BERAMPU ṬHENKHAT KA LO RALKHAT THLIR VE DAN LEH POLITICIAN-TE

A Ni ka hre mai ta lo a, COVID-19 in hetih teh buaiha min nuai hma lawk khan Chanmari aṭangin Durtlang lam panin Sihphir lam tlan Bus-ah kan chuang a.

Bus-a chuang pah chuan Vanglaini Office-a Pazama'n min pek chu Bus seat hnung ber kila ṭhuin ka hlam deuh duai duai a. Ka ṭhianpa Zara thuziak chu ka chhiar a. Ka bula ṭhu, nula a nih pawhin senior lam a ni ve tawh ang, chumi chuan, "Vanglaini chanchinbua thuziaktu bikho ziah hi ngaihnawm ka ti a; mahse, Pu Chuauṭhuama ziak hi ka chhiar hreh ta tlat. Khawiah emaw ni Synod Inkhawmpui Vawi 93-na neih ṭuma hlachang sawitu chungchang a ziah kha keimah ka ni a, a hnuah Pu Chuauṭhuama thuziak chhiartute'n min hrilh a, ka hlachang sawi aw chu beu leh bengchheng a lo ti viau a ni awm a, khami ṭuma kan Khuangpu lah kha a Khuang vua kha tui lo chunga tui luih chawp tum angah a ngai a, Kohhranin min ruat avanga kan phak leh theihtawk kan tih ve theih chhun a ni mai si a, khatia mi tam tak hmuh leh chhiar tura ani meuhin a ziak an ti hi ka la zak," a ti chhuak phawng mai a.

Ni e, kan Pu, Kohhran leh Pathian rawngbawltu, Berampu, kan Pu Chuauṭhuama hi thuziah kawngah a phur mah mah ve bawk ṭhinin a lang. Mizoram leh hmun hrang hranga Zohnahthlakte leh hnam dangte pawhin a thu leh hla an ngaihhlut, Vanglaini chanchinbu meuha Column hran nei ngata a ziahpui Mafaa chanchin, a boral sarhu laia thudik tâwk lo hmanga a ziahte khan kha mi duhawm tak thu leh hla ngainatute leh a chhungte rilru thuk takin a tina reng a ni. 

Vanglaini ni 3.10.2010 chhuakah khan Pu Chuauṭhuama thuziak 'RAM HRUAITUTE KA LO RALKHAT THLIR VE DAN' tih a ziak ka lo chhiar a. Thuziaktu a ni a, sawitu a ni a, Kohhran rawngbawltu a ni bawk. Heti chung hian mi chhiatna lam kan hriat atana ṭul lo, dik tawk si lo hi duh aiin a ziak taima em ni chu aw, ka ti.

Pu Ṭhenphunga a ni emaw, Pu Lal Thanhawla a ni emaw, Pu Zoramthanga a ni emaw, zah an phu a ni. Duh lai vuak phâi a, duh lai sawi vul ang zawnga ani ang Kohhran rawngbawltuin a ziak phei hi chu ama dinhmun nen pawh a inmil lo. 

Roreltute finchhuah leh rorelna ṭha nei tura mipuite mawhphurhna lam hi Berampu tan chuan ziah leh sawi insum tur pawh a ni chuang law. Amaherawhchu, a bikin Pu Lal Thanhawla chungchang a ziah zinga ram hmasawnna atana thawh hlawk teh chiam lo, hmathlir nei ṭha tawk lo leh thawh dan thiam lo ang zawnga a ziak vak maite kha a fuh lo hlein ka hria.

Isua chanchin pawh chiang taka hriat tum a, mel sang tam tak kal tlanga a hmuna kal chilh a, teh thlap si khan, Mel eng zat mah kal tlang ngai lo, a chenna hmun leh ram Aizawla cheng, a hmuh theih leh hmuh phaka awm Pu Lal Thanhawla Chief Minister-na hnuaia Mizoramin hmasawnna tam tak a neihte hi ziak mi, sawi mi, chhiar mi, Berampu a nih angin ralkhat thlir ngai lova hmuha hriat vek theih a ni. Amah pawhin mitthi vuina vela thu a sawi a, mitthi chanchin leh ama chanchin inzah tawk deuh thawa a sawi ṭhin ang hian ram roreltute, an rorel chhunga an hnathawh hi chu hai der lovin, mitthi vuinaah em sawi a rem loh pawhin, a thuziakah te hi chuan ziah ve mai tur a ni. 

Pu Lal Thanhawla'n a CM chhunga a tihhlawhtlin tam tak hetah hian sawi vek sen a ni lo, Mizoramin hmasawnna kan neih zingah tuna COVID-19 enkawlna atana ṭangkai ta em em, Falkawna Referral Hospital & Medical College, Lengpui Airport, Tuirial Hydel Project, Bairabi rel station, Sainik School, Chhingchhipa hmeichhiate an luh ve theihna tura a beih dan  te (India ram Sainik School a hmeichhe luh ve theihna awm chhun); September 16,2020 khan Mizoram MP (Rajya Sabha) Pu K. Vanlalvena'n Parliament-a, Mizorama Medicinal Plants zirchianna tur, Research Institute din puitling thuai tura a ngente kha Pu Hawla'n Shri Shripad Naik, Minister of State, Ministry of AYUSH leh Director General, Central Council of Research in Homeopathy, Ministry of AYUSH-ah te nen hma an lo lak tawhna rah zel a ni.

Kohhran leh Mizoram mipuiin remna leh muanna duha, chutiang nei thei tura Chief Minister nihna kiantu, Mizoram Journalist Association leh Mizoram Football Association thlengin a hova din a ni a. India ram hmun hrang hranga Kristian-te thlavang theihtawpa hauh ṭhintu, Myanmar leh ṭhenawm state-a Zohnahthlakte thlavang na taka hauh ṭhin leh an thlamuanpui ber chu Pu Lal Thanhawla hi a ni. 

Synod rorel chungchang leh Synod Inkhawmpui chungchang mi dang tlin loh leh fel lohna lam, minute pawha lang atana duh loh, hmun danga sawi leh tlak lo, Synod Khawmpui neihna hmuna Minute ziah dan te, Usher-ho chungchang te, an ei tur sem chungchang mai mai te; tin, Lungleia PWD IB leh a Compound sawrkarin Presbyterian tana a pek thu leh, chumi Compound-a thing Kohhran dang Upa pakhatin a lo kih thu leh Forest Conservator hmanga an lak let thute hi Pathian ram zauna atana thawhho duha Kohhran inzawmkhawm an buaipui mek tawh huna sawi chhuah leh fo atan hian Presbyterian Kohhrana a puipa leh member-te pawhin an duhin a rinawm lo.

Huaisen tum chuan huaisen anga lan tum lovin, thil nihna tak ziah lan ngam leh ziah law law hi a huaisenthlak a, Berampu nih phei chuan a ṭul em em zawk a ni. Thil dikhlel leh mi dang hliam thei thu mahni inchawimawi paha ziah leh sawi hi rawngbawlpuite tan tak pawh thil nuam lo tak a ni ngei ang.