'Save The Riparian' Eng Nge?

Ruah a han sur ham ham hian Aizawl khaw chhung kawrahte bawlhhlawh a lo chhuak hum hum ṭhin; chu'ngte chu lui téah a luangkhawm a, lui téa bawlhhlawhte chu luipuiah a luang lut leh ta ṭhin a, chu lui tui chu Aizawlah pump chhoin kan tui tlan ber a lo ni leh ta a ni. Kan tuikhur hnarah bawlhhlawh kan paih tluk tluk hlawm mai a nih hi maw!

Motor aṭanga kawngpuia bawlhhlawh chi hrang hrang – bottle leh sarang vel paih chhuak nawlh nawlh ka hmu fo a, hrem theih an ni tih lam ai mahin, hetianga ngaihtuah thui lem lo kan la tam hi a bulthuma nunphung inzirtir ngaihna stage-ah hian, eng chen nge kan la awm ngai ang aw ka ti rilru ṭhin.

Hmanniah khawpui kawr ṭawp lutuk leh kan tui tlan ber luipuia bawlhhlawh nasa lutuk veia hmalak tum hruaitute ka hmu fuh hlauh mai a, Aizawla chengte'n a hmun loa bawlhhlawh kan paih nasa lutuk hian natna chi hrang hrang a thlen hnem a, eco system a tibuai a, rulte pawh khawpui chhungah a tam phah a ni an ti. Hma lak an tum a, min lo sawm ve a, an pawl hming chu 'Save the Riparian' tih a ni.

Riparian chu eng nge maw ni le? Lui kam tihna a lo ni a, kan lui kamte i chhanchhuak ang u tihna a ni.

AMC pawhin ni tin motor 150-in bawlhhlawh a khawn kual a, ina khawnna veng pawh veng 19 lai a awm tawh a, mite bawlhhlawh paihna ṭhinte a hung a, tunah pawh luia bawlhhlawh luang thla dankhawmna 'waste trap' siam a tum leh mek, a hmun loa paih rute pawh man an ni nual tawh a ni.

Hma latu awm reng mah se a paihtu lamin kan tlin ngar ngar a ni. A paihtu lam hian paih lo ila, mahni chenna khuaa a hmun loa bawlhhlawh paih chu mahni in chhunga bawlhhlawh paih ang kan ni, a tuartu chu keimahni kan ni, vai ngal ria hoin an tuar hmasa lem lo tih hria ila.

Save the Riparian pawh hian luikawr an tifai reng hman dawn lo. A paihtu lamte rilruah kan bawlhhlawh paihte hi kan tui tlanah a lut zel tih tlangau an tumna a ni. Ka lo veipuiin ka lo campaign-pui lawk a ni e.

- Laltlanzova Khiangte