ECONOMIC MOLECULE-IN MIZORAM A KHAT A HAI CHHUAH KA VISION – CM ZORAMA

Kan CM chuan a vision chu a rawn puang chhuak leh ta a, engtin ni zel ang maw? Kan CM ni rei tawh pakhat hi vision nei lo, a tlachawpa thil ti mai ṭhin tih a ni a. Pakhat dang chu vision nei tam, a eng amah ûm pha ṭhin si lo tih a ni thung. A vision thar phei hi chu a ûm phâk leh loh tur a nih leh ngei a rinawm. 

Economic molecule hi a chher chhuah nge ni ang a, a phuahchawp ni ang le? Ram danga an neih ve loh a’n ti leh kher hian ‘tuikhur tuma thâl ve theih loh’ thu te kha min hriat chhuahtir a. Switzerland of the East te pawh min ti hre chhuak. Kawng chhawng leh Traffic Jam Free, SEDP nuai 3 te pawh. 

Israel aia a lêt 10-a hausak theihna ram Lalpan min pe, a tih te phei hi chu Israel-te kan ngaihsan em emna chhan ber, hnam thlan an nihna sawinêpna a ni mai a, Thuthlung Hlui te mai mai chu a cancel nghal mai dawn tihna em ni ang? 

IAS neih tam pawimawh thu a sawi ṭeuh a, Central Service-ah Mizoram cadre neih a ngaih pawimawh thu sawi zawm leh daihin, “Pathianin a remtih a, Covid-19 vaccine hmuh chhuah a nih a, Delhi-a ka kal theih chuan hei hi ka bawhzui ang” a ti a. Chuti taka a ngaih pawimawh, ‘Chuan, Chuan, Chuan’ ti meuha bawhzui a tum chu, Prime Minister leh Home Minister pawhin Mizoram cadre siamsak a nih tur thu an sawi tawh, te a tizui leh mai a. Eng chu nge a zu bawhzui tur pawh chu a chiang ta lo a nih chu. 

State-ah hian IAS cadre a awm a, Central Service cadre erawh a awm thei lo. Tihdanphung pangngai kalha State danga an neih ve loh Centra Service officer kan ngah viau avang hian an tana cadre bik siamsak te a tum a nih chuan thu dang a ni ang a. IAS cadre ‘management’ hi Ministry of Personnel, Public Grievances and Pensions kuta awm a ni. Hetiang thila Home Minister te han sawi kai daih hi thil awmdan hriat chian loh vang a ni. 

Tun hnai kum eng emaw zat chhung, hnam dang IAS officer fel tak tak kan neih laia hetiang thu a’n auchhuahpui leh daih mai te hi a mak a ni. Drama/ politics a ni leh ber ang chu. 

Hetiang thilah hian CM Secretary te hi an pawi­mawhin an ṭangkai thei em em a, chu chu an awm chhan pawh a ni a. Tunge chutiang atana thurawn han pêk tur ti-a Mizoram Diary 2020 ka’n en chuan, chutiang ni awm ber chu, Addl. Chief Secretary to CM tih ziak ka hmu daih thung a. CM Secretary hna ai chuan Addl. Chief Secretary hna chu a pawimawh zawk niawm tak a ni. 

Eng pawh ni se, kan CM berina hetiang thu, ṭawngkam mak tak tak hmanga a sawi fo mai hi mi tam tak, mi pangngai chin ni-a inngaite chuan inbâwlna-ah kan ngai a. Ti fo tawh lo tura thurawn petute hi lo awm se, a duhawm a ni. 

Krismas boruak mah ni se, Pete Seeger hla-a, When Will They Ever Learn, When Will They Ever Learn? tih lai tê chauh kha veng tin loudspeaker-ah tiri bur bur mai ila, inzir nana hmang te an awm mial ang em le?