AIZAWL TRAFFIC JAM

Aizawla khawpui traffic Jam hi kan vei tlang hle a. Sawrkar pawhin theihtawp an chhuah tih kan hria. Mahse vawiin thlengin ziawm a hnekin, phung velh ang maiin a pung tulh tulh emaw tih mai tur a ni si a. Sawrkar hian traffic jam zualna laite zawng chhuakin a chhan a zir chiang ang a, chuta ṭang chuan hma an la turah ka lo ngai a; chuti lam chu kan hawi ta mang si lo va. Sawrkar thar hian theihtawp a rawn chhuah turah ngai ila. Nghakhlel takin i lo thlir leh phawt mai ang.

Aizawlah lirthei a pung nasa em em a, kan kawng a zim a; a pung ve bawk si lo va. Chuvangin, traffic Jam reh nghal huaina tur siam chu tu tan pawh a awlsam lo vang tih a lang reng. Amaherawhchu, a jam-na chhan hi lirthei pung chu a nih ngei rualin, heng thil chi hrang hrang vang hi a ni bawk a ni :

Pakhatna–City Bus stand : Kan city bus dinna hnawk zualte hi sawn ni se, mipui chhukna tur leh lo nghahna tur aiin traffic a tihbuai lohna tur hmun ngaihtuah ni se la. Sabinga Lung, Khatla kawng kual lai taka stand awm te hian chhim lam leh hmar lam aṭanga lirthei lo kal min hliah vek a, insut a hlauhawm hle. Chutih rualin Bus pasenger-ten kawng an kàn a ngai bawk si nen. A chhim lam hret feet 20 vel lekah pawh sawn ni se, Bus chanve tal kawng sira a luh theihna turin pool siam ni bawk se la.

Pahnihna–Kawng ṭhuam lai (junction)-a Bus stand awm hi : Ram changkangah chuan kawng ṭhuam (Junction) laiah Bus stand an dah lo tlangpui. Kawng ngil lai, leh lam leh lam aṭanga lirthei lo kalte an inhmuh tawn theihna turah an dah deuh zel. Kan bus stand heng : Chanmari kawn, Israel point, Treasury square leh Sikulpui kawn te leh a dangte pawh, kawng peng pakhat aṭanga lirthei lo kal tlan tlang mai thei tur tana hèl ngai kher ang chite hi sawn ni se. Entir nan: Treasury square-a bus ding hian bazar lam aṭanga lo kal, Republic road lama tlan tlang thla mai thei tur chu a lo dan tlat avangin traffic kal a timuang em em a ni. Bus stand chuan mihring kal vel a titam a, traffic duty-te tan pawh a buaithlak zual ṭhin.

Pathumna - Bus hian Passenger-te nghak lo se: Bus-te hian a stand-a lo nghakte an luh kim chuan a dang nghak khawtlai lovin tlan nghal zel se la. Bus-in passenger nghak lovin pasenger-in bus nghak zawk se, tihna a nih chu. Chutianga an tlan vek chuan, passenger an neih dan pawh a inrualkhai tho vang. Hei hi ram changkang lama bus service dan pawh a ni zawk a ni.

Palina - Passenger-te Bus nghahna: Sawrkar ṭha chuan mipui a ngaihsak ṭhin a. Bus nghaka kum upa tak tak, rei tak ding thei lote an awm ṭhin avangin ṭhutna siam ngei hi a ṭha hle mai. Ruah sur laia a buaithlak ṭhin avangin a chung neia siam ngei ni bawk se. Kawng chhak ko rinchhana siam remchang leh senso tlem angin a lang a. Chutianga siam a nih chuan, kawng ko lei tla thei lo leh, tuihawk luang lut thei lova siam hram ni bawk se la.

Pangana - Mihring kawng kàn : Mihring kawngpui kàn hi traffice jam siamtu pakhat chu a ni. Mihring kawng kàn tamna lai deuhte zawn chhuah ni se, lei hnuaiah emaw kawng chung lamah emaw a rem dan ang anga kawng kànna hi siam ni se. Chu chuan traffic jam leh muang lutuk tur eng emaw chen chu a tiziaawm ang.

Parukna - Foot path : Kan kawngpuite an zim a, foot path siam a harsat tehlul nen, sawrkarin theihtawp chhuahin an siam hram hram a. Heng hi mi tinin zah ila, bungrua dah hnawk lo ila. Mipuite pawh foot path-ah hian kal hram hram ila. Tunlai hian smart city lam hna thawh niawm taka ka lo hriat, cable zam hnawkte sang zawka dahna tur thir ban phun a ni a. An ban khur chawhna vung foot path leh kawng sira chhunkhàwm ringawt maite hian kan la fimkhur tawk lohzia leh, kea kalna leh kawngpui pawh kan zah lohzia a tilang chiang hle. Tunah ruah a sur ṭan a, a kawi leh nuaih mai dawn a ni a, a pawi ṭhin hle a ni. A mawhphurtute senghawi vat atan a ṭha hle mai.

- Commisioner Lalkiamlova