SETANA NEN TûK KHAT CHU – II

Hmanah khan, tum lawkna awm hlek lovin, khawvel mite’n an la interview ngai loh Setana nen inhmachhawnin a biang kan be tawh a. A lo thleng nawn thei ngai ang tih reng ka hre lo. Nia, he khawvelah hian khawhar taka ka vah rek rek laiin, hmun pakhat thengthaw nuam tak hi ka lo thleng a, ka han hawi vel a, khua ka han chuan a. Ni, Zoram nipui a lo her chhuak leh ta a, farṭuah leh vaube te chu mawi takin an vul a, romei a zam paw chuk a, sava leh hram thiam aw mawite an kiu vawl vawl a.

Thawklehkhatah thlipui rawn thawk thut ang hi a rawn ri hum hum a, boruakah chuan sava lian rapthlak tak mai hi a rawn thlawk luap luap mai a. A kite chuan chhim leh hmar a hawi a, mei leh kát a phuh chhuak chuai chuai a, a mei sei pui hmawrah chuan Russia ram tih chhiat vek theihna bomb mit nei sang tel a paipawn bawk a. Ka bula a rawn ṭum chuan, mit khap kar lovah a lan dan a tidanglam a, tlangval thohang ṭha tak, rimtui tak, smart em em mai hi a rawn ni thut a, nelawm fahranin a nui sang a. “Chibai” min han ti dam thlap a.

Setana : I rilru leh ngaihtuahna zawng zawng kha ka hrevek e. Min chibai let duh lo mai rawh. He ṭhal romei zam hnuaiah hian ni hnuaia thil awmte hi i han sawt dun teh ang khai. Dím suh aw.

Kei : Khai a! Nang titipui hi ka chak lo! Thlawk bo leh hmanhmawh mai teh! Engmah ka sawipui dawn lo che!

Setana : Ngawi teh, i zia thup teh khai. Hmanni lawka in hman zawh tak KṬP General Conference chungchang te, Chapchar Kut chungchang te, Traffic Jam chungchang te, Golf Course chungchangte i sawi chak tih ka hria.

Kei : Tak zet che hian! A nih leh, Hremhmun Tirhkohho hian KṬP General Conference te kha engtin nge in lo ngaih ve?

Setana : Ṭha kan ti thlawt! Mak i ti hle mai maw? A mak mawlh lo. Mizo zia chu kan hria alawm, kan Study Group-in an zir chiang lepse nasa ṭhin che u asin. Huau huau tel lovin Pathian in ring thei lo. Mimal anga chhel tak leh huaisen taka Pathian ring tlat hi chu in tlem hle. Chuvangin, in tan chuan huau huau hun hi in rinna in tuaitharna hun ṭha a ni. Ti zel rawh u.

Kei : Vei fuk fuk che chuan! Sawi ṭha hle mah la, i sawi a nih chhung chuan tu mahin an ring dawn chuang lo. Mi bum tur zawngin va thlawk kual mai mai teh khai.

Setana : Nangni ang, sikul hlui chhuakho hi chu in va mawl tak e aw… Mi bum a ngai lo, kan bum tawh ngai lo. An tana thil ṭha tur hi kan hrilh ngar ngar a, an zawm duh lo hi kan buai a nih hi… Huiha! Phiangsen che u hian! KṬP, ṬKP etc inkhawmpui lian hian a ṭha zawngin nge nghawng a neih nasat a, a chhe zawng zawkin tih zirchianna pawh in nei ngai lo. In ngam lo. Zirchiang ngam rawh u. Chuta ṭanga in hmuhchhuah dan ang kha bawhzui rawh u. Huau huau theology bak hi in ngaihtuah peih lo.

Kei : Tak zet che hian! Sawi sawi ve suh. I thu hi kan awih dawn chuang lo aw.

Setana : Ha ha… suala tlu lut turin kan thlem tawh ngai lo che u, thil ṭha ti turin kan thlem ṭhin che u. Kan tektik kan thlak tawh. Chapchar Kut Miss in thlang ṭhin te hi eng nge a ṭangkaina? Huau huau lawm society, thil ṭha leh ṭangkai aia hlimhlawp bawlna ngaisang zawk in ni aw. Piknik in ti, spot in ti, in nula leh tlangvalte hi nawmsipbawlna lamlianah an tlan hum hum hi… In in sak dan te lah hi, inang ṭhup ṭhup hian in sa a, ceiling eng thei nei pha lo leh in chung zawla Ramhuai Thei (Dragon fruit) ching pha lo chu in hmuhsit hle kha… Kawngpui chhe em emah air-conditioned car in khalh tak bup bup a…

Kei : Chuti'n min sawi chhe khanglang suh! Ṭha kan tih angina kan ti zel ang. I thu chhe té them lo! Lo inrawlh ve kawisawi lo mai teh.

Setana : In society kal phungah te, ram rorel khawlah te, kohhran rorelna sangah te, in kohhran kal phungahte hian kan inrawlh peih lo, in hrilh fin theih loh. Thil ṭha lam zawk hi kan sawi mawi hlauh tawh a, chu chu kan rál beih dan thar a ni tawh. Tuna Mizoram ringtu inti tam zawk hian an Pathian thu awih dan i hria em? “Isua'n a ti vek ang,” tih hi an vaw lar vet vet asin. Mahniin engmah tih tum lovin, Isuan a ti vek tur angin an inzirtir a, in tifuh lo nasa chai chai teh e. Entirnan (a ban te a han vai vel a), zu ngawlvei leh damdawi ngawlveite chhandamna camping-ah in luhtir a, piantharna nen simin an rawn chhuak a, mahse rei lo teah zu/ruihhlo bawihah bawk an tlu lut leh ṭhin. Eng vang nge? Zu simna te, ruihhlo sim tumna te kha, anmahniin tumna nei turin in inzirtir lo va, Lal Isua'n a ti vek ang in ti ṭhin a, in inzirtirna hi a dik lo alawm. Mahni hian tum ve a ngai. Kohhran mite pawhin venpui an ngai. Chu chu in peih lo. In ṭha thei lo. Nep tak in ni, nep tak!

Kei : Kan Pathian leh Lal Isua hi sawi chhe ve khanglang suh aw! I ngam loh nasat em kha aw…

Setana : Ka sawi chhe ikhaw lo mai. In biak dan leh in rin dan hi a fuh mawlh lo alawm. Huau huau tel lo hian Pathian in ring thei lo. Lamtualah lam bingbilet tup tup ula, in inhmeh tawk chiah.

Kei : Setana meuhina a zilh ngai han nih chu a va han mak ve aw…(ka ti rilru a).

Setana : Aizawl khawpui Traffic Jam in buai nasatziate hi Hremhmun High Command (HHC) pawhin kan lo chai ve luih luih ṭhin asin! A tihreh dan a awm reng a, in duh si lo…eh eh, engmah lo sawi ve suh, ka han sawi zel ang e. Aizawl khawpui office pawimawhte hi khawpui dangah sawn ula, traffic jam a reh duak mai ang. Mahse, chu chu in duh lo. Thil theih loh angah in ngai tlat. Khawpui dang pawh an sawn fo tih in hrereng lawi si. Thu ṭhaa thlem hian in luhlul zawk, in sual zawk.

A nih loh leh, public transport hmang ṭangkai ula, mimal motor lek chhuak nasa lo ula, a zia mai ang. Mahse, chu chu in ti thei lo. In rilru puthmang (moral) hi a dik lo. Eng emaw ti ve thei deuh nia in inhriat chuan in chapo zel. Public transport motor neitute inluling lutuk tur kha in tuar zo lo vang. Hnam chapo tak, thil bul chhut peih lo, mi sawisel ching in ni.

Kei : Hui Ha! I thil sawite kha ka hriat hnu vek, ka sawi chhuah duh loh a nih kha! Intiropiui viau suh aw.

Setana : I sawi chhuak ngam si lo va, ka sawisak che a ṭul alawm, lawm hle rawh! In rilru puthmang hi siam ṭhat hmasak ber a ngai. Ram hmasawnna siam tur leh thil ṭha ti tur chuan dikna leh rinawmna a pawimawh hmasa ber. Thiamna te, pawisa te, technology te chu a pahnihna a ni. Cheng vaibelchhe tel man hmasawnna hna thawk ṭhin mah ula, 50% aṭanga 80% in hlep ruk tho si chuan maw, in ram hian hma in sawn thei lo vang. Ministry thar apiangah a thara hmasawnna ruhrel bul ṭan ṭhat a ngai ziahte hi in zak lo'm ni? UT in nih aṭangin kum 50 lai a liam tawh hi… Thlem hranpa pawh in ngai lo, hnam tihmawh, suaksual, rinawm lo…

Kei : (Sauma chawm len tribal hnar bawng ṭhin a thawk ta)… Het het… Setan! Chutiangin Mizote hi min sawi chhe reng reng suh aw…..Khaw nge, Gospel Pistol hian ka han kap teh ang che…thlawk bo rawh!

Ka mumang a lo ni a.

- Ṭhuamtea Khawlhring, Lunglei