College Principal Chungchang
India ram chhunga university leh college zawng zawngte hi UGC hnuaia in-afiliate vek an ni a. UGC guideline ang chuan lndia rama college zawng zawnga principal te hi doctorate PhD degree nei vek tura tih an ni a. Cadre hran niin principal tur chuan PhD degree nei chin Associate professor leh a chung lamte MPSC kaltlanga inteview-a a hrana lak tur an ni. UGC dan kan hman laiah chuan kum 5 atan mah se, kum 5 dana a hranpaa interview leha lak nawn theih an ni bawk.
UGC guideline anga college principal a ngheta neih hian college a tizahawm chang ni loin, zirna atana thil ṭha, zirtirtu college-a thawkte tan incentive ni bawk a ni.
Tuna kan kal danah hi chuan college principal tu emaw kha lo pension ta se, seniority in qualified lo senior pakhat khan charge a la mai ṭhin a, MA pangngaiin, a hnuaiah PhD degree nei principal atana UGC duh dana qualify eng emaw zat chungah khan a awm mai ṭhin a, hei hi thil fel lo tak a ni.
Tun dinhmunah hian Pachhunga College tih loh, Mizorama college zawng zawng zingah hian Zawlnuam, Siaha, J Thankima, Zirtiri College, Aizawl North College te tih loh chuan principal nghet an nei lo vek. Hei hi a chhan nia an sawi pakhat chu, MPSC, sorkarin advertisement-a principal a lak dawn chuan hnam dang (vai a bikin) te lo luhna kawngka a inhawng ang tih hlauh vang an ti a. Hei hi kum li nga kal ta kha chuan a dikna chen a awm mai thei, mahse, tunah hian college teachers te UGC duh dana principal nghet tura qualify; Mizo ṭhangthar ṭha leh thiam tak tak tam tak an awm tawh a ni.
Hnam dangin dil ve pawh ni se advertisement an tih chuan, interview kaltlanga lak tur a nih vangin sorkarin leilung fate duhsakin a tih dan a awm a ni; State danga an tih fo ṭhin angin. Mizorama college ṭhenkhatte NAAC accreditation-a grade an hmuh ṭhat theih lohna chhan pakhat pawh qualified lo principal-in college an enkawl ṭhin vang a ni pakhat. Kal phung thar sorkar kan neih hian, ngun taka ngaihtuahin hei hi ngai pawimawh se a ṭha hle mai. Tuna kan higher education minister hi doctorate degree nei ngat a ni a, a lakah beiseina sang tak mipui leh college teachers PhD degree neiten an nei a ni.
- Sailoa