HUN KAN VA'N NEI TA LO EM!

Mexican-ho angin kum khat chhungin darkar 2,264 vel hna thawkin kan buai ta ve nge ni? Tih tur engpawh min han pe se la. Tih loh nan, chhuanlamah "Hun ka nei lo" tih hi sawi tam ber pawl a ni. "Eng thil atan pawh hun hi i hmu ngai lo vang. Hun i duh chuan insiam chawp mai la," tia Charles Buxton-an a lo sawi hi a dik ril viau a ni. Hun ka nei lo tih hi chhuanlam remchang tak pawh a ni tel bawk e. Ni tin hun inang vek darkar 23, minute 56 leh second 4.2 ṭheuh kan nei a. Hun reng reng nei lo hian hun kan khawhral mek vek zawng a nih hmel hi.

Chhungkuaa inkawmhona hun pawh nei lovin, fate thu ṭha hrilhna hun pawh nei lovin, chhungkaw infiamhona hun pawh nei lovin, nupa inkawmna hun pawh nei lovin, khawtlang leh Kohhranah kan inhmang a. Committee leh sub-committee eng emaw zatah kan tel a. A phusa leh thu nei tam ber nih kan tum vek bawk si. Lan sarh loh chu thiang lovah kan ngai a, chumi tur chuan HUN tam tak pawn lamah kan hmang ta a. Chhungkua hi Vanram tem lawkna a ni tih kan hre duh lova, chhungkua hian khawtlang leh kohhran ṭha a siam a ni tih kan hriat fo pawh kan dah ṭha reng hrih a. Chhungkaw tan hun kan va nei ta lo em!

Kohhran leh a chhunga pawl chaknan tiin zan tin deuhthaw kal chhuah a ngai a, kan eizawnna hnathawh zat deuhthaw hnatlang kan thawk chhuak a. Sum tuak reng rengin kan hmanhlel a, sum pathian lo turin kan inhrilh dap dap reng lawi a! Bible thu hrilhfiahin, zawm tur ṭha ṭha kan chang thlan a, zawma thil ṭha ti turin hun kan nei thei der si lo. Kan thuhrilte kan nunpui hmain programme dangah hun kan pek leh a ngai a, mi entawn tura kan nun hmain Thupui dang hmanga sermon thlak a lo ngai leh ṭhin bawk nen. Kohhran leh Pathian thu zirna hun chu mahni insawi fihlimna hun leh hmun emaw kan ti ta ber a. Hming hmer si loa ṭhenawm leh kan mi ngei deuhte hmer telna hun remchangah kan hmang emaw tih turin, mi dang kheng tel thei tur Bible chang kan thlang a, kan sawi zau nek bawk a. Kei Biak inah ka inkhawm a, khaw nge ka chhungte an awm mek?

Thlarau leh Taksa tan pawh a aia ṭha awm chuang lo Kohhran zirtirna dah hmasa ber chung hian, chhungkua leh khawtlang tan hun ṭha nei thei ila, a va ṭha dawn em! Mimal thil tihtur kan chhuanlam a, emergency chu kan chhuanlam ṭha ber a ni a. Kohhran thil pawimawh ruahman tel hman si lo hian mu chungin kan mobile phone siamtu company hi khawi rama mi nge tih leh, a dinchhuaktu pawh kan hriat si lohah hian games changkang ber ber kan khel thei a, WhatsApp leh fb-a kan status (dinhmun) tharlam tarlan rawn comment-tute erawh kan reply zung zung hman a. Ṭha min lo ti a, min lo fak dertute hnenah chhanletna ‘Thnks’ tih kan pek thlak zar zar zel laiin, A malsawmna kartluan maia kan dawn avanga lawmthu hrilhte chu kan hman leh mang si lo. Chawlhni chu mitthi ral hun emaw kan ti tawh a, kohhran inkhawm kan hnuchhawn vawng vawng ta zel mai a nih hi.

Piancham leh zirlai pass lawm, champhaphak lawmnate chuan kan chawlhni serh hi a tidal zo niin a lang a. Chatuan hmun thlenga min hruai thei tur Kohhran tan hun kan van nei ta lo em. Nu leh paten ti tura min tih pawh ngaithla ṭha hman lo hian, Korean incheina erawh uluk takin kan bih hman thung tlat. Nu leh pate thu zawm loh aiin Serial Film bung tin mai hmaih chu har kan ti. Pasalṭha thawnthu te pawh a ni ang.

Chhungte'na thu ṭha min hrilh 'like' har kan tih laiin, ṭhiante thlalak upload erawh 'like' kan phurin kan rang em em tho a. Nu leh pate thu aiin 'likers' eng zat nge ka neih tawh tihin kan rilru a luah hnem a. Mi kutzungpui den tam nih chu ṭha ta viaua inngai kan awm lehzel nen. Nu leh pa, unaute aiin ṭhenrualteah hun kan pe tam ta zawk a, ka bawrhsawm nia chaw nem min rawtsak tur, ka thih hun pawha ka ruang dahna khum tlang vuana mittui luang hru seng lo khawp tur, laktlak loh ka nih hnu pawha min hmangaih leh tho tur reng reng ka awm tawh lo tih hre reng chung pawh a, min thlakhlelhna la tilang fan fan tur ka nu leh pa, ka unaute leh chhungkhatte tan hian hun hi kan van nei ta lo em!

Fate lehkha zir vil hman si lo hian hnam dang film, Mizo ṭawnga lehlin erawh episode zawng zawng hmaih lovin kan en kim biai thei lawi bawk si (vai ṭawng erawh kawi khat pawh kan hre leh der si lo). Chawlhnia fate inkhawm tur huikhawm nan hun kan nei lo va, mi dangte tana malsawm nun an neih loh aiin an thawhlawm neih loh kan hlau a. Mi in hnuai leh kawmkara lehkhaden nan erawh hun thawl kan insiam thei thung. Fate zirna senso tuak thei loin ni tin kan buai lutuk a, thawmhnaw thar man tuak tur erawhin kan pawh pen theih reng si. Fate hriselna aiin Chawlhni thawmhnaw kan dah pawimawh a, fairel bel aiin pheikhawk thar. Fate zirlai enpui aiin khawtlang thil leh meeting neih turin kan rilru a kap a. Nakin maia chhungkaw enkawltu ni tur kan fate tan hian hun kan van nei ta lo em!

Khawtlang emaw, pawl hminga inhmuhkhawm kan neihin a hun taka kal turin hun kan nei lo va. Bang tlai turin hun lah kan nei leh chuang si lo. A hman har apiang hi haw hma duh kan la nih hmel zel si. "Minute 1-a tlai aiin darkar 3-a hma a ṭha zawk e," tia William Shakespeare-a ten an lo aupui kha kan nunpui lo hle niin a lang e. Mahni hna thawh dawna varṭiana thawk chhuak thei kha, hnatlangah erawh dar 10 pawh hma kan ti lutuk. Thim thlenga mahni hna thawk thei khan hnatlangah tlai dar 3 chu tlai tawh lutuk kan ti bawk si nen. Mercury planet-a ni 1 rei zawng hi kan kum 2 tluk hial a ni a. Mercury-ah pawh chuan khawsain, ni 365 vel chu kum 1-ah pawh nei ta ila, 'Hun' hi kan la nei chuang dawn em ni? Hun hi kan van nei ta lo!

Chutichuan, thufing pakhatin, "Thing phun nana hun ṭha ber chu tun aṭanga kum 20 ral ta kha a ni. A dawttu chu TUN hi a ni," tia a lo sawi ang hian, HUN kal tawh chu liam se la. Tun aṭang hian Hun chu insiam ṭan teh ang u. Sam 90:12 ah Mosia ṭawngṭaina chuan, "Kan dam chhung nite chhiar dan tur min zirtir ang che, Finna thinlung kan neih phah hialna turin," a tih lawm lawm kha. Kan Pu Mosia-a ang hian hun chhiar dan kan thiam theih nan inzir ang u. Finna kan neih phah hialna turin.

- Marcelus-a