Kan ramri chu a fel ta em?

"MNF nge nge ramri humhalh ngam" tih lam hawi ṭawngkam kha ramri buai lai khan kan hre nual a ni. 

Kha ramri buai kha ramri chinfelna thuruk an la hman loh vang a nih hmel a, a buai hmaa ramri chiah chiah kha kan la ring tho. Kan ramri buaina laiah chuan hnawh chuah theih tawh ngai loh tur (anmahni thua an chhuak a nih loh chuan) Central Force an ṭhu hmak tawh bawk a, kan ramri inchuhah khan 50-50 ni lovin a hmaa Assam lamin an ven ve loh ramri kha Central Force-in an ven tak avangin kan chân ṭhen a ni zawk lo maw? tih zawhna hi ka inzawt ru reng a ni. 

Congress kha ramri chung changah chuan dawl zawrin an zawr a, ramri buainaa tel ve tur pawh ni lova news atana cover tura ramria kal ve Journalist rual pawh Mizoram chhungah ni si khan Assam Police kut an tuar a nih kha a va han zialo tak em! 

Kha thil kha kan la theihnghilh loh avangin Congress hi chuan ramri chungchangah hian sawi tur an nei ve lo. ZPM leh BJP chiah hian sawi tur an nei a, chu pawh an la sorkar ve loh vang mai mai a ni a, eng teh ual an ni bik lo thei tlat. Kan Assam ramri hi chu Assam kan ngam lohna tilang chiangtu a ni zui zel dawn a nih hi, kan ram dinhmun en hian a chiang a ni. 

Awle, chu ramri chu kan zauh si loh chuan, eng vangin nge ramri chungchangah kan sorkar hi fakawm riauva ruling party hian an inhriat mai le? 

Veng pahnih hmangin tehkhin thu han sawi ta ila, Vengchhak leh Vengthlang an awm a, anni hian ram an inchuh a ni. 

Veng chhak VC khun­khan taka ṭhukhawm chuan Vengthlang huam chhung hla taka tuikhur chu va kawkin, "Hei hi kan ram china kan pawm chu a ni," va ti se, mahse chu tuikhur chu va neih tum ngam si lo se, Vengthlang zawk hian chu tuikhur an neih piah lamah Vengchhak huam chhunga leilet zawlte pawh nei ta tho si se, Vengchhak nge che ṭha ang Vengthlang le? Vengthlang an che ṭha zawk tih chu mimawl nileng lo tan chuan a chiang reng a ni. 

"July, 2019-a Chief minister Pu Zoram­thanga hova Council of Ministers ṭhukhawm chuan, Mizoram ramri atan Bengal Eastern Frontier Regulations (BEFR) 1875 an pawm" tih news-ah kan lo hmu a, Google-ah a la hmuh theih a ni. 

Kan ram hruaitute chuan Assam tuikhur bul Dholai bul hi, "Kan ram a ni e," tiin an va kawk a, mahse Lailapur khaw te tak te pawh kan tawn ngam si lo. Tunge che ṭha zawk le? Kan ram kan tih hi kan humhalh si loh chuan, kan duh leh Silchar thleng law law khuan kan ram tiin zu kawk law law ang u.