ISAIA 43. 20–21 LEH CHIEF MINISTER

Pathian hmangaihna hi mi zawng zawng huap zo ni mai lovin, thil siam zawng zawng huapzo a ni tih lanna hi Pathian lehkhabu thianghlim bung leh changah hian hmuh tur a tam hle a ni; dik tak chuan, mihringte leh nungchate hi Lalpa'n a hmangaih kawp a ni tih hi Genesis 1-na maiah pawh hian a chuang a ni. "...Tichuan, Pathianin tuipuia sa lian pui puite a siam a, thil nung che thei tinreng, tuiin a chhuah ṭheuhte chu, anmahni chi awm dan tur ṭheuhvin a siam bawk a, sava thla nei tinreng pawh anmahni chi awm dan tur ang ṭheuhvin a siam bawk a (Ch. 21); tin, Pathianin chu chu a en a, ṭha a ti hle a. Tin, Pathianin, "Chi tam tak thlahin lo pung ula...savate pawh leiah pung rawh se," tiin kan hmu bawk a ni. Bible hmun dang chu sawi loh, heta ṭang pawh hian kan biak Pathian hian mihring chauh ni lo, nungcha chi tinreng puntir zel chu a tum a ni tih a chiang hle mai. Thuthlung Thar lamah pawh, "Khawvel zawng zawngah kal ula, thil siam zawng zawng hnenah chuan Chanchin Ṭha hi hril rawh u," (Marka 16:15) tiin a thil siam humhalh nana ringtute hnena a thupek (order) kan hmu a ni.

Pathianin nungchate leh mihringte a siam hi ṭha a ti hle a, a lawmpui hle bawk niin a lang; chutih laiin a thil siamte pawh hian Amah (siamtu) ropuizia an ti lang a, amah chawimawi turin a phût bawk a ni. Kan Pathian thu kalhmang han chhui aṭanga lang ta chu – nungcha leh thil siam dangte hmangaihna kawngah hian Mizote kan pianthar a, kan ṭhan harh a ngai hle tih hi. Bible-a Pathianin thil siam dangte a duatzia leh thil siam dangte laka keini Zofate rilru put dan tlangpui han ngaihtuah hi chuan, nungchate laka kan riltu put dan kan thlak a nih si loh chuan, mi tam ber piantharna pawh hi nungchate leh thil siam dangte hmangaihna tel lo piantharna, piantharna khingbai niin a lang thei ta a ni.

Pu Ṭhena Chief Minister lai khan silai lisence hi pek chhuah ṭhin a ni tho nain a khuahkhirh ṭha khawp mai niin an sawi; silai lisence dilte hnenah, "Licence kan phalrai lutuk chuan nangmahni leh nangmahni, ṭhian leh ṭhian in inkap palh fo ang," tih ang tluk hian a hrilh ṭhin a ni àwm e. Brig. T.Sailo thih hnua silaia inràl palh an tam tawhzia ngaihtuah hi chuan, a thil sawi lawk kha a lo dik ngawt mai; silai lisence pek chungchanga an policy kha a lo ṭha hle mai; mihring nun hi a hlu em em mai si a, silai a tlem chuan inhmuh sakhi avanga ṭhiante inkah palh a vang nge nge ang chu.

Eng pawh ni se, Brig T. Sailo hunlai kha chu kan chunga Sawrkar laipui thu neih leh zual hun lai, UT kan nih lai kha a ni a, ram buai lai a niin, tuboh leh dolung inkara awm; bakah amah khan kum 6 emaw vel chauh kha CM hna a chelh bawk nen, thil tam tak leh ropui tak hlen chhuak hman tura beisei kha a ni lo hrim hrim a, hmasawnna lam hawi tak tak kan sawi reng reng chuan, Mizoramin State (see status, powers, rel., etc. of the Units with the Centre, etc ) lei rem rah hnu kum 35 chhung, development chikim thawtháng thlentir theihna hun ṭha hi kan en ber tur a ni ang, Dist. Council nih lai emaw UT hun lai emaw ni lovin.

State kan nih hnu hian, mihring (Zofate) dam reina, hriselna lam leh a kaihhnawih–nungcha, thing leh mau, boruak thianghlim leh kan chhehvel thil (environment), Pathianin a siam chhan ngaihtuah phak leh hemi kawnga Pathian rilru ṭawmpui phak leh, tihtakzeta Pathian hna thawhpui ram hruaitu politician lian piangthar awm chhun chu - tuna kan Chief Minister Pu Lalduhoma hi a la ni mai ang em? Hun a awm phawt hi chuan a thusawi apiang hian a hmangaih Zofate chu Pathianin ami Israelte khawi zu leh hnute tui luanna rama chèntir a tiam angin, hmasawnna chikim awmna ram nuam min thlentir turin a ngaihtuahna sawr bingin a sawi chhuak ṭhin a, kan lo hrisela kan lo dam rei theihna tur thlenga a ngaihtuah phak hi a ropui ngawt mai.

Isaia 43:20-ah hian LALPAN, " Ka mi, ka thlante, mi fakna tilangtu tura ka tana ka mi siamte chu in tùr ka pêk theih nan, thlalêrah chuan tuite ka awmtír avang leh, ram rovah chuan luite ka awmtir avàngin ramsate pawhin mi cháwimáwi ang; sihalte, savate, sanghawngseite lamin," tiin a sawi a. Kan Pathian lehkhabua Zawlnei Isaia ziah bung 43: 20-21 hi a tawi thei ang bera sawi chuan: Pathian mite chu kal chhuahna (EXODUS) ropui zawkin a hmuah reng thu sawina a ni a (cf Rom 8. 20-21), Pathian thil tum bulpui ber chu a miten Amah fakna an puan chhuah theih hi a ni.

Tichuan kan Sawrkar, Upa Dr Lalduhoma kaihhruai hmangin LALPA Pathian chuan Thuthlung Thar Israel Zo fate chu ram ṭha leh zual panin min hruai mêk a, he kan kal kawngah hian, "RAMSATE PAWHIN MI CHAWIMAWI ANG," tia Pathianin a sawi ang thlentir tur hian sawrkar a che chhuak mek niin a lang a (Pathianin a sawi angin, amah chawimawi tham emaw Pathian ropuina tar lang tham khawp emawa tam ramsate Mizoramah an awm tawh lo a nih phei chuan, Mizo Kristiante hian hemi kawngah hian thil kan lo ti sual nasa hle tawh tihna a ni ang a, Pathian hnenah thinlung keha/inchhira tihtakzeta ngaihdam kan dil a ngai ang), chumi thlen dik nan chuan mi tin kan pawimawh a – nungcha/ramsa zawng zawngte chu Pathian chawimawitu an nih anga zalen taka an zia an chhuah a, an lo pun zel theih nan, Pathian thu leh dan awih/zàwmin leh kan Sawrkar ṭawi zêlin, nungcha humhalhna leh hmangaihna kawngah kan zain hma lam i pan zel ang u.

- Dr J.T.Vanlalngheta.