LIRPUI A LO NGHING A...
Mizoram hi mi thiam apiangin lirnghing na tak bialah a awm an ti hlawm na a, Pathian zahngaihna nasa tak avangin thihna leh chhiatna rapthlak thlen khawp lirnghing kan la tawng ngai lo. Hei vang hian mi thiamte thusawi pawh hi rilru taka pawm harsa kan ti a ni ang tih chu kan in sak danah te, khàm bakbahai leh lei/ lung tohlâwt em em thlenga ban kan phun ngam zel danah hian a lang thei. Tun hnai deuha thlengah chuan Nepal, Gujarat leh Haiti lirnghingte kha a rapthlak eltiang a, a hmuna awmte thlaphan dan tur leh, an mangan turzia kha, Nilai zana kan tawn ve aṭang khan kan suangtuah thiam nual mai thei.
Mahni in chu sawi loh, Biak Ina awmte pawh kan tlan chhuak a, a hnua sawi leh phei chuan nuihzatthlak tak tak a tam mai. A ṭhen phei chu kan uang nasa lehpek khawp a, kei ka lo ngaimawh leh hman pek a, zahngai thei Pathian hi a zahawm ka lo ti hman khawp mai. Biak In aṭanga tlan chhuah chu a zahthlak loh, luh leh a zahthlak... Upa pakhatin, Chanchin Ṭha avanga thih pawh ni hlei lo, hetianga thih ringawt ka duh lo, a ti... Chairman chu chanvo neia ding pakhat bulah a va ding ve ringawt... Pulpit aṭangin a tlan thla daih... Kohhrana an lawm luh tur ber a tlan chhuak daih... khuangpu-in khuang a khum chhuak daih... a tam mai. A
ṭhen kan indem, a ṭhenin hlauh zawng a inang hlei nem kan ti.
Heng zawng zawngin a entir chu, kan chi-aiin kan phawklek hlawm hle a, zep lohah chuan kan hlau hle tih a lantir - a mak lo. Khawiah pawh awm ila, a innghahna lam aṭanga a chêt tawh chuan, a lian leh nghet emaw kan tih apiang hi a hlauhawm ringawt tawh mai a, engmah ṭang zo reng reng a awm lo.
Kan leilung hi heti hi a ni a, lirnghing chu sawi loh, fur chhe laia lei min pawh kan tan chhiatna namen lo thlen thei reng a ni. Tui lianah kan him viau na a, a aia ziaawm chuang lo chhiatna hian min hual ve reng a, sakhaw lam leh rinna thu chu thu dang ni se, kan khawsak phung hi en fo chu a ngai ve. DM&R leh YMA lamin 'Mock drill' an buatsaih fote pawh a tak tak a lo thlen thulha a ṭangkaina tur chen ka ngaihtuah nawn deuh bawk.
Thil pawimawh tak ni reng chu - heng thil, kan tawn fo loh, mahse englai pawha lo thleng thei site hi vanduaithlak takin lo thleng ta se, engtia tih chiah tur nge, tih hi a ni a, khawvel thiamna sang ber pawhin a hrilh lâwk theih loh, lirnghingte pawh hetiang hi a ni. Chuvangin, Japan ram, lir nghin fona ramah chuan in sak nan thil khauh, zangkhai si, a chim palh pawha tuarna tinêp thei tur an hmang nasa tawh a, a ruhrel an din dan hrim hrimah pawh an ngaihtuah tel reng an ti. Keini hi fimkhur thiam lo tak, phili viau zel si kan ni a, Structural Engineer aia vai mitiri emaw, mahni emaw inring zawk tlat mai kan ni fo.
RCC in kan sakna hmun, ban khur, a ban leh a beam vela thir tlawn elh dan leh a phuar dan thleng hian a lo ni vek mai. Sak laia tui pêk mumal mang loh, cement in khir uaih ve si-a chengte hi kan tam si a, hriat chian phei chuan mangkháwng hnuaiah kan riak zan tin a, kan nui ve vak vak reng tho a nih ber hlawm hi. Keimahni tan chauh a ni lo, kan kawmthlanga chengte tana kan mangkháwng lenzia hi rapthlak tak a ni!
In tam tak chu him ringawt mah se, kawmchhak lamin a delh pherh nasa thei dawn tih a chiang a, kawng kan hnaih hlawm lutuk avangin in chim sawpin chhanchhuaktute kawng a dang ping bawk ang a, chhanchhuah theih turte pawh chhan hman loh kan tam duh hle ang.
Ngaihtuah tur hi a va tam em! Pathian zahngaihna beisei tur kan nih rualin, tih tur kan nei ṭheuh hlawm si a.
- RK Lianzuala