Kan kawngpuite hi venhim a ngai

Kar kalta khan PWD road south division chuan Aizawl khawpui chhunga kawngpui an siam chungchangah harsatna tam tak an neihte media sawmin min enpui a, an harsatna tam tak chu mihring siamchawp, mahni hmasialte thil tih vang a nihzia a lang a, hei hi zirtirna a ṭhat loh vang te, dan leh thupek kenkawh ṭhat tawk loh vangte a ni tlangpui.

PWD hotute nena kan en pakhat chu new secretariat complex panna kawng, tourism directorate thlang lawk kawng chu min chhe vek thei dinhmunah a ding mek. Hei hi Bungkawn Vengthar mawng lama chengte'n tuihawk hmanga an ram zauh a, sorkar ram nekin an ram zauhna reh ṭhin vang a ni. Helai kawr hi venhim loh chuan secretariat kawng chu a tlabal vek thei dawn a, PWD hnathawktute pawh an mangang hle a ni.

Kawngpui hi sum tam tak senga siam a ni a, mahse mimal duham vang leh dan leh hrai pawisak loh vangin tihchhiat a ni fo. Mimal emaw, sorkar department-in emaw building an sakin kawngpui an tichhe fo ṭhin. Kawngpui bula building sak dawnah kawng an tihchhiata siamṭhat leh nan PWD-ah security deposit dah se, kawng an tihchhiat loh chuan an deposit kha peklet leh theihin awm ta se a ṭha ngawt ang.

Luikawr hnawha leivung leh bawlhhlawh paihtute lakah te, kawngpui tichhe thei tura kawngsira leivung paih angte hi thil ṭha lo tak a ni. PWD hotute nena hmun ṭhenkhat kan tlawha kan hmuh chu Aizawl by-pass road (world bank road) Chite lei (bridge) bula leivung paih khawm hnur mai, PWD ten an thenfai hnuah an paih leh ṭhin chu a ni. Hei hian kawng a tizim a, ruahtui a tlakin kawngah tuihawk a tling ṭhin a, kawng a tichhe duh em em a ni. Hetiang bawk hian Maubawk mawng Tlawng kawnga mimal rama leivung paihin culvert a hnawh vek vangin kawngah tui a tling tun mai a, ram neitu chuan a rang lama thenfai chi a ni.

Aizawl by-pass road, Salem Venga mimal insa mekin a building sak sira culvert chhukthla chu concrete-in a hnawhping a, culvert chhungah tanky a siam bakah drain thla zelah septic tank a siam leh a, PWD lamin ti lo tura an tih hnuah ram neitute'n court-ah an leiko a, court pawhin stay order a tichhuak mek a ni.

He culvert hnawh pin chungchangah hian culvert an siam dawnin PWD lamin emaw a ram neitute notice an pe em tih ka hre mai lo a, a ram neitute lam lahin culvert a hnawhpin dawnah kawngpui enkawl leh culvert siamtu PWD lam a hriattir bawk si lo a, hei hi court-a thu inchiah ni mahse roreltu lam pawhin thlirna zau taka a thlir a, lai taka thu a rem a ngai mai awm mang e.

PWD hotute leh media inkawmna hun kan hmanah chuan harsatna hrang hrang a tawn chungchang an sawi a, dik pawh a dik viau awm e. Kawngsira leivung paih khap chunchang te, kawng hnaih lutuka insak chungchang leh kawng tichhe ṭhin an ui thute an sawi a. Heng an sawi hrang hrang aṭanga a landan chuan dan lekkawhtu Aizawl DC lam an viak ṭha lo deuh niin a lang. CrPC 144 tlawhchhanin khapna dan an puang chamchi a, a bawhchhia an awmin action lak a vang khawp mai. Dan lekkawh hi a puangtu lamin an kalpui chak deuh a ngai a ni.

Aizawl road south division hnathawh ṭhenkhat leh an harsatna tlem kan tlawh thuak thuak chauh a ni a, road north division pawhin nasa takin hma an lak laiin harsatna an ngah ve hle ang tih a hriat a. Engineer-te hian hna an thawk mawp mawp a, harsatna an nei pawh dan leh thupek kengkawhtute hnen an thlenin a sawt mawh viau ni pawhin a lang a. Hetia division khatin media pun nachang an hria hi ching zel se. An hnathawh ropui tak tak hi media te'n an hriatpui a ṭha ang a, harsatna an neih pawhin media lama leiko nachang hre zawm zel ta se an hnathawh pawh a chak sawtin a rinawm.

Mizoram hi India rama kawngpui nei chhe ber chhuahin kan chhuah chang a tam mai, hei hi social media chak tawh vang a ni a; a ṭha lai emaw, kawng siamṭhat zawh nawmzia aiin khawi kawng chhe lai emaw facebook leh whatsapp-ah kan post chawt zel hi a fuh ber lo. Chutih rualin hei hian ram hruaitute beng a thlen hian sawt ve viau bawk.

Chanchinbua thlalak dah hian sawtna tam tak a nei a, a concern department lamin an bawhzui thuai hian kan
ṭanrualna a tilang ṭhin a, a lawmawm hle. Entir nan Upper Khatla-ah culvert a chhia a, siamṭhat a nih hnuah rei tak siam rual loin a awm a, Khatla-a sainik rest house bulah tuihawk a tling a, kawng a tichhe nasa em em a, thla tam tak chutiang chuan dah a ni. Vanglaini-ah a thlalak dah a ni a, a tukah PWD chuan hma an la nghal a, a lawmawm viau. Vanglaini-ah kha kawng chhe thlalak kha dah ni ta lose thla engzat tak a chhia a chhia khan dah ang maw?

Mission Veng market buil-ding cheng vaibelchhe nga man zet senga sak ṭan a ni a, a ban ṭhenkhat a kawih bakah a sak phung a phuailuai deuh niin YMA lamin an complaint a, bialtu MLA-in hma a la nghal vatte kha a lawmawm ngawt mai. Kha bulding thlalak kha news paper-ah leh social media hrang hrangah pholan a ni a, a concern department leh engineer-ten a hmunah an en nghal bawk a, contractor pawhin theihtawp an chhuah zui ta angte kha a lawmawm hle.

Tunlai hian Bazar Bung-kawn leh Kulikawn inkar kawngpui chu alkatra pan takin an phah thuah mek a, a pan lutuk tiin social media-ah an ang sup sup a. Mahse PWD hotute'n hetianga pan tur hi a ni tih an sawi te, ruahtui tlaka kawng chhuat chhungrila tui a luh loh nana an phah thuah (seal code) mai a lo ni a, chhah luka phah tur a ni lo tih hriat fiah chuan zawmthaw takin PWD-te hian a hmingin an phah mai mai lo tih hriat chuan a pawmawm viau a ni.

- Lal Rinmawia