KAN LO KṬP ZEL ANG E

KṬP General Conference vawi 60-na chu Ngopa khuain a thleng a, Mizoram hmun hrang hrang aṭanga ṭhalai kal khawm kan nih avangin KṬP che vel chuan sawi zui a hlawh a, a hunlai a nih miau avangin ram chhung titi luahtu a ni.

A thlengtu Ngopa khan fak an phu, an khuaa in awm zat leh mihring awm zat chhût khan, mikhual kal tura in-report ringawt pawh 20000 an tlin tawh chinah kha chuan an zo lo palh mai ang em tih kha ngaihtuah a awl, in-report lem lo leh ṭhiante kal hnua phur thar leh thut kha an tam mai bawk sia.

An theih leh tlin tawkin Ngopa an inbuatsaih a, an inbuatsaihna a ṭhat avang leh Pathian hruaina an chan avangin ropui takin inkhawmpui an thleng thei. Mikhual tamzia te, CKṬP lamin ruahmanna an siam fuh dan te, ṭhalaiten kan hlutziate chu sawi vek sen a ni dawn lo - hei chu mi dang sawiah khek ang.

'Nang malsawmna ni ang che'

KṬP General Conference thupui chu 'Nang malsawmna ni ang che' tih a ni a, inkhawmpui chhung hian speaker Rev Dr. H. Vanlalruata chuan thiam leh nung takin a sawi ṭhin a, tunlai ṭhalai mil tawk chiahin a sawi rei ngai lo, a thu tumah a chiangin a sawi tur fiah takin a sawi hman ṭhin.

Thupui aṭanga lang chiang tak mai chu, 'Keini loin Nangmah zawk le' tih hi a ni ber mai. Mizo ṭhalaiten tunlai khawvela kan mamawh leh kan tana pawimawh berte zinga mi a ni ngei ang, mahni inngaihhlutna leh indah pawimawh lutukna khawvela cheng mek kan ni a, chumi karah kan nun khalh ngil tur thupuia hman a ni hi a fuh.

Lal Isua khan mi dang a buaipui a, a hmangaih mihringte chandam kan nih theih nan a nun a hlan ngam. Amah zuitute pawhin mahni chauh inngaihtuah loin, kan chhehvela awm kan ṭhiante leh a hla deuh zawka awm kan hriatte kan ngaihtuah a ngai tih chiang takin kan hmu.

Mahni nun chauh ngaihtuah, ṭhenawm khawveng leh mi dang ngaihtuah tel miah loa nun hmang sawi tur an awm ta fo, heng mite hi an bula awm a hahthlakin remna aiin buaina thlentu an ni duh chawk. Chuvangin, mi dang nena khawsak ho leh mi dang tana malsawmna nih kan zir chhuah thar phah chuan a va hlawkthlak dawn tehlul em!

Chhungkaw keh chhia, naupan lai aṭanga zirtirna ṭha leh dik dawng lo pawh kan tam ta. Heng mite hi an lo ṭhang lian a, an tan khawvel hmachhawn hi a harsa ṭhin. Chutiang mite tan chuan Kohhran hi a hlu zual asin - Pathian thu chauh ni loin kohhran aṭangin nun phung tam tak zir chhuah tur a awm a. Mizo ṭhalaite hi mi dang tana harsatna siamsaktu ni loin, malsawmna thlentu zawk nih tum ta ila - nun ho a nuam ang a, a bik takin social media kan hman danah te hian, kan chunga thleng tura kan duh chin ang chauh hi sawi ila, tun ai hian kan nun a nuamin mi dang tan malsawmna pawh kan ni zawk ngei ang.

'Jubilee Concert'

Inrinni zing karah kan ṭhianhoin Aizawl aṭangin Ngopa kan pan a, hnathawhna leh zirna avangin a tir aṭanga tel ve chak viau mah ila; kan tan a remchang ve chiah lo, kan phak leh tlin tawka hmaah Ngopa kan pan ve vang vang a ni. Chhunah Ngopa kan thleng a, chawhnu inkhawm lai chuan zan inkhawm turin kan inbuatsaih ṭan nghal. Chawhnu inkhawm bang haw lamte hi zan inkhawm kal tur nen an insulpel nghal ta zut zut mai, tlar hma chan a harsa dawn tih chu chiangsa a ni ta!

Pandal hnung kil khatah kan ṭhu ve a, inkhawm pangngai a rei lo - inkhawm chhung aiin ṭan hmaa ṭhutna hauh tura lo ṭhut lawk kha a rei zawk hial mai thei! Thusawituin a sawi rei lo, inkhawm bana 'Jubilee Concert' kha ṭhalaite nghahhlelh pakhat a ni a, a hun chu a thleng ta.

Chuan maw, kan concert ta alawm - Pandal chhung leh a pawna ṭhalai rual pungkhawm tam takte chu Pathian fakna hla sain kan zai rual ta dual dual mai a nih kha, zai kan duhtawk mai lo a, taksa che chhuakin Pathian fakin kan lam ta luih luih mai - Van mite pawhin rawn chhuka rawn tel ve mai an chak ka ring.

Tlangval zei lo, làm chu sawi loh; kut ben rem ringawt pawh harsat khan ban ka phar a, ka duhtawk mai lo - ka sira mite ang bawkin ka zuang a, hah pawh sawi loin Pathian fakin kan su dual dual a, zaitu, rimawi tumtu leh sound system a ṭha vel vek mai si - tlai khua pawh var ila kan ning hlei lo'ng e!

Mizo ṭhalaite hian hlim kan duh a, hlimna kan zawng nasa. Kan hmuh leh phak ang tawk chu kan dai dar ve zel bawk. Jubilee Concert aṭanga chiang taka lang chu, ṭhalaite hi Pathian fak hian hlim takin kan awm thei a, ṭhat lai chen nan Pathian thu leh a hlate hi kan ning mawlh lo.

A hmuna awm kha tam viau mah ila, kal ve lo leh TV lam aṭanga lo entu kha a tam zawk fe an la nia. Chutah kohhran pakhat ṭhalai chauh kan la ni zui - Vanah chuan kohhran hrang hrang a awm tawh dawn lo, ṭhalai rualte Pathian faka 'Vana kan Pàr' hun tur hi a nghahhlehawm teh asin.

'Ṭhalai kan Tafff'

Aizawl aṭanga mikhual kal an ṭhahnem ber a, pian tirh aṭanga thingtlang nun la hre tam lo leh hre vak lo pawh tam tak an awm - a tam zawk tan chuan Ngopa kha an vawi khat hmuhna a nih a rinawm, tun hma lama lo hmu tawh tam tak an awm bawk. Thingtlang khaw lian pangngai tak a ni a, mikhual an tam em avangin mahni in anga khawsak theih a ni lo. Chhungkaw member panga khawsate khan toilet pahnihte an nei a, an chhungkaw tan chuan a tawk tiu teu hle - mahse mikhual 50 rual neih thut nan chuan a tawk zo lo hle, a tawk tur lo neih lawksa diam thu awm bik suh.

Ni li chhung vel mikhual nei huk tur tan khawsak tih danglam vek a ngai - mutna, inthiarna, inbualna, ei leh in bakah thil dang tam tak chu 'A rem ang anga tih nawk nawk a ngai' a ni ber mai, khatiang karah pawh khan khawpui nula leh tlangvalte kha an buai chuang reng reng lo.

Kan dinhmun leh awm hmun azirin kan insiamrem zung zung thei tih a chiang a, hmuh an nuam takzet. Ka mit ngeia ka hmuh pakhat chu, mi hausa fapa, chhungkaw sum harsat leh khawsak hartsatna pawh hre thiam lo zawk hial tur, zirlai zir zawh ruala Officer tling nghal thei bawk khan, Chaw leh Sa chhumna bel ung leh bal tak tak kha phur tak maiin a sil fai zung zung mai a, a tiṭhang tan thil harsa ni lo mah se, a tiṭhang lote kut zala a tla chunga an hnehsawh em em maite kha a hmuhnawm.

Kha mah mah kalkawng khu leh kawng chhia, thahrui leh rilru heh zet kan paltlang zawng zawng kha ka sawi seng lo mah mah! Dinhmun a inang lo a, kan tum erawh a thuhmun vek - Ngopa thlen a, chumi hmuna Pathian fak kha kan tum chu a ni.

Kawng harsa leh hrehawmah khan ṭhalaite kha an phunnawi lo, kan duhnaah chuan Mizo ṭhalaite hi kan 'Tafff' ve chiang a nia aw. Mi ṭhenkhatin a ṭha lo leh sawisel tur lai deuh lo hmu ṭhin mah se, a tak ramah chuan ṭhalai fel leh rintlak, hrehawm tawrh pawh pawisa lo hi kan tam a nia.

'Mahni hnathawhna ngai pawimawh'

Inkhawmpui ṭan hun kha February 29, Ningani a ni a, a ṭan ni hma hian chanvo neitu leh CKṬP hruaitute chuan a hmun Ngopa an thleng tawh. Ninganiah a nawlpui an kal a, a tuk Zirtawpni bakah Inrinni leh Pathianni thlengin palai kal an awm. 'Hun a duh rei, hun a hek' tia selna a awm ṭhin. Zirtawpni hi sorkar chawlh a ni a, a tuk ni hnih chu chawlh a ni zui bawk - a haw ni Thawhṭanni chauh chawlh la chung pawhin a inkawmpui theih tihna a ni, sorkar hnathawk tan a harsa lem lo.

Sorkar hna kan indaih lo, mimal sumdawnna leh hna ṭul dangah ṭhalai kan buai nasa tawh - hemi tichiangtu chu khawmpui kal hun a inang lo zung mai kha a ni. Mahse, hun neih remchan ang angin an insiam rem hram hram tih a chiang a, chuvangin kal leh hun hi a inrual thei lo a ni.

Kalkawngah chesual leh intipalh an awm, chetsualte lainattu karah KṬP General Conference sawi hnàwm phah nana lo hmang nghal tlat an awm ve bawk, a mak hran lo - an thlirna tarmit a danglam vang a ni. Tu mah hi fimkhur loh leh pharvar vanga chesual erawh an nih a rinawm loh.

Ṭhalaiten mahni hna an ngai pawimawh a, zan rei pawh sawi thei loin a tuka hna thawh leh nghal tumin hmanhmawh takin, mahni khaw lam an pan hram hram a ni hlawm zawk a. ṭhalai thatchhia leh thawh tur hre lo ni loin; hna ṭulin a nan leh mahni hna ngaih pawimawh vanga zan haw hi an tam ber bawk ang.

Mahni awmna veng leh khua ṭheuh kha han chhut ta ila, kohhran leh khawtlanga inhmang takte hi mi hmantlak leh pa-rawn an ni deuh zel. Mi hman tak, zing thoa hman nghal tawp ang hi an ni lem lo. Chuvangin, Conference kalte kha hman lutuk vanga kal an ni lo, mahni hun neih ang siam rem thiam leh Pathian pawl chaka pungkhawm an ni zawk - Mahni hna ṭul taima taka thawk chungin KṬP zel phawt ang aw!

'Mi tin lenna KṬP'

KṬP khawmpui leh YMA khawmpui lo khaikhin tawk an awm ṭhin, heng mite thlirna pawh hi dem ngawt theih an ni lo a, an tarmit a danglam avang erawh chuan ṭul loah an rilru a lo hah deuh a ni mai thei, a chhawk nan Isua tarmit vuah thei se ka duhsak.

Pawl ṭhenkhat khawmpuiah chuan palai kal tur thlan theih a ni a, hruaituten kal lo zawk mai se tia an hnar pawh an awm mai thei. KṬP-ah erawh tu mah kan inhnar ngai lo a, hnar loin 'Kan Insawm' zawk ṭhin, a duh apiang chu an leng vek.

Misual leh khawtlang tana mi hnawk tia kan sawi ṭhinte pawh hi KṬP-ah an leng vek a, inkaihhruaina dan tharah phei chuan 'Presbyterian Kohhran ni lo pawh KṬP member-a inpek theih' a ni. An duh a nih phawt chuan member an ni thei a, inkhawm, fellowship, inkhawmpui leh a dangahte an tel thei, thlei bik awm lohna pawl a ni.

Chuvangin, khawmpui kal zingah lo dai pelh palh leh nungchang mawi lo palh te, mi ṭhenkhat duh ang thlap thlapa lo nung thei lo palhte an awm a nih pawhin, a en dan chin tawk kan hriat a ṭha hle a, mahni mihring pui teh tling thei lotu mit aṭanga tlin hi mi chak lo tan chuan a harsa si ṭhin.

Lal Isua kha mi tin tan ban phak a ni a, chuvangin a kohhran din hnuaia ṭhalai pawl pakhat - KṬP hi mi tin ban phak a ni. Zu nam leh mit meng sî deuhte pawh inkhawmpui rawh se, tisa leh thlarau damna chan phah mi tam tak an lo awm tawh ṭhin. Mi ṭhasa hlir kan intelkhawm nghet tlat mai chuan kan sengkhawm turte kan hlat lutuk ang tih pawh a hlauhawm zawk a, chuvangin, 'Mi tin ban phak KṬP' lo ni zel zawk rawh se!

- Lalthansanga