KUM HNIH KHARNA - 'VISION'

2018 kum tawp lamah Sorkarna an chelh ṭan a, kum 2 a liam dawn ta, intiamna leh Flagship-te chu 'Hri leng vang' tiin hahdam tein kum kan khar leh thei mai dawn niin a lang ṭan.

INTIAMNA CHU

Kan hre vek a lawm. Video Evidence nen a awm thlap a, Opposition lamin lunglen changin an rawn Post a, Ruling eng ang ruhkawl tan pawh hnial viauna tur awm hek lo! A tlangpui;

Chhungtina Nuai 3 sem.

Kawng chhawng.

Khelmual chhawng.

Chawa intodelh(Mizo buh chawa rin)

Aizawl Traffic Jam Free.

Tunah Economic Molecule.

Mau hmanga intodelh.

Heng bak pawh hi Vision a tam hle mai. Inthlan hma thil hi a tam zawk a ni a, inthlan hnua sawite thleng hian a tak ram la thleng lo, VISION vek a la ni. Kum 2 Sorkar hun a liam dawn hnai a, hmathlirin kan la khat mek a, hmalak mek leh, a kuhmum pawh awm lo hi a tam ber a la ni. Mau kha eng tiang tiat tak ni tawh ang maw?

CHHUANLAM HRI LENG

Hri len tirh lam thleng khan sum tlakchham thu emaw tarlan a ni lova, kan dawn hnem thu kan la hre zing a, kan sum dinhmun hriat kan chak a, kan zawt a, kan kar luai luai a, sum tam thu sawi ṭhang ta chuan a tlem thu sawi thut a harsat ni hmiang 'Pa chauhin a hria' tih chu vawiin thlenga kan rinrawl a ni ta.

Mahse, chik mi kan tam ve zel a, Budget mumal loh thu te, Group A&B te hlawh nghah a ngai ta fo te, Central Project-ah Zirtirtu thlenga hlawh an lak hleih theih tak lohah chuan kan dinhmun zep rual a ni ta lova, 'Sorkar hlimin Krismas-in a nang a, MP inthlanin a dang leh a, Covid-19 hri lengin a zui leh a, hnathawhna hun a awm lo' tih chu kum 2 kan Sorkar chulmamna a lo ni ta a ni. Hmachhawp leh sawi uar thil reng reng, hisap lian tham zawng zawngte chu VISION a la ni ṭhup mai a ni.

Kum khat chhung deuhthaw Delhi thleng thla lovin kan Minister rual an ṭhu ṭhup mai a, CM meuh pawh Cassette Release-na velah a Sermon chiam chiam ta mai a, kan chim chin a zim tlang a, hmalak a harsa tih kan hriatthiampui tlang a, sum harsatzia lah chu Health Department Audit rum rum ngai khawpin kan thikthu a chhia tih a lang reng bawk. Hla kí kan la sang lutuk leh tiam apui kan ngah lutuk erawh kan phur tirittu a la ni dawn khawp.

HRI LENGIN A CHHAN ZO ANG EM?

Mizoram chu kan zia chho ta viau mai. Central lamah erawh kan khawpui ber Delhi thlengin an la pung tual tual mai si. Eng ang pawhin fihlim mah ila, kan chawbel ber lamah ṭam a tlak tlat chuan 2021 pawh hi beisei sang tak chu a ni lo thei a, thâwk pawr viau a la harsa thei.

Service Sector lam Commercial Vehicle, Hotel & Restaurant, Tourism etc. in nasa taka an tawrh avangin Sorkara chhiah lut a hniam phah tih kan hre tlangpui hlawm. Vai thawhkhawma Project lo siam thiam leh thiam loha innghatte hi kan hma hun a eng viau lo thei a ni. 

Hri leng tih reng hi tam tak tan NINAWM a chang ṭan a, ram hruaitute harsatna chhutpui lem lova hmalakna tak tak hmu si lo beidawng hi mi tam zawk kan ni ang tih hlauhawm tak a ni. Kan chhuanlam zel a nih pawhin awmze nei a nih loh chuan min chhan zo tur khawp chhuanlam a tling lo thuai thei.

2021 AṬANGIN

Kum tawp lam thlenga VISION bawk kan la sawi zel a, State Economy leh Flagship-ah vúng chhuah tur kan la neih loh chuan Opposition tan sa hrang lian kan hnutchhiah hnem ngawt ang. Inthlan boruak (Election Oriented) in a kal chho leh ṭan ang a, Opposition leh Ruling MLA khawro dan a inchen ang a, inthlanna thianghlim a chhuak hial thei mahna!

Tunah zawng, Unit aṭangin Ruling pawh kan vui a, Opposition aiin Party chhungah kan la na a, thikthu a chhia a, a awmchhun kan indil thuah ulh ulh a, inhmu sakhi kan awm a, hri leng vang kan ti zel a, Sorkarna siam tura a hah tak takho vuina tlang a san chhoh tak tak pawh thil hlauhawm tak a ni. Chutah Opposition lamin Video Evidence nena an beih chhoh chat chat hunah phei chuan 'A dik chiah, ti zel rawh se' tia in luma Ruling lungawi lo ha chang lo ṭhial bap bap hi kan awm nuk mai thei.

TLIPNA

A hmanna pawh kan hriat chhunzawm loh, Spiritual Sub-Committee te kha tun thlengin tute nge an nih pawh kan hre hlawm lova, thil tak tak tih theih loh lai, thu maia kan awm naw naw lai hi Spiritual Sub-Committee hmantlak ber lai tur a ni zawk hialin ka hria!