Zo Puakphur, Ka Ngaisâng Che U

Tu nge in nih ka hre lo a che u. Vanglaini chanchinbu ni 24, February 2024 (Inrinni) chhuakah in hming ‘David Lalmuanpuia leh Zoremthanga Chalngeng’ tih chu ka lo hmu a; a bâk engmah, in mimal nun, in kum zât emaw, nupui fanau in neih leh neih loh, in khawsak phung, tûn hmaa in eizawnna, in address leh thil dang hriat ka nei lo. Chu lam chu ka hriat a ṭûl hek lo. In hming pawh hi nakinah ka la hre reng ang em ka hre lo. Mahse, ‘Zo puakphur’ tiin ka hre reng tawh ang che u.

Khatia in chanchin ka chhiar aṭangin kei chuan mi ropui takah ka chhâl che u. Ni e, nangmahni ṭawngkam ngei, Aizâwlah hian hnam dang muṭiate’n zan tairêk leh zîngkâr aṭanga thawh sên loh an neih laiin, Mizo ṭhalaite chu thawh tûr hre lovin an awm fo mai. Mahse, nangni ṭhian dûn chu in fing tlat. Pathianin ngaihtuahna fîm tak a pêk che u hi a hman dân in thiam a, mi dang tâna malsâwmna ni si, mahni tân lah eizawnna ṭha tak ni bawk, hna hnuaihnung tak anga lang, zahpui a hnêka pâwl hial in din hi ka va chhuang tak che u êm!

Heti ang thil in tih duh aṭang ringawt pawh hian mi chapo in ni lo tih a hriat a; mi chapo tân tih duh chi niin a lang lo. A hna hming ‘muṭia’ a ni a, tu nge ‘kei ka ni’ intite tân thawk peih ang? Mite ngaihsân leh lâr duha ti pawh in ni lo va, kei chuan zaa zain ka thlawp che u a ni. Mi dang nunah in buai lo va, thil ṭha leh thil tih âwm nia in hriat avângin in ti a ni a; heti anga in kal zêl chuan nangmahni aṭangin nangni ang rilru pu, ṭhalai tam tak in chher chhuak ngei ang tih hi ka ring tlat a ni.

Ram leh hnam humhalh tûra kê kan pên dân hi kan inang thlip thlep lo va, mite tih ang pawh kan ti thei vek lo. MLA/minister-te’n assembly house-ah ram leh hnam tân an au va; MZP, MSU, YMA, ZoRO hruaitute’n Mizo hnam humhalh a ṭûlzia an theih ang angin an lantîr a, hnam dang kut an tuar hial bawk. Nangni pawh Mizo hnam hmangaiha humhalhtu pêng pawimawh tak pakhat in nih kha hre nawn fo vang che u.

In hna hi a tlâwmthlâk rêng rêng loh va, kut tling lova hausak aiin nangmahni thawh chhuah ngei hmanga chhûngkua in châwm tûr hi inchhuang ula, ṭhahnem ngai takin thawk zêl ang che u.

Eng tikah emaw chuan in thil tih hian khawvêl beng a thleng ang a, sawrkâr hna thawk, mi liante pawh hian an ngainêp ngam tawp nâng che u le!

A tâwp berah chuan rinawm ula, LALPA ṭih dêkin awm ula, Pathianin malsâwm zêl che u rawh se.

Nangmahni ngaisâng êm êmtu,

- V. Kûngtea, West Saizawh, Awmhar Cabin.