Replacement theih loh chhan kha...
City Bus leh Taxi Replacement theih loh chhan Transport Minister-in Assembly House a zawhna a chhanah chuan khawpui a tawt tawh vang a nih thu kan hmu a ni.
A dik khawp mai. City Bus te phei chu sorkar tih vang pawh ni loin an in din chhawk hial tawh a ni. Sorkarah Bus Permit pek belh tawh loh nise tih an thlen fo laiin khawpui tawt tawh titu ngei chuan bus permit thar 15 lai mai an pek belh lawi a. Tute emaw duhsak nan chuan khawpui hi tawt vak mahse pawi an ti lo a ni ang e.
A thuhrimah Minister hian motor replacement ni loin Permit thar pek avanga motor lei belh hian khawpui a titawt zawk a ni tih hi a hrethiam phak lo em ni aw? Vawiina harsatna lo thleng ta te hi mamawh aia tam Taxi leh Bus permit pek vak vak vang leh Politician hmakhaw thlir nei lo ho vang vek a ni. A hunlaia Transport Minister Pu Zoramsangliana kha a fakawmna a awm - Party Workers dem hial pawh hlawh mahse khawpui tawt belh tir zeltu nih aia permit a pe lo ngam kha a entawn tlak takzet a ni.
Tunah lah khaw-pui tih tawt belh zel nan two wheeler taxi tlan tir tura ruahmanna siam a la ni ta deuh deuh.
Tin, bus replace-ment tih dawn chuan a hlui kha thirchhia-a tihral emaw phai lamah man tlawm zawka hralh a ni ṭhin. Chumi hnuah chauh bus replacement phalna pek a ni ṭhin a nih kha. Hei hian bus a tih tam phah lo a, khawpui a tih tawt phah hek lo.
India Motor Vehicle Rules-ah Commercial Vehicle motor a lo upat a, a lo hlui chhiat tawh chuan replacement ngei turin a ti zawk a ni. Tun hma chuan Mizoramah pawh kalpui ṭhin a ni. Tunah erawh Mizoram hi India rama mi a ni ta lo nge, State danga replacement phalsak si chu keini ramah chuan phal a ni ta lo. Khawpui tawt lutuk tawh vang ti dawn ila a titu ber lahin permit thar a pek belh tho si a.
Tichuan, Bus emaw motor dang meikhu nasa hnunga i tlan palh a nih chuan hreawm tiin dem mai lo la. Motor thara replacement tih duh ngawih ngawih pawha phalsak an nih miau si loh avangin an eizawnna a tawp ai chuan tiin an tlan hram hram a ni tih i hriatpui dawn nia.
- Lalduhawma