Inren Avanga Hausa

Hausakna hi an lo chhuahna chi hrang hrang a awm a. Sumdawnna aṭanga hausaknate, sawrkar hna thawhna aṭanga hausaknate, politics khelhna aṭanga hausaknate, In leh lo, ram hralhna aṭanga hausaknate, compensate dawn avanga hausaknate, pawisa dah pun aṭanga hausaknate, inrenna avanga hausaknate, sum chang thlai hralhna aṭanga hausaknate an ni tlangpui ang.

Hengte zingah hian inren avanga hausakna hi a thlanawm ber a, a thianghlim berin a hmingṭha ber bawk a ni. Miin inren taka a khawsak chuan, a neihchhun chu a khawl belh zel a, kum rei lo teah a lo intodelh thuai ṭhin a, Mi ngaihsan leh entawntlakin an lo awm ṭhin. Mihausa te dinhmunah hial an lo invawrh kang thei ṭhin a ni. Hetiang mi hi kan ramah entawn tur tam tak an lo awm tawh a ni. Inrenna leh thawhrimna ṭang kawp chuan intodelhna a thlen a, intodelhna chuan hausakna a thlen a, chutiang ang hausakna chu ram changkangte dinhmun a lo ni.

Department kal tlanga sum lo kal, chawh dik loh luihna avanga sum lo tlingkhawm, mahni tana lo latu, sawrkar hnathawk chu ngaihsantlak an ni lovin entawntlak an ni lo va, chutiang ang hausakna chu hausakna dik lo a ni.

Development sum lo kal te, ṭanpuina sum lo kalte chu politician ṭhenkhatte chuan an lo la peng a, an tidanglam a, anmahni tan an chheprelh a. Chutiang aṭanga politician hausate chu entawntlak an ni lo va, ngaihsantlak an ni lo. Ram hmasawnna daltu hausakna chu hausakna dik lo a ni.

Dik lo taka sum lakluhna aṭanga hausakna boruak chuan kan ramah hian rei tak min lo chenchilh tawh a, chu chuan mipui vantlang nun a tichhe zo ta a ni.

Kan ram hi state rethei tak, mi ram thawhchhuahsa ringa inchawm nung ṭawk ṭawk, leiba ngah ṭen ṭun chunga hma lam pan zel lai kan ni a. Kan tihtur awmchhun chu ‘INRENCHEM ‘ hi a ni ringawt mai. Mi tinte hi inremchemna aṭangin intodelh tum ila, a pawimawh hmasa ber chu a ni.

- H.Neihchungnunga, Durtlang North