KAN HNEH NGEI ANG

Hmanlai chuan sahrang leh ral hmaa zam ngai lote chu pasalṭha an tih te chu an ni. Vawiin niah erawh chuan theih tawp chhuaha hripui dotute hi kan pasalṭhate chu an ni ta zawk a. Tlawmngaih chhuaha mahni hrehawm pawh pawisa lova huaisen tak leh ṭhahnemngai taka hripui do hna thawktute chu kan hnam pasalṭhate chu an ni. 

Aizawl khawpui chhunga veng lian ber zinga mi Chaltlangah hripui a ṭaidarh tirh khan, an VLTF hruaitu chuan an veng chhun a hri darh chu, ‘Reilote chhungin kan hneh ngei dawn’ a tih ṭawngkam chuan a hria a piang rilru a thlamuan a ni. Tunlai hunah chuan inhnemna ṭawngkam hian hlauhna lakah mite rilru a thlamuan ṭhin. 

Sorkar lam leh tualchhung lam hruaitute chuan ni tin zan tin mipui an thlamuan zo em em a ni. An hnathawh ropui tak te mipuiin kan hriat sak te chu tlem te chauh a ni a, kan hriatpui loh lamah an hun hlu tam tak te, sum leh pai, tha leh tui te an seng nasa em em a ni. Chungte avang chuan hrileng hi tual chhungah engemaw chen chu khuahkhirh theih a la ni hram hram a ni. A ṭhen te chuan an nunna hial an chan phah tawh bawk a ni. Kan ṭhalai  nula leh tlangval ṭhenkhat chu hripui veite enkawl turin anmahni an rawn inpe a, an rawn pen chhuak bawk. 

Heng mi inpete hian midangte him nan an thinlunga an inhuamna te chu a taka tilangin an rawn inpe a, an chungah eng pawh lo thleng dawn mah se chungte chu tawrh huamin an hma a tih tur awm te chu an rawn ti zung zung zel a. Midang tana inpekna thil tih ropui hi kan nunhonaah hian a hlu berin a ropui ber a. A tluk thei tur thil dang a awm ngai lo. 

Mizo nih hi a va lo nuam em! He tlawmngaihna thil tih ropui hi hnam dang zingah a awm ve a rinawm lo. Midangte tan tia thawk zel theitu thinlung chu a mawiin hmuh a va nuam dawn em! Hripui leng avangin mi tam tak harsatna hmun a awm mek te chhanchhuak zelin kil tin aṭangin ṭanpuina a lo luang chhuak zel bawk a. Hripui dona avangin Mizoram dung tluan hi tlawmngaihna par lo vul chhuak chuan a bawh chhuak vek ta mai. 

An thawm ri hriat a nuam a, hmuh an nuam bawk a ni. 

He tlawmngaihna hring­nun mawi tak phut let neihlohna hi hnamdang ten an hriat chian hunah chuan Mizo nih ve an chak ngawt ang. Pasalṭha Taitesena te, Khuangchera te kha rawn tho lehin rawn hmu ve chu nise an zinga tel ve mawlh an chakin a rinawm a ni. 

Nang leh kei hian chu­tiang ang nunze ropui chu kan par chhuah tir ve em tiin inzawh a ṭul ta hle mai. 

Ṭhahnemngai taka hma an lakna chu kan tih­hlawhtlin pui theihna turin mipuiten thupek kan zawm ṭhat tlan a pawimawh a. Thuawihna tel lo chuan eng thil mah a hlawhtling thei lo a. Thupek kan zawm ṭhat hun chuan Mizoram aṭangin hripui hi kan la um bo ngei ang. 

He hripui hian laina, ṭhian ṭha, hmelhriatte a kal kan chuang lova, chuvangin chung te pawh chu kan hel zel a ṭul hrih a ni.