Lirthei parking chungchang
Aizawl khawpui chhungah hian mipui lirthei park-na (public parking) kan nei chau hle mai a. Lirthei park-na kan neih chhunte pawh a limit em avang hian lirthei (LMV) nei tam tak pawh hian an ken chhuah loh phah fo a ni.
Aizawl khawpui chhunga two wheeler parking tlemte zingah a laili lai ber chu Dawrpui Bazar, Floria Glamour dawr/ hotel bul kawngpui hi a ni kan ti thei awm e. Helai hi a lun ber bakah kawngpui zau var ṭha lai a ni a, Parking zingah rau rau pawh a dawng hlawk hle.
Aizawl khawpui chhunga two wheeler parking-te reng reng hi a bul hnai/ngheng chiaha dawr awmte an ni tlangpui a. Two wheeler parking bula dawr neite tana hrui thlung meuha kawng tihkuak sak hi mi thiltithei fal deuh chauh lo chu an awm meuh lo. A piah lawk Bazar Bus Stand bul, Selection Centre leh Hope Medical Centre-te dawr hmaah te pawh hian englai pawhin two wheeler thuah hnihin an ding a, a zawna dawr neite kawng ken a, han zuah awl a awm lem lo.
Mi tih loh ang nimahse hmun pawi-mawh zual lai dawr kawt tih awl hi kan hotuten thil ṭha zawkah an ngai a nih chuan lo sawi ve tur chu a vang hle mai. Amaherawhchu, Aizawl khawpui chhung kan two wheeler parking lun ber mai leh dawng hlawk ber chuan chan a lawi a nei ta lo!
A zavaia hman anih lai pawhin a dah tur chang lo hi chhuak mai tur an awm em tia ngai changin an intlar ṭhep ṭhup bakah dahna chang ve ta lo mi tam tak an tlan tlang reng bawk a ni. Aizawl khawpui chhunga two wheeler tamzia leh park-na hmun kan neih tlem sizia ngaituahin kan two wheeler parking lun lai leh ṭha laite hi chu thil dang atan hmang lo hram ila a duhawm hle a ni.
Veng ṭhenkhatah chuan an veng chhung bazar area leh veng chhung kawngpui dungte lirthei park theihna leh park theih lohna laite chu Traffic Police-te nen thlir hovin an enfiah vek a. A ṭulna hmunah mipui tan hriattirna tarin, an signboard tarah pawh “LOCAL COUNCIL & TRAFFIC POLICE” tiin an ziak kalh mai a, a zahawm duh khawp mai. Veng chhungah na na na chuan Local Council hi a lalin an thu a, mipui vantlang tana hnawk leh ngai-mawhawm chu an hma ngam tur ni pawhin a lang.
Public parking mimalin an hauh tlat a nih chuan thuneitu ṭhenkhaten lo remtih sak tawh pawh nise, mipui vantlang mamawh-na sanzia thlir chungin thuneitu sang zawkten en fel ṭhin se a duhawm hle a ni.
- Ruathlui Pu