Kawngpui dim lo chu mimawl

State puitling kan nih hnuah kawng hrang hrangin hma-sawnna a zung mek zel a, thingtkang khawkar inkal pawhna kawng neihah te, building sak danah te, a huhoa kan khawsak phungah te, midang ngaihchang thiam kawngah te, khawpui chhung kawngpui neih ṭhatah te leh thil dang tam tak hma kan sawn viau tawh a ni.

Tun hma kum 20 vel kal ta kha han chhut kir ta ila. District capital ho chu sawi loh Aizawl khawpuiah pawh kawngpuia ball pet tawk hmuh tur an awm fo a, kawng sirah basketball board phuna inkhelh pawh hmuh tur an awm fo a. Tunah chuan field khu leh diak tak taka inkhel ṭhin Mizo ṭha-laite pawh grass-ah ngat kan inkhel tawh nia! Kan hriat loh hlan hian hmasawnna chu a lo zuang ve viau asin!

Hetiang hi kan dinhmun a ni tawh a, zu rui intibuai hmuh tur pawh an awm ta meuh lo a nih hi. Mahse, hmasawnna tam tak kan nei kan tih tawh hnu hian ṭhalaite leh naupangte lam ni lo nu leh pate lam hian vantlang kawngpui kan enkawl danah hian hmasawnna tur kan la ngah khawp mai.

Tui connection pipe phum tur apiang-in kawngpui kan lai chhia a, kan duh tawka kan laih chhiat a, pipe kan phun tawh chuan kan kawngpui laih chhiat enkawl zui tum lo mi tam tak kan awm. Pipe an phum hnuah tlema pawng deuhin an hnawh khat ve leh mai a, an duh tawk viau zel. A hnu thla hnih thum velah chuan an haivurna pawng hi a khuar ta
ṭhin a, lirthei tichhetu a ni a, kawngpui chhiat ṭanna hmunah a chang bawk ṭhin.

Tichuan, rod, balu, rawra leh cubic unload nan loh theih lohna avangin kawngpui kan hmang a, uluk leh dim thiam taka hman zawh hnuah fai taka kalsan tur a ni. Balu nal leh rod chhut ngilna khuar te, cubic leh gas dah thlakna khuar te hian kawngpui a tichhe fo mai.

Hetiang vantlang thil leh kawngpui hmanga enkawl zui leh duh si lote hi misual an ni. Sorkar leh vantlang thil dim miah loa hmang ṭhinte hi khua leh tui ṭha an ni ngai lo.

Nang leh i chhungte kha eng ang mi nge in nih ve le?

- Ramhmangaiha