Engtin Nge A Tih Bik?

Chanchin thar aṭanga kan lo hriat dan khan Delhi CM, Arvind Kejriwal a Sawrkar chuan Delhi khawpuia Hmeichhia kum 18 chunglam zawng zawngte thla tin Cheng sangkhat (Rs 1000) pek turin thutlukna an siam ni awm tak a ni. A ropuiin tihpuitlin a hautak hlein a rinawm. Hemi thu ka hriat hian rilruah zawhna, "Engtin nge a tih theih bik?" tih hi a lo lut nghal a ni.

National Capital a ni a, Delhi (UT) ah hian mihring an tam tih chu hriatsa a ni. Aizawl khawpui chu sawi loh, Mizoram hian MP (Lok Shaba) pawh khawngaih 'mark' nen pakhat kan neih ṭawk ṭawk laiin, Delhi chuan MP 7 (pasarih) zet an nei a ni. Hmeichia kum 18 chung lamte Account-a thla tin pawisa thun tur tam dan tur ti hian lo suangtuah teh ang.

Mizoram zim teah hian hmeichhia kum 18 chung lam 4,41,520 an awm niin sawi a ni a, heng kan hmeichhia kum 18 chunglam zawng zawngte hi thla tin Delhi sawrkarin pek a tum zat hi lo pe ve dawn ta ila, thla khata senso zat tur chu Rs 4415,20,000/- (Cheng nuai sangli zali sawm panga leh singhnih) a lo ni ang a, kum khatah chuan a ṭhahnem hle dawn tihna a ni. Chutih laiin Delhi khawpuia hmeichhia kum 18 chung lam tam dan tur leh an pawisa dawn tur zat han suangtuah ila, turu tak a ni ringawt mai, mahse, tih theih an tum miau si.

Kan PM, Pu Modi-a'n Good Governance a tih fo hi Delhi Sawrkar chuan a takin a kalpui ni awm tak a ni. Hetiang thil harsa tak tur anga lang pawh tithei tur chuan politics auhla ringawt ni lo, tumna tak tak, 'will' (Political Will) neih a ngai a ni. Hetiang hi tun hma zawng khan kan ram hi chuan a tlachham niin a lang a, tuna kan Sawrkar thar hian inthlan hma khan thil tam tak min tiam a, a tak ram thleng turin political will pawh tuna kan CM hian a neiah ngai ve phawt ang.

Delhi han sawi leh ta ila, AAP-in sawrkarna an siam hnu hian hna an thawk ṭha bawk a, mipui an phûr a, chhiah pawh a lut ṭha hle niin sawi a ni.

Mipui an hlim a, Sawrkar an rin avangin an thlawp a, Sawrkar pawhin rin phak bak thlengin hna an thawk thei tihna a ni.

Kan Sawrkar tharah Budget Session a ṭum khatna zawh fel a lo ni ve ta a, ram leitu turte chhiah pawh tihpun a ni a, keini ang duang chuan kan hre thui lo nain mipuiten ṭha takin Sawrkar thlawp ila, a hriaten an sawi; khawvel sawrkar ropui leh changkang apiangah chhiah an pe ṭha, an tih pawh hi a dik a rinawm.

Duh thu han sam ve ngawt ila, kan Sawrkar hian thil man sang chak lutuk turte hi 'control' ṭha se la, a tuartu mipui, rethei zawkte kan lo ni leh ṭhin si. Inmamawh tawn vek kan ni a, tunah hian mi rethei zawkte tan chuan engkim mai a to vel vek a ni ber mai.

Lal Isua hming sawi ve chhen lem lo, Hindu sakhaw zuitu Sawrkarin mipuite tana thil ṭha chuti taka a tih theih chuan, keini Kristian CM, Kristian Minister, Kristian MLA tam zawk daih nei ram hruaitute chuan ram tana thil ṭha tam tak min tihsak thei ang tih ring ila, mipuite pawhin ṭha takin thlawp zel ang.

- Rev. Biaka Chinzah