KṬP Inkhawmpui Lian Vawi 18 Ka Kal Ve Ta

Ni 29.2.2024 Ningani zan aṭanga ni 3.3.2024 Pathianni zan hmang a neih, Mizorama Kohhran ṭhalai Inkhawmpui lian ber KṬP INKHAWMPUI LIAN vawi 60-na, Ngopa khuaa neih chu harsatna em em awm lovin engkim ti thei kan Pathian hruaina leh awmpuina azarah, tluang taka neih zawh a lo ni leh ta hi a lawmawm tak zet a ni.

He KṬP INKHAWMPUI LIAN neih zawh takah khan KṬP Inkhawmpui lian thupui atan MI DANG TE TANA MALSAWMNA tih a ni a, KṬP Inkhawmpui lian Speaker atana hman chu Rev.Dr.H.Vanlalruata niin; ani hian ṭum thum KṬP Inkhawmpui lian thupui hi a sawi a ni.

KṬP Inkhawmpui lian Ngopa khuaa neih zawh tak kha KṬP Inkhawmpui lian neih tawhah chuan an kal tam ber ṭum niin an sawi a, hei hi a chhan nia lang chu kum 60 a tlinna chiah niin, kum 60 a tlin pual hian ni 2.3.2024 Inrinni zan Pathian Biak Inkhawm ban khan Concert buatsaih niin, Pastor bial ṭhenkhat aṭang leh Mizorama zaithiam lar kan neih ṭhenkhatten he hunah hian zaia rawngbawlna hun hlimawm tak hman a ni.

Kum 1997-a KṬP Inkhawmpui lian Ratu khuaa an neih khan KṬP Inkhawmpui lian hi ka kal ve ṭan a, hemi aṭang hian tun thleng hian KṬP Inkhawmpui lian hi kum avanga KTP ka chhuahsan thlengin ka kal ve ta char char a, tun ṭum kha vawi 18 KṬP Inkhawmpui lian ka kalna chiah a lo ni ve ta hi Pathian min hruaina leh min awmpuinaah lawmthu ka sawi a ni.

Ngopa khuaah hian kum 1947 khan ka pu Rev. Siamhnuna (L) hi Presbyterian Ngopa Pastor Bialah khian Bialtu Pastor hmasa ber niin, hun rei tak he Prebyterian Ngopa Pastor Bial hi a lo vawng tawh bawk a ni.

KṬP Inkhawmpui lian kal tam ber an chhinchhiah dan chuan Pu Ngokama hi KṬP Inkhawmpui lian kal tam ber niin an sawi a, Pu Lalsangzuala Sailo, Vaivakawn hi kal tam zingah chuan chhinchhiah tur zingah a tel pha awm e. Pu Lalsangzuala Sailo hi Ngopa khuaa neih zawh tak kha vawi 37 a kalna chiah niin, Pu Ngokama leh Pu Lalsangzuala Sailo te hi chawimawi an phu mai bakah, fak an phuin KṬP Member-te hian KṬP Inkhawmpui lian kal chungchangah entawn tur leh ṭan lakna tur tam tak an nei awm e.

- George L.Ralte, Vaivakawn