ṬANRUAL vs INPAIHTHLAK

Tunlai Zoram titi lian ber chu MNF MLA 12 ten Pu Lalduhawma MLA a tanga paih thlak tuma an beihna hi a ni awm e. Hetiang thil duhawm lo tak, Zoram Histry a chuang atana itawm lo mahse chuang kumkhua tawh tur si Zoram Kristian state-ah a thleng ta mai hi a pawi hle mai. 

A hming tumtute zinga pathum chu Kohhran Upa niin midang te pawh mifel rawmngbawltu ṭha tak takte an ni an ti. A dik turah ngai phawt teh ang. Hetiang thil lian tham leh duhawm lo, thilpawi tak thlen thei thil hi Party High power remtihna lo chuan tih ngam chi a nih loh a vangin 'Tirtu, fuihtu, tihtirtu' an awm tih hi hriain an ni hi dem ngawt lovin, hetiang thil tih hi a hun em, a hlawk ang em, nghawng ṭha lo a nei ang em? tih hi i lo thlir teh  ang. 

1. A HUN RENG EM?: Khawvel leh kan Zoramin kan ngam loh Hripui hmachhawnin kan buai em em a. Theihtawp chhuaha dana kan daitheu su pawp a, min chenchilh rup lai leh kan hma hun thim su eng tura ṭanrual a ṭul emem laiin ṭanrual chu sawi loh, a in pir darh zawnga hma lo lak hi a hun lo hlein a lang. 

Israel khua leh tui terrorist-ten an highjack khan an ram hruaitute chuan Opposition leader telna committee sang dinin hmalak dan tur  an rel a, khawvel hriat tham chhan chhuahna ropui an thlen tir ta a nih kha. 

Hripui dotu committee sangah te hian teltir vein (tun hnaiah khan an teltir ve a ni em aw…) an bungraw lei te pawh hmang ṭangkaia inlungrual taka hripui hi kan dotlan a hun hle mai. Ṭanpui tlak leh malsawm tlaka rorelin hma la ila, Hripui chunga thuneitu Pathian chuan he Kristian state-ah hian thilmak leh danglam tak a thlentir ang a miten kan Pathian thiltihtheihzia hi an hmu dawn asin.

2. A CHHAN LEH VANG  DANG A AWM EM?: 2018 MLA election-ah khan Pu Zira leh Pu Rina’n INC chhuahsan a MNF an zawm avangin Congress kulhpui chu chimin MNF chuan hnehna ropui tak an chan phah a. Tunah hian Pu Zira leh Pu Rina pawh dinhmun sang tak pek an ni. He an dawhkan hian MLA nihna nei lote mit a ti mim ta em ni ang le? 

Congress leh PC thawh­dun ṭuma PC Minister-te kum hnih pawh a vei hmaa chhan leh vang ṭha awm lova an paihthla ang kha chu tunlai khawvel hun hmawrah hi chuan thleng tawh lo hram  se. Pu Rinliana pawh hian a chanvo leh dinhmun aiin dikna dah lalin rorel ngam rawh se! Chutiang mi chu kan ram hian a mamawh tawh a ni. 

3. PU DUHAWMA TEH­RENG PAWH HI:  State puitling kan nih kum 33 chhung hian kan ram hian hruaitu  pahnih chauh kan nei, chumite chuan  tun dinhmun hi min thlenpui chu a ni a. Anni pahnih thlaktu tur hi mipuite hian kan mamawh a, kan Pathian pawhin chher chhuah a tum mek laiin Pu Duhawma hian a chunga thilthleng a hmachhawn danah “MLA aṭanga suspend ka nih chuan Court-ah ka khing ang” a tih ṭawngkam  han thlir hian midangte ai hian a danglam chuang lo tlat. 

Hmui ringawta Pathian ṭih ni lo, mahni awmdan tur pawh Lalpa chunga nghat ngam, Daniala te ṭhian ho anga Lalpa chinfel atana taksa hlan ngam, Josefa te anga Pathian hnathawh nghak chhuak ngam hruaitu Zoram hian a mamawh a ni. 

Pathian ṭih tak takte tan lo chuan kan ram  tluchhe mek hi tun din theih a ni lo. Nitis Kumar-a, Lalu-a hote puihnaa Bihar CM a nih lai khan Lalua hote khan chhan ṭha pawh awm loa kheuh beuh an siam khan Nitis Kumar khan tlak hlauin ṭan a khawh lo; a tla ta ngeia mahse reiloteah ngelnghet zawkin a CM leh mai. Pathian chuan a duh apiang a paihthla a, a duh apiang a tung ding ṭhin. 

4. KOHHRANHO PAWH KAN IN EN A NGAI:  Koh­hran policy lian tak chu Koh­hran siam pun a, rawng­bawlna chanvo siam pun leh a rawngbawltu mihring neih tam a nih avangin Kohhran a pung a, chanvo  leh nihna kan siam pun bakah chanvo nei pawh kan pung a, thilpek pawh nasa takin a pun phah nghe nghe. 

Chawlhnia lehkha deng mai mai ṭhin te, chawlhni chama ram riak, chawlhni a hna thawk ṭhin te, Party leh eng pawl pawl emaw a tui, chawlni ah pawh chulam thila buai ni leng ṭhin te khan Kohhran rawn belin chanvo te an nei a, alawmawm e. Nimahsela thlarau piantharna nei si lo rawngbawltute hi Kohhran tihmelhemtu leh Kohhran a hlo har siamtu an ni zel, miten Kohhrana tel an chak loh phah ṭhin - Lal Isuan “Vanrama lut duh si lo midang lut turte dal tlat si” a tih ang kha. 

Roreltu thuawih hi Pathian thu awihna a ni kan tih rualin roreltute pawh hian Pathian duhdana rorel hi an ba ve ngei  ang, a kawi a ngila kan zawm dawn a nih chuan. 

Hripui hlauh vang te, thawhlawm tlakhniam hlauh vang te, member neih tlem hlauh vang te hian Pathian duhzawng leh Setan a duh zawng kan lo ham pawlh ang a, milem biate nen kan danglam lo a nih chuan a pawi ngawt ang le. Lungrualna hi ram leh hnam tan himna kulhpui nghet a lo ni.