Hnam Chhantu Pawl din champhaphak 30-na

Hnam Chhantu Pawl chuan Zo hnahthlak zawng zawngte Ram Thianghlim hmingin chibai kan buk a che u. Nimin Ni 3.3.2024 kha Hnam Chhantu Pawl din champhaphak kum 30-na (Pearl Jubilee) a ni a. He kum 30 chhung hian kan hnathawhna kawng tinrengah sorkar leh mipui ṭawiawmna duhawm tak kan dawn avangin lawmthu kan sawi tak meuh a ni. Hnam Chhantu Pawl hmalakna a lo darh zual zel theihna tura thawh hlawk em emtute chu Chanchinbu mite hi an ni lehzual tiin sawi ila, tu’n in thikin ka ring lo, a dawtah chuan thil siamtute, thil siam min leisaktute leh ngaihlutute hi in ni.

Hnam Chhantu Pawl hi kan ram intodelh theihna tura hmalatu niin Economics Independent chu kan thil tum lian ber a ni a, a dawtah chuan Zoram hi ram thianghlimah kan puang a ni. Ei leh bara intodelhna a lo thlen theihna tur hian kan ram chhunga kan thar ve theih thlai chi hrang hrangte chu ram chhung kut hnathawktute hian chingin thar chhuak ve ila, tih chu kan thu tlangaupui lian ber a ni a. Chutiang atan chuan bul ṭanna atan kum 1994 khan Economic Survey te neiin kum 1995 June thla aṭang khan thlai chi 13, Mizoten kan thar ve theihte chu kan State pawn aṭangin lo lut tawh lo se la, kan ram chhungah thar chhuak ve ila, chu chuan nasa takin intodelhna a siam ang a, ram chhungah tangka vir vel a titam ang a, hmasawnna kan thlen thei ang tiin nasa takin kan tlangau ṭhin a. Khatih lai khan kan lo ti lutuk deuh pawh a niin a tih dan kan thiam tawk lo deuh pawh a ni mahna, sorkar khan min hrethiam lovin ram dang thlai thar lakluh tihtawp chu ngai ngam lovin, Hnam Chhantu Pawl active member mi 11 te chu Central Jail-ah ni 17 zet min tantir nghe nghe a ni. Agriculture sector lama hmalakna hi zawi zawiin kalpui zel a ni a, tunah chuan Aizawl leh Zoram khawpui dangah keimahni thlai thar tam tak lei tur a lo awm ta a, a lawmawm tak meuh a ni.

Tin, Indusatry lamah hnathawh tur a lo tam zawk nan leh intodelhna atan Handloom hi uar ni se, School Uniform, Doctor leh Nurse Uniform te, Police uniform leh Office parda leh Hospital khum khuhna atan handloom hman ni se, ṭhalai tam tak tan hnathawh tur a lo a tam ang a, puan mana kan ram pawn lama kan pawisa luangralte a lo tlem deuh vang tiin kan au ṭhin a. Khatih lai 1994 chho vel kha chuan kan ramah Handloom industry neitute hi chhungkaw 50 aiin an la tam awm lo ve, tunah erawh chuan chhungkaw ṭhahnem takin handloom hi eizawnna atan an lo hmang ta a, a lawmawm kan ti em em a ni.

Hetih rual vek; kum 1997 aṭang khan kan ram thing leh mau, changel leh hmunphiahte chu kan ṭhalaite eizawnna atana buatsaihin, India ram khawpui hrang hrang leh International thlengin market (hralhna) zawngin Exhibition-ah te vawi tam tak kan feh chhuahpui ṭhin a. A bik takin hmunphiah phei chu kum 2012 aṭang khan tihtakzetin sorkarin kut hnathawktute tan a kalpui ta a, tunah hian hmunphiah hmun neia ei zawng leh, hmunphiah tualṭo váikhawma eizawng chhungkaw tam tak an lo awm ta a ni. Mumal tak leh awmze nei taka ruahmanna hnuaia hmunphiah hi kalpui ni thei se la chuan, mihring nuai 10 hi nuai 20-ah pawh lo pung ila, kan ram mipui min la chawm theiin kan ring hial a ni.

Chutiang zelin Handicrafts Institution te keimahni awm hawpin kan din a, kum 1995 aṭanga vawiin thlengin zawi te tein kan la kalpui a, tunah chuan ram pawnlam mi, Mizoram rawn tlawhtu mikhual pawimawhte chuan Hnam Chhantu Pawl Handloom & Handicrafts Show Room, C.Pahlira, Ex MLA building, Upper Republic Aizawl hi tlawh chik takah rawn neiin, he hmun aṭang hian kan ram kutchhuak mawi tak takte chu an rawn lei ṭhin a ni.

A tawp berah chuan he kum 30-na champhaphaka ka thu chah duh chu hei hi a ni. Rim taka hna kan thawh a, tihtakzeta kan tih chuan kan ram chhunga thing leh mau, changel leh hmunphiah te hmang hian hnam intodelhna kan thlen thei a ni tih hriain, kan ram siam turin phur takin hna i thawk zel ang u. Ka lawm e.

- R.Ramhmangaiha, President, Hnam Chhantu Pawl