Sumin kan hmai a phih
Tangka sum ngainat hi sual tingreng bul a nih thu Bible-in min hrilh a, mahse Mizoramah chuan tangka sum ngainaa dik lo taka hausate hi mi zawng zawng tlawn leh ngaihsan ang thawthangin a lo lang ta mai a, dikna duhtu ṭhalai rilru a na ngei ang.
Facebook-ah hian thil inziak pakhat ka hmuh chu Mizo pa pakhat, hman kum lawka tuma ngaihsan ni lem lo, a hnathawhna lamah pawh eiru tih vanga hmingchhia leh
ṭhenkhatin an nuih deuh tet tet chu a ngaihsanawmzia leh a ropuizia hi a lo inziak ṭeuh mai a. Comment ka chhiar a, a ṭhen chuan ‘hahaha’ tiin nui hmel an ti lang a, amah hre chiangtute chuan an nuih tih a hriat a, mahse comment tu tam zawk kha amah hre chiang lo, a hausak hnu chiaha amah hretute an ni a, kha mite kha chuan an ngaisang ta tak tak niin a lang a, rilru a hah ru veng veng a, ṭhalai naupang zawk hi chuan a hausa apiang hi an ngaisang mai dawn niin a lang.
Mi pakhat ka hriat ve leh thung chu a pianna chhungkuaah mi hausa an awm lova, tumahin a hnathawh rim em em leh midang aia a fin bik em em an hre lova, thiamna lama a san filawr em em pawh an hre lova, mahse tun hnai kum 10 chhung velin hausak namen lovin a hausa tawh a, a hausak chhan hriat a ni lova, a hausakna sum erawh chu thiam takin midangte tan a hmang a, mi tam takin pa thilphal leh midangte tana inpe tak angin an ngai tawh a ni.
Mi hausa hmasate an ngawih ṭhup laiin ani hi chuan midangte tan sum a pe chhuak huau huau mai si a, hetianga ‘mi inphal’ na na na chu ngaisang tawk an awm a, amah hre chiangtu lamin rinhlelhna nen thlir mahse hre chiang ve lotu a hausak hnu chauha amah hretute chuan an fak nasa teh asin.
Pawisa hi kan neihna lam miin min hriatpui loh chuan a neitu ngaihsan a harsa an tihte hi chu Mizoramah chuan a ni ve lo.
Pa dik lo em em tih kan zavaia kan hriat pawh a hausak miau chuan kan tlawn rawn a, a sum hmuhna hriat lohva lian thur thur pawh kan pâk huam huam a, tun hmaa tunge a nih pawh kan hriat ngai loh kha a sum a neih hnu chuan thil pawimawh tak takah a lang reng tawh a, sumin kan hmai bal kan phih fai zel zawng a nih hi.
- Mawia Pachuau