POLICE LEH DRIVER KHA!

In rin loh lam daihah kan kuai her daih teh ang. Police leh Driver buaina avanga dân (law) kan hriat belh pawh a tam ta. Traffic rules leh Police-ina dân bawhchhia a man theih dan hrang hrangte kan hriatzau phah a, kha buaina kha ka tan chuan hlawkna a ni daih mai. IPC section leh CrPC thlengin ka hriat loh tur ṭha ṭha ka hriat belh ṭeuh mai. Ka va vannei tak êm! Buaina karah hlawkna ka lo chhar tlat.

Kha buaina kha ka sawi tum ber a ni lo. Thu kal lam, haw lam ka hre fumfé lo a, ka ngaihtuah êm êm lem lo bawk. Kha buaina aṭanga ka rilrua thil pawimawh tak nia ka hriat lo thleng zàwk chu a chunga ka sawi ang khian, thil tam taka ka hlawkpui karah 'Social Media' chak tawh zia, a thiltihtheih dan, a pawi thui zia leh ṭhenkhat tana a hlut si zia hi uar takin ka sawiah min ngaihsak rawh u. Politics news leh news dang hrim hrim inhriat tawn zung zungna atan pawh a ṭangkai êm mai.

Social Media kan tiha Mizorama kan khawih hnem leh kan hman ṭangkai tlângpui chu Facebook, Whatsapp, Telegram, Instagram, Twitter etc., an ni a, kan vawi khat hmeh zeuh hmanga a ruala mi eng emaw zatin thil an lo hriat a, an hmuh nghal zung zung theihna hmanraw ṭangkai tak a ni. Twitter tak hi chu Mizote hi chuan kan la hmang nasa lo zawk a, network a duh chak avangin a hmang chu mi tlem te chauh an niin ka hria. 

Police leh Driver chungchang kha Social Media chak lutuk tawh avanga punlun hluai ka ti lo thei lo. Tute pawh hi kan fimkhur a ngai em em a, a ṭhenin ṭangkai tak leh sum lakluhna atana an hman laiin, a ṭhen chuan mi pawisawina atan an lo hmang ve mek bawk. A ṭhen tan kan rilrua thu awm, sawi chhuahna platform remchang tak atan kan hmang a. Tin, kan nihna (status) phochhuahna atan kan hmangin, nun tihlimtu pawimawh tak pakhat a ni mek bawk.

Social Media chakzia leh a thil tihtheihzia kan hre chiang ta hlawm bawk a. Thil tam takah dân (law) a awm tih hriain, thiltithei zawk anga inngaite emaw, kan theihna zawna mi dangte hnuaichhiah leh hmuhsit emaw, mi pawisawi theihna kawng hrang hrang laka fimkhur nan hmang thar ila, kan hman dan kan fimkhur viau a ngai tawh tih a lang reng mai. "Miin in chunga an tiha in duh tur ang zelin mi chungah pawh ti ve rawh u," (Luka 6:31) tih ziak ang khan he thu kan hriat nawn lehna remchang lo ni se. Pathianin a duh taka a siam mihringte vek kan nihna inzah tawn sakin, fimkhur takin 'Social Media' hi hmang ang u.