Hlamchhiah thiang lo Aizawl ṭhang zel hi
Plan awm loa ṭhang lian Aizawl khawpui tawt hian ram hruaitute, city manager te ti luhaiin ti mangang ṭhin pawh ni se a mawh lo e.
Mi ṭhahnemngai ṭhenkhatin cable car (ropeway) leh mono-rail (kawngpui chunga rail ang deuh kawng chherchhuan ti mai ang) siam te an rawt a, mahse kan hmunin a zir si lo. Hetiang hian traffic jam tiziaawm turin motor vakvel a titlem chuang lo maithei.
Mithiam ten "Master plan for Aizawl, Vision - 2030" an siam a, sorkar pawhin a pawm a. Heti chung pawha chep leh buai taka Aizawl hi a la kal zel a nih chuan
ṭhangtharten mawh min la phurh tir ngei ang. Tun aṭang hian kan sum neih ang ang hi helam hawi hian hmang ṭan ila, kan sum neihte hi a langsar laiah chauh ni lo, plan tih hlawhtlin nan hmang ang u.
Khawpui daifem hmun remchang apiangah sorkar hmun, zirna hmun, market, damdawi hmun, mihring chenna leh ṭul dang buatsaih a, khawpui laili lam tawt tih ziaawm hi Master plan thil tum pawimawh tak a ni.
Plan-in rawtna leh ruahmanna a siam hi a ruhrel tlangpui chauh a ni a, a hmun belhchian hnuah detailed landuse plan siamin, map a dah tur a ni. Ruahmanna ang ngeia ram leilung hman a nih theih nan dan leh hrai hmanga humhalh tlat a ṭul.
Ka rilru-ah thil lo lang a awm. Ram ruak pawh la ni hrih mah se mimal ram vek a ni a, an phal ang em, compensation kan tih sak thei ang em, harsatna dang pawh a awm thei. Hengte avang hian engmah ti thei loin kan awm reng mai dawn em ni ang? Ni lo ve, hetiang harsatna hi state dang, kan hmaa kalte pawhin an tawk ṭhin a, an lo sutlang fo tawh.
Mizote hi kan sual lo. Ram leh mipui vantlang tana ṭha tur thilah kan in dil tawh chuan thil uiawm deuh pawh kan phal thei mai zel. Kan khawpui ṭhan zelna tura ram mamawh chungchangah pawh harsatna lian lutuk awm loin kan in siam rem theih zel beisei ila. A lo thlawn ngawta in chhuh thu lah awm lo. Mi harsa zual deuh kan lo awm palh a nih pawhin dan leh hrai ṭul ang siamin hmang mai ila. Ram tan thil ṭha ti tur chuan huaisen leh chhel, tum ruh, tei rei peih nih a ngai. Chutiang mi chu Mizoram hian a mamawh ta e.
He hlamchhiah thiang lo hna pawi-mawh thawk tur hian state sorkar te, Urban Local Boty (Aizawl Municipal Corporation) leh Local Council te an thawkho ang a. An sum leh pai leh an hnathawktute thawhkhawmin, anmahni hma zawn ṭheuhah a ṭul anga thawkin, dan leh hrai te siamin an lekkawh dawn a ni.
- Kaa Pa