Kangmei a chhuak ṭan leh ta

Mizoramah khua a ro ṭan a, Lo hàl a hnai bawk nen; kangmei chhuah theih hunlai a ni leh ta a, mi tin kan fimkhur viau a ngaih hun a ni. Kangmei chhuak hian engmah hlawkna a nei lo a, a lo thlawna bungrua leh ram chànna mai a ni.

Ram kang avangin kum tin kan thing leh mau a kang chhe duai duai a, mihring nunna hial chan pawh an awm ṭhin. Lo leh huan hal vanga kangmei chhuak hi a awm fo a, heng lakah hian kan fimkhur a ngai a, thli a thàwt nasat phei chuan mei kawng sialin awmzia a neih loh chang a tam hle. Chu chuan thing leh mau hmun ṭha tak tak a kang ral a, a uiawm ṭhin hle.

In kang mawlh mai hi a pawi mai bakah nunna channa a awm duh bik lehnghal a, bungrua man tam tak tak an inlei khawl vete pawh minute hnih khat lekah vaivutah a chang ta ṭhin a, a uiawm ṭhin hle. In kang hi a tam ber chu fimkhur loh vang a ni fo. Electric wiring dik tawk lo te, power & electricity department-in a him tawk e, an tih hnuah wiring tih belh leh vangtea kangmei chhuak a tam mai.

Mizo chu ngaihsam em em hnam kan ni a, ar note te an lei a, electric hmangin an up lum fo ṭhin a; hengte hi a him ṭha lo fo. An fimkhur loh vangin kangmei a chhuak ṭhin a, anmahni chauhin an tawrh loh chang a awm. Ṭhenawm hnaivai thlengin kangmei hian a khuh ṭhin chang a awm fo. Mi fimkhur loh zar ṭhenawmten an tuar chawk ṭhin. Kangmei chhuak a, mahni in a kan ngat phei chuan awmze awm tawh loh hnuah an zak leh ṭhin si a.

Kangmei chhuak ṭhenkhat chu an mei chhem aṭang a nih duh viau. Mei an chhem a, a ṭhenin an inkhawmsan a, a ṭhenin an mutsan mai mai vanga mahni neih zawng zawng chan ta pawh an awm fo reng hi.

Chuvangin kangmei chhuak hi a tuartu tan a pawiin a zahthlak em em ṭhin a, chutiang lakah pumpelh nan chuan mi tin fimkhur hi a ni mai. Kan fimkhur loh zar kan zo duh viau. In hlui tawh lam leh assam type in phei chuan fimkhur lehzual a ngai hle. Heng bakah hian petrol leh oil zuarte hian kangmei an chhuah duh viau. Oil depot loa black-a oil zawrh hi dan kalh a ni tih hre nawn fo bawk teh ang u.

-Lal Rinmawia