NEP 2020 LEH HINDUTVA

A buaipui pawlten hun eng emaw chen an buaipui tawh National Education Policy 2020 chu July 29, 2020 khan Union Cabinet meeting chuan Parliamenta sawiho pawh awm lovin a pawm thut a, mi tam tak thin a ṭhawng khawp mai. He Policy hian India rama chhuan thar lo awm zel turte hringnun a khawih thuk hle dawn avangin Educationist te chauh lo pawhin kan ngaihven a ṭul tak meuh a ni. 

Mi thiamten an zir chiang zel ang a, thil awmzia chu a rawn lang fiah telh telh turah ngai ila. Tun thlenga kan hriatthiam china rawn lang ta ngaih pawimawh zual han thur chhuak ila a ṭha awm e. 

‘Secularism’ tih a tel tlat lo!

He policy-ah hian ‘secularism’ tih ṭawngkam hman a ni tawh lo; chuvangin secularism promote tumna a nei lo a nih hmel. A chhan pawh Hindu sakhaw bu pawimawh, Bhagavad Gita ami ṭawngkam nishkam karma (mahni inphata thiltih) tih an hmang zawk daih hi a ni. Chu chu Hinduism chhungkuaa awm ve lo tan chuan ṭha lo tak a ni dawn. India ram hi sakhaw hrang hrang leh hnam hrang hrang kan nih avangin tun hma zawng kha chuan secularism hi ngaih pawimawh hmasak ṭhin a ni. 

Tunah erawh chuan he thu hian hmun khat pawh a chang zo tawh lo va. “Chatuan ata India ram hriatna hausa leh hlun tak chu he policy kaihruaitu eng a ni a. Hriatna (gyaan), finna (pragyaa), leh thutak (satya) um hi India ngaihtuahna leh finthuril hian mihring zawn theih sang berah a dah tlat a. Hmanlaia India rama zirna pawh khan hringnun hmachhawn tura hriat belh chauh a tum ngai lo va, sikul piah lam ringawt a buaipui lo, mihringin a nihna dik tak a hriat leh chumi chhuah zalen chu a tum zawk thin a ni,” tiin thuhmahruaiah a inziak kulh mai.

Sakhua leh hnam tlem zawkte namnul leh chimral duhna he policy-ah hian a len hmel hle. Minority te culture, ṭawng leh zirna in din chungchangte he policy-ah hian hmun a chang lo va, kum 2016 a draft policy an submit zawkin an sawi lan hmasak, “zirna chuan remna leh muanna, zawldawhna, secularism leh ram inpumkhatna a siam tur a ni,” tih kha an hnawl fithla der a ni. 

Policy-ah hian ‘equity (inantlanna), inclusivism (tel ho na) leh pluralism (tam tak nih pawm thiamna)’ te hmu mah ila ‘secularism’ (sakhaw zalenna) ber a awm si loh chuan India Danpuiin a ngaih pawimawh em em ‘zalenna, intluktlanna leh dikna’ a thleng mawh dawn tih Delhi University Professor Sukumaran a sawi. 

3-Language System leh a kaihhnawih

He system hi thil thar em em ni lo mah se, ṭawng pathum zir ngai tur hi duhlohna thawm, a bikin South India lamah a lian hle a. Mahni state bil ṭawng leh English zir mai an duh tawk tlangpui. 

Ṭawng thiam tam (Hindi/ Sanskrit, eng pawh) chu a ṭhat em em laiin hna zawnna kawngah te eng ang takin nge an rawn hman ṭangkai ang? Midangte el turin kan thiam tak tak ang em? tih te hi ngaihtuah tham a ni. Hnam tlem zawkte dinhmun aṭanga thlir phei chuan English tihlar tlan hi a ṭha zawk fe awm e. Compulsory ang em chu ni lo mah se, tuma hman tawh loh ‘Sanskrit’ chawh nun thar tumna a lian bawk a, ‘school leh zirna sang zawkah zir theiha dah vek tur’ tiin a inziak. 

Ṭhenkhat chuan hetah hian thil thuk tak a inphumah an ngai. A chhan pawh ṭawng hi culture, history leh nunphung hriatna tukverh a ni a. Sanskrit hi Hindu sakhaw bu original texts an ni a, chu chuan Hindutva kai harh lehzual zelin democracy leh hnam hrang hrang nun hona a tichhe thei hle dawnah an ngai tlat. 

Hnam hnuaihnung hotupa BR Ambedkara te kha chuan India ram mi tam zawk te ‘khawih thiang lo’ (Untouchables) anga puang a, rahbehna hmanraw duhawm lo tak anga ngaiin Sanskrit hi a lo hnawl na hle tawh a, Manusmriti (Manua Dan bu) pawh a lo hal hial tawh a nih kha.

Zirna hi sumdawnnahmanruaa siam a ni ang em?

He policy-a thil lawmawm tak anga lang chu zirna, a bikin Higher Education tihchangkan tumna a lian hle hi a ni phawt ang. 

BJP sorkar hnuaiah hian thiamna zirna hi tla hniam nasa a sawi a ni ṭhin a. Tunah hian khawvel University ṭha 300 thlan chhuahah India rama University lang pha an awm lo a ni awm e. Zirna sang zawk tihchangtlun hna hi a pawimawh hle a ni. Tihchangtlun tum dan a fuh loh chuan keini hnam tlem zawkte leh bet zawkte tan a harsa telh telh ang tih a hlauhawm, tiin mi thiam tam tak an ṭawng chhuak ve leh ta.

Tunhnai khan World Bank chuan ‘Strengthening Teaching - Learning and Results for State Program’ atan Dollar maktaduai 500 puk tir a rem tih thu puan a ni a, chumi hnu thla khatah hmanhmawh angreng takin NEP 2020 chu pawm a lo ni ve ta bawk a. Inzawmna a nei ngeiah an ngai. NEP 2020 hi sumdawnna hmanrua anga ngai an tam ta viau mai. 

Zirna thil hi tunlai kalphung privatization (mimal hnena thil hlan), commercialization (sum dawnnaa chantir) leh corporatization (pawl lianin an chalai) mila her remna nasa tak angin an ngai a ni. Economist lar Prabat Patnaik chuan NEP 2020 chu capitalism duh dana in her rem zelna hmanrua a ni, a ti. 

Mi awm thei laklawhte chuan dinhmun ṭha an luah zui zel ang a, mi hnuaihnungte chu rahbehin an awm chhunzawm zel bawk ang. Educationist Nantida Narain pawhin NEP 2020 hi zirna hi sorkar kuta awm lo va mimal thiltitheite kuta a awm dan tura remruatna a ni, tiin a sawi mek a. Chu thil chuan he ram chhunga mi hausa leh rethei kar a tizau zual zel dawn a ni. “Sumdawng lian leh Sorkarin World Bank ṭanpuinaa zirna inpui an lak tur hi Dalit, Adivasi leh hnam tlem zawk tan chuan thihna thupek ang a ni,” tiin Ajaya Kumar Singh, Odisha Forum for Social Action Director chu a ṭawng chhuak hial a ni. 

Eng tak nge thleng dawn a la chiang chiah lo nang a, PUC-a kan zir lai leh NEHU-a kan kal laia fee tih tham loh kan chhung a, kan lo zir ve ṭawk ṭawk theih chhan te kha tihbo a nih palh hi ka hlau ru veng veng. A nih vaih chuan keiniho zinga tam zawk hi chuan Higher Education hi ngaihtuah pawh ka ngaihtuah ngam lo vang. 

Fundamental Rights tel lo,Duties chauh...

Constitution-in a ram mi zawng zawng a pek (fundamental rights) chu he policy-ah hian a lang lo pek a, fundamental duty (mi tin mawhphurhna) chu a lang chiang hle thung. Hei hi a mak angreng hle a, ngaihhmul theih tak a ni leh ang. 

Right to Education Act (2009) te pawh hi sawi lan a ni lo lehzel a. Hlauhthawnawm thei ta chu, hlawkna umna kawng a zirna runpui an kaltir a, Hindu sakhua leh culture-a min zial tel zel an tum a, chi dang leh duh hrang theite min hnawl zel kawngah hian ka dikna chanvo (rights) te hlamchhiahin a tam zawkte leh thiltithei zawkte awpbehna hnuaiah kan tang nghet telh telh dawn a va ni mai awm ve? 

NEP bawhzuina angin sorkar chuan expert committee member 16 awm a din a, an hna chu kum 12000 chhunga Indian culture zir chian a ni. Mak tak mai chu India mi 40% aiawh Dalit, Adivasi leh sakhaw zuitu dangte an tel miah lo va, South India leh hmeichhia an lang lo bawk. Sawisel pawh a hlawh hle a ni awm e. 

Hmanlai India (ancient India) lam an hrut nasat hle laiin tunlai India (modern India) erawh chu vawi 2 vel an sawi kai ve hram a ni. Ancient India lama mithiam 18 hming a lan laiin, modern India duangtu an lan ve lo va, MK Gandhi, Raja Ram Mohan Roy leh BR Ambedkar (minority te tana hma la nasatute) an lang pha miah lo bawk.  

Hei hian hmanlai India (Hinduism culture leh sakhua)-a kir leh a, tunlai India (mi tin leng) chhuahsan tumna a tilang chiang thei hlein a hriat a ni. History zirtute chuan kan hria ang a, hmanlai zawk India leh tunlai India hi a zia a dang hle a; Gandhi leh Nehru-ten din an lo tum tlat chu ‘mi tin intluktlanna, sakhaw tin lenna, hnam tin zalenna’ India din a ni si a. NEP 2020 hian hei hi kalsan a tum em ni, tiin zawhna tak ngengngawng tak a zawh theih a ni. 

Ngaihven a ṭul

NEP 2020 hi tun tut tutah hman nghal mai a ni dawn lo a, ngaihven erawh a ṭul khawp mai. Heti lama mi thiam leh hre zau deuhten zir chian a pawimawh khawp mai. Zirna hi kan rilru leh ngaihtuahna siamtu leh kan mihring nihphung duangtu ber pakhat a nih avangin ngaihthah a rem lo. A la thar deuh avangin rinhlelhna nena lo thlir pawl leh hre chiang chiah lo pawh kan tam thei ang. Mi thiamte vekin an lepse chho zel a, a nihphung chu a rawn lang fiah telh telh dawn a ni. 

RSS te meuh pawhin an rawtna 60% a lan thu an sawi ngam avangin Hindutva hmanruaah an chhuah dawn a ang a. Tuna kan hriat chinah pawh hian min ti phawk thei thil a tam angreng hle tih chu a lang mai a ni.