DAWIHZEP CHAN KA CHANG

Tûn hnâiah Lunglei-in Covid-19 hri kâi, an kâina chin hriat loh kan tawng chho ve ta nulh nulh mai! 

Heng hri kaite hian an inrinhlelh avâng pawh ni hauh loin, anmahni hna ṭul avâng leh Baptisma chan tur avânga test nei mai chauh an ni a. Beisei loh tak mai in 'positive' an ni tih kan hria a, hei hi Lunglei-in test-na kan neih ṭhat ber dawttu, RAgT hmanga hmuhchhuah a ni a, an kâina tur awm hriat a nih miau loh avângin 'positive result' hi awih a har dawn rum rum alâwm maw le! 

Covid-19 kan hmelhriat tirh tê ka han chhut lêt a, a tir tê aṭanga a dona kawngah ṭan lo la ve tu leh hma theih ang tâwk tâwka kan lo lak ve na te ka chui kir a. Complete lockdown tia kan sawi, inkharkhip burna kan kalpui laia mipuiin kan hlauh maizia te kha thlir kir hian nuihzatthlak dâwn dâwnin lang mahse khatianga kan invênna leh lo do dân kan hriat chhun ang ang a hma kan lâkna khan kan hmelhriat tirh aṭanga tûn hun thlenga kan la thunun hrâm hrâm theihna hi a ni tih min hriat nawn tir fo a. 

Covid-19 avanga damlo kan neih hmasak ber khân thil tam tak min zir fin tir a, tûn thleng pawh hian kha Pastor entawn tlâk takin hma a lo hruai te kha Pathian malsawmna a ni zawk awm mang e ka ti ṭhîn hial a ni. 

Kan invênna ṭha ber tia an sawi inkar hlat (social distancing), hmaikâwr vuah (face mask hman) leh kut silfai ngun/ uluk te kha khatih lai ata tawh zawm ṭha ber pawl nih loh hlau ni awm hrim a, ka ṭhu fâl nalh ṭhin te leh kut ka silfai chhen ṭhianten min nuihzat viau te kha tûn thleng pawha kan la him tlân zêl nan a hmanraw ṭangkai kan neih chhun kha a la ni miau a. Fimkhur avanga min nuihzat dâwn dâwn leh dawih anga min ngai te pawh hi tûn thleng hian ka zah phah chuang lem hlei lo va. 

He hripui avâng hian dawihzep nih ka hlawhin, chhungte leh ṭhen­awmte nên pawh inhmuh sakhi dâwn dâwn te kha a thleng ṭhîn reng a. Thalai hawklakten sorkar dân siam an ngaih pawimawh loh avanga kan innawr sak sak te kha, khawtlâng him nân leh kan medical team te kan chhâwk zangkhâina pakhat ve a ni. 

Kan raldo dân chi hrang hrang hi phuahchawp tak tak leh tih fuh tawk loh dâwn dâwn te pawh a awm tih a hriat theih a, tawnhriat min neih chhoh tir zeltu pawimawh tak a ni thung. Tu emaw va dem viau tur pawn khawvelin a hmelhriat ngai loh kan tawng chho ve kha a ni miau si a. 

Hetia dawihzep chan han chan tâkah chuan he hripui kan dona kawnga theih tâwp kan chhuahnaah hian kan Sorkar hmalakna te ṭha thawkhat viau mah se, famkim lohna khawvêl a nih angin duhkhawp lohna hi chu a awm ngei mai. 

Hmalakna hrang hrangah kan Health Minister Pu Thangtea pawh a fakawm thlawt. Chutih rualin MNF Sorkarin Politics game anga ngáiin, Pu Zodintluanga'n (MLA) hmalakna, chhim lama hman ṭangkai tur Rt-PCR khawl June thlaa thuneitute hnena a hlan tûn thlenga hman theih la ni lo hi a mak a. Hun mâwi chan a chang mai hi mak tih hi a hlawh viau a, hman theih peih turin hma la thuai zawk se kan sorkar hi fak hlawh an ni zual zawk tur! Mihring nunna pawimawh tak hi inenkawlna lama indaihlohna thlen avanga kan in thlah liam phuk phuk hun a thlen hi pawi an ti lo zawk emaw ni le tih hi chhim lam mipuite rilruah a lian viau tawh a ni. 

He Rt-PCR khawl Pu Zodin­tluanga'n Chhim lam tana hman ṭangkâi tura a pêk hi, chhim lam chauh tân ni lovin Zoram hmasâwn nân pawh a ni ang a. ZMC a thawktute nasa takin a chhawk zângkhai awm si tih hi kei vâl lungmawl leh chhim mipui tam tak rilru a ni a. He hripui laka him leh chak lehzuala do a nih zel theih nân hian 'Politics game' tih rilru hi sorkarna chelhtute hian dahṭha rihin, inven sen loh khawp hri kai kan neih hma ngei hian hma hi min lak sak thuai rawh se.