Pu Duhoma Chungah Kan Mit A Fu

Mizoramah party pathumten sorkarna an chang tawh a, hmasawnna eng emaw chen kan nei tawh. A palina atan ZPM, Pu Lalduhoma hruai a sorkar ta a, amah Pu Duhoma te chungah Zoram mipui mit a fu ta ṭhup mai.

MNF leh Congress sorkarah khan hna chu an thawk, mahse duhsak uchuak an nei nasa em em. Pu Zoramthanga phei chu a duhsak bik Kamrula hna a pe mawlh mawlh a, Kamrula kha a hna a chhe hran lo. Congress sorkarah pawh hna a thawk nasa tho. Mahse Pu Zoramthanga hnuaiah duhsakna a dawn khan eng percent nge hlawkna a chan ve zawk ang.

Amah Kamrula khan hna tam tak thawk mah se hlawkna nasa tak a nei lo, a hna petu a hlawk daih zawk an ti. Fiamthu takin Pu Zoramthanga MNF President aṭanga a bán dawn pawhin, "Hlawk laia bàn awih loh," an tih hial kha.

Pu Hawla sorkar kha a ṭha viau, NLUP hmangin mi rethei khaichhuah pawh a tum. Mahse mi rethei leh NLUP dawng khan an pawisa dawn kha mahni intunnun nana hmang lo an tam lutuk a, a ngaihna a awm lo. Pu Hawla kha mihring ve bawk ni mah se, 'Sum a atchilh' ve tlat lo kha a fakawm ngawt mai.

Tunah kum tam tak Zoram leh Zoram mipui chhanchhuak turin Pu Lalduhoma leh a hote an rawn lang ta hlawl mai. An lawmpui awm takzet. Zoram tan han tal tak tak teh se.

Pu Duhoma hi Pathian mi hriat leh Pathian hre mi, Pathian ṭih mi a ni bawk a, a khawvel zinkawng kan thlirlet pawhin khawngaihthlak khawpa dikna duh an nih kan hre awm e.

A chhe lai siam ṭha tura lo lang Pu Duhoma ho chuan thla thum emaw chauh Mizoram an enkawlnaah, mipui mit an chungah a fu bik ngawih ngawih mai. MNF hnathawh ṭha lo an rawn hmu a, siam ṭhat theih an siam ṭha mek zel a. Siam ṭhat theih loh pawh paih ngai hial mah se, an paih mai dawn a nih hmel.

Mizoram kum 20 zet Independent ngiat, a hnua tlawm leh ta; MNF rammu an rawn haw theih nana dinhmun sang tak, Chief Minister nihna namthlua a dinhmun kiantu, Pu Lal Thanhawla ang hialin Pu Lalduhoma kha a pawimawh asin.

India ramah IPS hna ṭha leh sang lutuk mai kalsanin remna leh Muanna atan a office hna sang a kalsan a, remna leh muanna kha Pu Hawla leh Pu Duhoma te vangin kan neih phah ti ila kan sawi sual tam lo ang. An hlu hle mai.

Pu Duhoma hian kum 30 zet mai Mizoramah tualchhung politics khelin, ram siam ṭhat tumin vawi tam tak MLA te niin a changin a tling lo a, chuti chung chuan harsatna nasa tak paltlangin Mizoram Chief Minister a han ni ta a ni.

'A chhe lai' siam ṭha tura lo lang Pu Duhoma leh a thawhpuite hian, eiruk aiin ram leh mipui tan an thawk dawn tih hi ka ring nghet ve tlat. Theihtawp chhuahin han thawk se, thil ṭha duh mipui pawhin an hnungah zuiin kan thlawp zel dawn. Mahse pumpui haivur aia ram leh mipui tana ding an ni reng dawn.

- Lal Khirhvela