Zo Cement Mistiri Ve Thung Aw

Vanglaini 28 Feb, 24 ah khan Pu V. Kungtea khan, "Zo puakphur, ka ngaisang che u," tih thu kha a rawn ziak a, ṭha ka ti hle mai. A thupui ka hmuh rual rualin, Zo Cement Mistiri tih ka rilruah a lo lut ve nghal a ni. Ani khan Zo puakphur mi pahnih lai hming kha a tarlang a, kei chuan Zo Mistiri tu hming mah tarlan tur erawh ka hre lo. Tu tute emaw chu an awm ve ṭeuh ang tih ka ring.

Kohhrana eng emaw mawhphurhna ka neih ve laiin kumkhat chhung zet chu Mizo patir/Tlangval Cement Mistiri training turtein ka fuih ve ṭhin a, a beidawnthlak lam hret a ni. Chutih laiin kum 2013 chho lai vel khan Labour Dept leh YMA ṭangrualten eng emaw ti chhung Cement Mistiri Training an buatsaih a, lawmawm ka ti hle a, Aizawl ka kalin Labour Deptt. hotu pakhat pawh a Office-ah ka lenluh phah nghe nghe a ni. Tunah hian keimahni Zopa te ngei, Cement Mistiri kan nei ve ta nual niin a lang a, a lawmawm hle.

Keimahni Mizote ngei Cement Mistiri kan lo nei ve ta nual hi a lawmawm hle laiin, kan la indaih lovin a la tawk lo hle mai. Kum eng emaw ti kal ta aṭang khan ka rilru tihrehawmtu pakhat chu kan Biakin tak ngial pawh Vai tel lova kan sa thei lo hi a ni. Kohhran Upaten, "Kan Vai Mistiri beiseite an la hman lo va, kan Biakin sak kan la ṭan thei lo," an tih ka hriatte hian ka lo thinrim ru tlat ṭhin. Mi tute emaw ka zawh a, min chhanna chu, "Mizote hi chuan Cement hna kan uluk peih lo va," an ti leh mai ṭhin. Chutih laiin vai tluka ṭha, an aia ṭha zawk mah kan nei ṭan mek mai awm mang e, tihte ka ngaihtuah a ni.

Zofate han tihluai teh ang, hma kan sawn zel a, Cement 'work' te hi hna ṭha, thawh sen loh kan nei tih hriain Mizo patir leh Tlangval, vai aia thluak nei ṭha zawkten han bei ila, a va ṭha dawn em! Tuna kan ramin a mamawh tak mai pakhat chu Mizo pa/Tlangval Cement Mistiri a ni. Kohhran thawhlawm vawikhat pawh Lalpa ṭawngṭaina chham ve ngai lo, Karimganj tlangval kan pe reng mai hi tih bàn a hun tawh khawp mai.

Kan CM hlui Pu Hawla khan, "Kan ṭhalaiten hna thawh tur an neih loh laiin, Karimganj tlangvalten thawh sen loh an nei thung," a tih kha ka la hre reng. Aw le, a theih chen chen chu mahni in sa turte, biakin sa turte, Contractor te pawhin hnam dang ni lovin, Zopa Cement Mistiri chhawr tur ngaihtuah hram hram ila. Chutih lai mek chuan Vaiho aia ṭha leh rintlak zawka thawk thei leh, rawih tlak turin Cement hna lamah Mistiri ni thei turin Mizo pate'n ṭan i la ang u. An hlawh tamzia te hi, helper aṭangin an ṭan a, kumkhat velah Mistiri an inti mai ni tein an sawi. Kan Pathian Biakin meuh pawh ringlo mi kan saktir ṭhin hi chu tih bàn hun ta hle.

- Rev Biaka Chinzah