutna han siam a, a bula daihlim siam tura thing han phun mai theihna awm hi a la awm nualin a hriat. A ṭul a nih leh mimal ramte pawh lei dan a awm ang. Khaw lum laia nisa hnuaia thlan tla zawih zawiha vei vak ṭhinte tan hei hi mamawhna a sang em em a ni. Aizawl Smart City project hnuaia kawng sira tui thianghlim herh chhuah mai tur awm tate nen hian han awm dun thei phei se chuan, duhthusam a ni lehzual.

4. 2 wheeler Parking siam belh : Hemi kawnga hma lak dan tur hi a vang mai thei. Amaherawhchu, kan khawpui kawng chho lai ṭhenkhat hi a hnuai verha parking atana siam theih dan a awmin a lang. Entir nan, Civil Hospital pan chhohna kawng, Casualty kawta Car park-na hnuai te hi verhin, a thlang kawngpuia 2wheeler park zawng zawng hi bilh luh theih a ni ang. Tichuan, Civil Hospital thlang kawngpui phei chu a lo thawlin a lo zau tawh ang a, mipui tan a him lehzual ang.

Hetianga siamna tur hmun remchang hi a tam hlein a hriat a. Tin, mipuite pawhin kan kal duhna zawnah kher lirthei park tum lovin, park-na hmun hla deuh aṭang pawha kan kal duhna kea pan mai hi ching ila. Taksa exercise-na ṭha tak a ni tel bawk si a.

- Chhuani Pa.