Mang tiang tleirawl chhuak thar

Tlemlai deuh khan Vanglaini lamah 'Mal man nei lo' tih kha ka lo chhiar ve tawh a, ka tui hnih loh chuan ka chaw ei pawh a tui tawh nek lo, tlema zilh deuh an ngai a ni.

Mizo nula chuan puan an bih ṭhin a, chumi kara an mal te chin vel lo lang zauh pawh chu Mizo tlangval tan chuan hmuh nuam, itawm leh sawi zui luai luai tham a tling ṭhin kha a ni ngai. Kha kha 1990's thleng kha chuan kan awm dan a la niin ka hria a, tunlai chhuan thar hi chuan an mal hi mi hmuh loh an hlau a, chu chu changkang an ti.

Kei hi ka ngaih-tuahna a hlui deuh bik a nih pawhin tunlaia ngaihtuahna thar leh changkang ai chuan hnam tan a ṭha zawka ka ngaih avangin tim eih lovin ka sawi bawrh bawrh mai dawn a, "a hua hua chu in ni mai e" an tih ang kha a hawtute chan tur chu a ni.

Camera lian leh man to nei tlangval tan nula hruai chhuah a harsa lo an ti. Hmanah khan "bike chhuak tharin nula a chhawm" an ti a, tunah chuan a ni tawh hauh lo, "Camera lianin nula a chhawm, an mal pawh a chhawm tel," tih chin hi ziak ila, a bak hi chu ka ziak lo vang a, lo dawn chhunzawm mai ta che u.

In pian a nalh hle a, a chhuanawm a nih chuan Miss India nih tum law law ula, in duh leh eizawnnaa hmang turin modelling luhchilh ula pawisa awmna Vairam khaw-pui liante thleng ula. Facebook vela tawp mai tura inhlim chhin hi sim ula, photographer mit lerh tak takte pawh hian in nula mal pholan hi an request ngawih ngawih che u nge in sawm chhuaka in va dil tihte hi kan hre chak asin.

Kan Mizo tlang-valin kan Mizo nulate mal bawr vel pholan an chak tlata thla an la nge, kan nualte hian an mal tihlan an chak vangin tlangval camera lian neiho an va sawm chhuak nge, an inthurual nge, kan zavai mai hian lansarh duh luatah kan zahawmna kan hralh zo ta nge, eng nge kan nih ka hre ve thiam lo kei mifing nia inngai ṭhin Arsenal
ṭantu ruhkawl hi!

Nu leh pate lamah
ṭuan mai ila, i fanu khan facebook-ah a mal a hlim thui viau chuan, hlauthawng ru rawh, Tunge thla laksak? Eng ang dinhmunah nge thla an inlaksak? Tu-in nge hruai kual a, tunge thlah? Zanah nge chhunah? hmun fianrialah em ni?

Heng zawhna hi i fanu kha zawt la, a chhang duh kher lo ang che. Mi hmuha lansarh leh nalh an duh luatah mualphona mai a nih ka hlauhpui thu hi sawi lo thei ka ni bik lo.

- Mama Ralte