Kan Ṭhenawmte
'Ṭhenawmte do aiin khaw sarih do a thlanawm zâwk' tia inzirtir chhawng hnam kha kan ni a.
Keini ṭhenawmte pawh hian kan in sak lai khân 'complain' an rawn nei leh zauh ṭhin. A neitu hi a in luahtu kan nih vek bîk ṭhin loh avâng hian rin aiin awlsam taka siam theih anga ngaih hi 'ṭha taka siam dawna sum leh pai sen ngai a lo nihna leh hun remchang' neih mai loh deuh ṭum hi a inrual thei fû mai a. Ṭhenawmte tâna harsatna siamtu nih hi a hrehawm duh tak tak a nia aw. Amaherawhchu, keini ṭhenawmte hi an fel hrim hrim a, rin ai hian an dawhthei phian mai a.
A mualpho zâwnga social media lama chêt lâk mai chîng an ni ve lem lo hlauh bawk a, kan va hahdam phah êm! Kan tlin tâwk tûra ruahmanna ṭha zâwk te min sawi hmuh a. Tunah chuan kan fel fai leh ta duak niin ka hria (phun rûkna an lo nei reng em tih lam erawh chu ka hre pha hauh lo mai a, harsatna kan lo siam a nih chuan kan bengvar tâwk lo ṭhin êm mai a, puitling taka min hriattir hreh loh hram ka beisei).
Ṭhenawmte nêna boruak ṭha lo neih hi rin aiin a lo hrehawm hma duh khawp mai. Ram neih chin a zim tawh nâk alai hian, ṭhenawmte nêna innghirnghona hian khawsak a tichêp lehzual duh khawp mai.
Puitling taka sawiho tûr hian, a sawi hun chhung aiin kan mizia azir hian huaisenna sawmkhawm chhung hi a hautak lai a ni ve a. Tihpuitlin theih hram erawh chuan ṭhenawmte nêna inzawmna thûk zâwk leh tlo zâwk neih theihna a nih piah lamah, chhungkaw thar neih belhna chi khat hi a ni hial ta ve ang.
Chhiat ṭhat tâwk thei vek kan nihna zawnah lek phei chuan boruak muanawm tak neih hi a va thlamuanthlâk teh lul êm! Lam hlaa chhungte aia ṭhenawmte hlutna nêp hauh lo hi hmuh hmaih phal chi a ni lo.
Tin, ṭhenawmte pawh hi famkim bîk hek suh i, harsatna min siamsak châng a awm ve bawk a. He'ng hunah tak te hian alawm an laka ka beisei ang chiah khân zaidawh taka harsatna min siamsak chungchang pawh sawipui tûra pan hmasak nachâng ka hriat phah tâk! Ṭhenawm te do ai chuan khaw sarih do chu a lo thlanawm zâwk tlat a ni.
Zah ṭut ṭut aia zah loh theih hram hram sâwt lai berte zinga mi a ni hial ang.
- Samuel Dinté, Chennai