LUNGLEI danglam bikna
Lunglei hi sap hunlai ata tawh Mizoram chhimlam tan khatih hunlaia South Lushai hills Hqrs lo ni ṭhin a ni a, chumi kal zelah chuan vawiin thlengin Sorkarin ngai pawimawhin Mizoram chhimlam tan pawh Hqrs ang hiala ngaih niin, Aizawl dawttu second State capital anga sawi ṭhin pawh a ni ṭhin.
Hengte avang hian district dang zawngte ang lo takin Lunglei ah hian department hrang hrang district level hotu (head) aia sang zawk, anmahni department tan chhimlam pum awptu emaw, district pakhat aia tam awptu emaw an awm hlawm a ni, tih hi kan hriat a pawimawh hle a ni. District level hotu (head) aia sang zawk Lunglei khawpuiah Office hranpa bik neia awmte chu hengte hi an ni:
1. High Power Committee (HPC), Lunglei district
2. Police lamah SP aia sang daih zawk DIGP, Southern Range.
3. PWD lamah SE
4. PHE lamah SE
5. Power&Electricity lamah SE
6. Joint Director, Accounts &Treasury, Southern Zone
7. Joint director, AH&Vety
8. Bank lamah, SBI leh Mizoram Rural Bank hotute
Heng bakah hian department dang district level head aia sang zawk la awm an awm mai thei.
Hengte avang hian Lunglei hi district Hqrs dangte ai chuan a danglam bik a ni. Chuvangin, Lunglei ah hian official district level meeting emaw, function emaw organise a nih hian a organiser lamten sawm awm tur chin leh chin lo an thliar thiam a ṭul hle a ni. Tin, district level meeting/function pawh ni se, a chunga tarlan department hrang hrang senior officer district office head aia sangte tel ve se emaw, sawm ni ve se an tih chuan district office head ang ni lovin invitee ang zawkin sawmna pekna chang hria se a mawi a, official protocol hi zawm hram hram ṭhin a mawi a, meeting/function-ah pawh seat arrangement hi protocol ang zelin a theih chin chinah zawm hi a zahawmin a mawi a ni.
Chutiang zelin Lunglei khawpuia cheng leh Lunglei district chhunga cheng mipuite pawhin heng hi hriat a pawimawh a, rilru zim pu lovin khawpui rilru hawihhawm leh changkang puin, district dangte entawntlaka awm tum tlat tur a ni.
- C.Lalthanmawia, IPS