STATE HLIM BER VS MIHLIM STATE

Hmasawn tum lem lo, engthawl hlim a awm a, ãt hlim a awm. Faisa rin tum ngawta khauphar thawven hlim a awm a, fiamthu/ entertainment chawh hlim a awm. Hnathawh avanga hlim a awm a, dikna leh thutak avanga hlimna a awm bawk. 

Kan Bible chuan, Hmangaihna ze dik chu fel lohnaa a lawm loh thu leh 'thu tak' a lawmpui thu a sawi (I Kor 13:16). Johana lehkhathawn III-na, chang 1:4-na chuan, "Ka fate thutakah an awm tih ka hriat aliama lawmna nasa zawk reng ka nei lo ve" a ti bawk. 

Bible hian, lawmna/ hlimna hi thu tak leh dikna nen a sawi zawm ṭhin. Chuti a nih chuan mi tak chu thu tak lo leh dik lovah chuan a hlimin a lawm ve thei lo tihna a ni. 

Zoram dung leh vangah hian ka zin veivak ve fo va, nang pawh i zin fo ang. I zin ṭhinna kawngpui kha han thlir teh; dikna leh thu tak a inphah chhuakin i hmu em le? 

State hlîm ber kawngpuiah hian insawh insawh chungin mihlim lo i lir beuh beuh ṭhin zawk lo maw?  

Thu tak lawmpui ṭhintu nunah hian, thu tak lem lo nena cheng hova, hlimna dawhsana mihlimte chawi tur no mawi ber chawi a, champion auhla han chham chu a inhmeh meuh maw? 

A fate thu taka an awm tih a hriat aliama lawmna nasa zawk hmu lo kha lo nung leh ta se, State hlim ber hnathawhna hmunah leh a tualzâl nunah hian lawmna leh hlimna a hmu nawn awn awn ang emaw chu? 

Chu State hlim ber lawmman chu dawng turin tu nge pen chhuak ngam ta le? Chu chawimawina dawhsana nopui chawi tur chuan inthlahrung lo taka pen chhuak turin tute nge inhmeh ber ang? Chawm bawka hawp bawk te nge thingtlang kut hnathawktute an ipte pui nen ngeiin? 

State hlim berah i cheng tih an puan sak che, i awih lohin awmzia a nei lo. Mihlimte chenna state a ni em? tih erawh i inzawt ru a nih kha. 

"Lalpaah chuan kan lawmin kan hlim ngei reng e, kan hmangaih kan state-ah pawh," kan tih theih zel na'n dikna leh felna hian hmun awh zau zel teh se.