THAIBAWIH-TE HNENA THUCHAH

1.    Nau puak tihfual hian kan nau puakte'n nuam an tiin an tlei duh, Kan dar zawn lai hi puakpuan tiphek hlai deuhin dar a kham harin a zia a awm.

2.    Pawnfen leh nau-ek suk hi mi dang lo hmuhah puan dang suk nen a danglam chuang lo. Han pho lai tak hi tlawm thlak deuha i ngaih chuan i suk hmain In nu chu a pho chauh ti turin ngen hmasa phawt ṭhin rawh. A lo remti lo palh a nih chuan "Nisaa pho chu puan rawng a dal duh” ti la in chhungah zar mai ṭhin rawh.

3.    I nupuiin a vuak chang che chuan ngawi rengin a ruh hlatna lam lam kha lungawi takin dawh mai ṭhin rawh. Tlanchhe ngai miah lo la, i heh pet chungin intipachang la, tuar fan fan zawk ṭhin rawh. Tuarfei leh taima taka i tuar phawt chuan a vaw rei peih bik lovang che. Ṭhenawm khawvengte hriat khawpa i rum emaw, i au chhuah vaih chuan lo ngai reng rawh, i tuar kha a chhah ting dawn tih hre rengin au chhuak ngai miah suh.

4.    I nupui zing thawh hma; khuma a mut laia thingpui i pek changa,  “Kam ṭhuah hma hma a,” a lo ti a, i pek loh leh a thinur i hlauh bawk si chuan thingpui, kam ṭhuahna tur leh a dawhna tur chawhtawlh ruak a rualin a khum bulah chhawp la, ti chuan a duh zawk zawk a ti hmasa mai ang chu. Hmai hrukna tur (Towel) dah theihnghilh miah lo tur. Tin, a koh hunah che “Hai sâp” ti thei nghal turin inring renga awmin beng chhit reng tur.

5.    Mi dang paw'n nei se an ngam bik lovang tih hresaa i nupui kha i neih a ni tih kha hre reng la, inchhir duh ngai miah suh, inchhirin awmzia a nei chuang tawh lo. Tihtak emah chuan mipa i la ni reng tho a lawm le, ṭang fan fan zawk rawh, i damchhung bak i T.B. chuang lovang.

6.    Thaibawih nih hi zak ngai miah suh, mi dang pawh an ni ve tho. An inthup thiam vang chauha lang lo mai mai an ni. A dik tak chuan i phu loh nupui i nei tihna a ni a, ngaih ṭha takin awm mai rawh.

7.    Upain, “Hmeichhe kut hnu chu sahriak leh meilumin a dam ṭhin,” a ti a lawm. I nupuiin a vuak chang che chuan a hmuamhma kha Tel lumin zut la, mei ai pahin mei lumah hem ṭhin rawh. Tel in lo nei loh palh chuan vawk hriak pawh a pawi lo. Chu leh zel a la ngaih thiam loh chuan i chhungte in lamah eng emaw chen la zam rih phot mai rawh.

8.    I zinchhuah changin i fate aiin i nupui lawmzawng hawn ching la, ni hnih ni thum vel chu i chunga kutthlak i pumpelh mai thei. I vannei viau chuan i thlen ni tuka zing thawh, naupuak, nau-ek leh awngphah suk thleng pawh i awl mai thei.

9.    I nupuiin a hnawhchhuah che chuan in puzawnte in lamah kal zawk ṭhin rawh. I pate in lama zam ai chuan a hnu zelah kut tawrh a nep duh ṭhin. I puzawnte in lama i tlan a nih chuan i nupui kha a rawn kal ngei ang a, chutih hunah chuan i pizawn kha i lamah a lo ṭang ang a, i nupui kha a lo thlen rualin i pizawn khan, “Det dut mai,” a lo ti mai ang. Amaherawhchu, he thil hi chu a "risk" a sang viau ang.

10.    I naute bual lai leh i puansuk lai i ṭhiante an lo kal palh hlauh chuan, “Kei hi chu ka uluk a, hmeichhia hi chuan an thiam tak tak lo,” ti then mai rawh. I nupui kha hmeichhe pangngai a nih chuan a ngaimawh lutuk lo turah dah ila. A lo ngaimawh palh a nih hlauh chuan leh i chetsual ṭum a ni ang a, i tuar mai a ni ang chu. Chetsual ṭum hi chu a awm ngai e.

11.    I ṭhiante awm laiin i nupuiin a kamkhat che chuan chhang let ngai miah suh, i chhan leta i thiamthu i sawi vaih chuan i ṭhiante awm loh hunah i tawrh tur a chhah ting a ni mai. I chhan leta i thiamthu i sawi vaih chuan i ṭhiante haw hunah i hmabak chu – “zot, zot, zot…a na, a na, a na…a tawk tawh, a tawk tawh,"a ni mai.

12.    Nupuite hauh leh vuak pumpelh dan chi khat chu - zing hma taka thawh, hmun fai taka phiah thingpui tui taka lum zawha nau puaka puzawnte in lama len hi a ni.

13.    Zana i hawhara i len chhuah chuan In i thlen chiahin han indap vel la, "Ehe…in pute inah ka meitalh ka theinghilh a nih hi maw le, a ngaihtuah awm love, anni hi chu an fel a, an lo dah ṭha mai ang," han ti la, i nupui a lo thinur pawhin a ziaawm deuh ang. Tin, i nupui a la thinur cheu chuan thil dang sawi lovin titak deuhin, “Kan Pastor Bible chang hrilhfiah dan hi chu ka pawm zawng a ni vek lo” han ti vel la, i nupui chuan in Pastor nena in inkawm vanga haw tlaiah a ngai ang che.

14.    Mi’n Thaibawih an tih loh nan che mi TAIMA anga lan tum hram hram ṭhin ang che.

15.    A dik tak chuan mi tumah Thaibawih an awm tawh lo, chhungkaw ṭangrual an ni tawh zawk.

16.    "Thaibawih" tih hi zahthlakah ngai duh suh, zahin awmzia a nei chuang lo. Chu ai chuan “Khawi nge kei Thaibawih” han ti deuh fo mai la, i Thaibawih loh luata i tih ela lo ngai tawkte pawh an lo awm mah na. Amaherawhchu fimkhur viau la, i nupui awmlai leh a hriat phaka tih chi chu a ni kher lovang, fimkhurah luat a awm lo.