Ṭawng Dang Thiam Loh Ngam Hi Ka'n Sawi Mawi Teh Ang

Ṭawng pawimawhna chungchangah hian sawi tûr tam hle bawk mah se, ram leh hnam hum him nâna ṭawng dang thiam pawimawhzia kan sawi uar tluk zet hian, mahni ṭawng chauh thiam hi ram leh hnam him nân a lo pawimawhzia hi sawi loh phal chi a ni lo vang.

Hnam changkang zâwka kan ngaihte hian an ṭawng min zirtir a leiah, mahni ṭawng bosal ṭhakin ram dang ṭawng chu kan han ngaisang ta a le, a thiam pawh kan thiam nâl ta zel zul mai. An hnam ṭawng chuan kan hnam ṭawng luahlanin, an finna chuan mahni leh mahni kan inawptir tih lam rêng kan thlù lo. Thiam lo chung chungin mahni hnam chanchinte hial ṭawng dangin kan zir a lo ṭul a. Kan hnam chanchin hre tûrin kan ṭawng an rawn zir kher a ngai ta tlat lo.

Kan nihna (identity) min petu zînga pawimawh tak kan hnam 'ṭawng' erawh kan tihlum mêk chu a ni lawi si. Tun hma ang lo takin hmasawnna kawngah hian, ṭawng dang thiam zul aiin mahni hnam ṭawng chauh thiam hlutna hi inzirtir thar kan ngai khawpin a hriat a ni. South Indian te rêng mai, North Indian lamin Hindi an vawrh viau laiin, Tamil ṭawng zu hmang lui duh tlat a maw le! An ât vâng emaw, an tunlai loh vâng emaw lam chu ni theiin a hriat loh. An fing ru riau.

Kan hnam chanchin hi sap ṭawnga a inziah kûr dup aiin, kan ṭawng ngeia a inziah kûr dup hian kan hnam chanchin hre chiang duhte chuan, duh leh kan ṭawng chu rawn zir hmasa veleh zet mai se la. Chu chuan alawm, hnam himna keng zâwk tûr chu(h). Ṭawng a ral hma chuan he hnam hi a ral bîk hauh lo vang le.

- Samuel Dinté, Chennai