Sorkar hnathawk buhfai la hi
Mizoramah chuan chhungtinten ration card kan nei vek a, nei lo chu sakhaw zawm pèn vang a nih a rinawm. Chhung tin ration card chu a hma kha chuan buhfai, chini, khawvartui lak nante kan hmang ṭhin a, tunah chuan buhfai leh khawnvartui lak nan kan hmang ta ber.
Congress sorkar lai khan Food Civil Supplies & Consumer Affairs Minister Pu John Rotluangliana khan sorkar hnathawk leh, chhungkaw awm thei deuhte chu ration buhfai la lo ngam turin hma a la a, mahse sorkar hnathawkah a tla na vak lo a ni ang e, zawm a hlawh lem lo.
Dik tak chuan sorkar pachhe em em kan nei a, mipui pawh kan rethei viau bawk. Chutihlai chuan sorkar sum kal ralna tam tak chu buhfai a man tlawma kan lak theih nana sorkarin subsidy a ruahman hi a ni. Supply department hian buhfai a leina ang ngawr ngawrin mipuiah hralh chhuak se chu, sorkar tan sum hloh a awm lo deuh tur.
Chutih laiin kan sorkar hnathawk, officer lian aṭanga group 'C' thlengin tu ma'n "Ration buhfai hi kan la ve tawh lo mai ang e," ti duh an awm miah lo a, a duham amah pawh an ṭang fahmiang. Kan sorkar thar, Pu Lalduhoma kaihhruai chuan sum renchem lamah theihtawpa hmalak a tum a, chutah chuan ration buhfai latu tihtlem te, card var, hring leh pawl thliar a nih tur thu te, chhungkaw awm thei deuhin buhfai man tlawma lakna card an neihte surender turin an ngen ta hial a ni.
Sorkar hnathawkte hi hlawh ṭha ve tawk, an intunnunna tawk an hlawh ṭheuh a, inrencham lama kal lo chuan an hlawh an kham ngai lo. Inrenchem taka chhungkaw inenkawl chuan pawisa dahṭhat (saving) an nei tam tawlh tawlh. Chutiang chu Mizo mipui hian a nachang kan hre tam lo hle. Hmuh ang ang hman zawh zel kan la tum hi a hnam naupang zia deuh chu a ni.
Sorkar hnathawk vanneihna em em chu bank aia a pung tam zawk fein GPF an la dahin, an mamawh hunah an la chhuak thei hi a ni. Heng an GPF dahte pawh hi ṭhenkhat chuan awmze nei lem loin an lachhuak a, holam takin an hmang zo mai zel a. Chuti ni loa GPF leh an thla tin hlawh khawl ker ker nachang hria apiang an dingchang dawn a ni.
Chuvangin sorkar berin sorkar sum renchem taka a kalpui dawn takah chuan chhung tinte pawh inrenchem lam hawia ke kan pen ve hi a hun ta.
-Lal Rinmawia