Mizote leh ram leh hnam humhalh

Vawi tam tak yma-in kumpuan thupui atana a lo hman tawh, ram leh hnam humhalh chungchang hi sawi nawn a ngai ta fo mai. A thu chuan ram leh hnam humhalh hi kan vei tlang hle niin a hriat.Amaherawhchu, kan ram leh kan hnam hi a him tawkin kan hria em? Tih hi zawhna chhan har tak a ni awm e. A him lo a nih chuan tu nge mawhphur ang? Kan inpuh kual vel mai mai nite hian a hriat theih.

Ram leh hnam humhalh han tih hian a kawng a zauin sawi zawh sen chi pawh a ni awm lo ve. Ram leh hnam humhalh chungchang kan mi thiamtena an sawi ṭhin hi ngaithla liam mai lovin, a taka zawmtu leh hmang ṭangkaitu nih i tum zel ang u. Kan ni tin hun kan hman ṭhin danah te hian ram leh hnam humhalhna lamah engti angin nge hma kan lo lak ve ṭhin tih te hi, mahni ṭheuh kan inzawh ṭhin a pawimawh hle mai. Amaherawhchu, ram leh hnam humhalhnaa hma kan lak ṭhinnaah hian a ṭhen chuan a zung an la kar pha lo deuh nite hian a hriat a, a ṭhenin a zar thlakin, ṭhenkhatte erawh chuan a ṭangte hlawiin ṭangkaina tam tak awm ṭhin mah se, a bul kih emaw a nih loh chuan kan inthian seng dawnin a lang lo. He kan ram leh kan hnam hmasawnna daltu sualna, hleprukna, zawmthawtna, leh ṭha nia kan inhriat anga min awmtir thei lotu hi theih ang anga a bul kan zawn chhuah hi, ram leh hnam humhalhna atan hian kan tihmakmawh a ni.

Thuthlung hluia israel hnam humhalh duhtu danglam ngai lova kha tuna kan rin Pathian hi a ni. Chuvang chuan ngaihdan mumal tak neih hi a hun tawh tak em. A var chu a var kan tih ngam a, a dum chu a dum kan tih ngam a hun ta. Mi ṭhahnemngai tak takten ram leh hnam humhalhna kawnga hma an lo lak mek laiin, hnam dang nupui leh pasal atana lo neih hi thil zahthlak tak a va ni em. Ram leh hnam humhalh chungchangah hian sawrkar pawhin nasa tak a hma a lak meknaah hian, mipuiin kan duhkhawp loh avangin sawrkar kan mawhpuhna tam tak kan nei ang. Hei hi a dikna chen tam tak a awm pawn a hriat. Mipuite pawh hian he kan ram leh kan hnam kan humhalh mekna ah hian kan pawimawh zia hi kan hriat thar a ngai hle mai. Ram leh hnam humhalh chungchang hi kan sawrkarte hmalakna tur atan leh yma hmalakna tur atana dah mai lovin, kan ram leh kan hnam tana theih tawka kan awmna hmun apiangah ṭan la zel turin kan inchah duh a ni.

He ram leh hnam rawngbawlna pawimawh tak hi feh chhuak thei lo te pawhin kan awmna apiangah kan ram leh kan hnam tana Pathian hnena ṭawngṭaia hma kan lo lak zel hian, nasa takin kan ram leh kan hmam tan hian hna nasa tak kan thawk tih hi kan hre reng dawn nia.

Kan vanglai hun leh ni zawngte

Kan ram tana hlan zelin

Fam dairial pawh chang ila

Kan sakruang mizoram tan

Kan ram leh kan hnamin hmasawnna ropui leh chhinchhiah tlak a neih zel theih nan, Lalpa chakna hmangin kan hmelma hneh zel turin i inbuatsaih thar zel ang u.

- George l.Ralte