'TLIPNA' HI AW!

Mizo (Duhlian) ṭawng thiam lo pawlte zingah ka indah a, a chhan chu ka pian leh murna lam avangin a ni. Chutichung chuan ka han sawi ve ngawt ang e. Thuziak hrang hrang kan hmuh ṭhinah te vawi eng emaw zat a tawpna 'Para' ah Tlipna tih hi a lo awm ṭhin a, tun hnai khan David Sailo thuziak an chhiarah ngei pawh a thu tihtawpnaah Tlipna tih kan lo hmu bawk. A lo dik zawk ta em ni aw, ka ti ṭhin.

Tlipna ka hriatthiam dan ka han ziak ve tawp dawn a nia, Mizo ṭawng kei aia thiamte leh ṭawng lama kan mi rilte cho chhuah nan pawh a ni ang chu. Tuna sawi ka tum, Tlipna hi ṭawngka chuan kan hmang lutuk lovin ka hria a, kan hmuh fona chu ziaka kan thuziakah hian a ni. Thuziak ṭha tak tak kan han chhiar a, a ṭhat teh reng nen, a tawp (last Para) ah Tlipna, a lo awm a, kan han chhiar a, a thuziak tlipna pawh chu a ni hranpa leh ta mang lem si lo.

Awle, tlipna ka hriatthiam dan chu, (mi dangte hriatthiam dan pawh a ni ve mai thei) thil kan han sawi ta duah a, thusawi ṭhang lo ta chuan sawi hmasak tur zawk ni awm takte kha a hnuhnung lamah te kan sawi ta zawk a, ngaithlatute tan zawmkhawm chawp ngaite pawh a ni nawk mai. Chutah, U zawk tu emaw a lo ding a, ani chuan, "Nichina kan thu ngaihthlak kha tlip deuh ngai a awmin ka hria a," a rawn ti ta a ni.

Aw le, hetah hian naupang zawk thusawi buai chuar deuh, rawn sawi mam nan U zawk chuan a rawn tlipsak ta a ni. Tlipna chu, thu ti deuh nuai, buai chuar leh thiam lutuk lova sawi rawn thual ṭhatna lam sawina atana kan ṭawngkam hi a ni lo'm ni?

Tuna ka rawn sawi tun laia 'Tlipna' tia kan dah hi chu Tlipna ni lovin, Thu tlangkawmna emaw, Thu tawpna tiin emaw dahin a dik zawkin a lang. Tlip ngai reng reng lo khawpa thuziak, ṭha tak kan han chhiar a, Thu tlangkawmna emaw, Thu tawpna tih tur ni reng si, Tlipna tia dah ṭhin hi a dik lo deuh a ni lo'm ni?

- Rev Biaka Chinzah