Tlawng Lei chim chhan thu dik awm sa!

Vanglaini ni 7&8 February chhuak, phek hma thupui "Tlawng lei chim chhan Inquiry report” kha ka lo chhiar ve a. Thu dik awm sa, mitinin kan hriat tlanglawn, 'Zawh tawk aia ritin a zawh vanga chim’ tia keuh thluk a ni ta mai kha, Tuikuk Thufing naupan deuh laia kan fiamthuna ṭhin “Kawng chho kal chu kawng chhuk kal aiin a hahthlak zawk” tih ang fang lek a ni lo maw le? A dik lutuk a, hnialna tur awm lo mah se han pawm em em tur pawh a awm chuang bawk awm love.

Chanchinbua he lei chim chhan chhuina tur an ziah zingah khan - 'Dawngdah vang a nih leh nih loh leh mawhphurtu an awm leh awm loh’ tih te kha a ni a. A chhuitu chhui dan kha chuan Department lam kha chu an fihlim hmel hle mai a, an dawngdah lohzia lantir nan a lei tawpna ve veah truck rit phur zawh phal chin, 15.5tons an tarte kha an thiamchanna ni awm taka ngaih theihin an ziak a. Hetih laiin a mawhphurtuah chuan truck lei zawh chimtu, 37.398tons vela rit, chu pawh department engineer-te rin sawi, thu belhchian dawla ngaih tak mai kha a nih leh hmel awm e.

A enga pawh chu ni se hetiang National Highway ve riang ruang, motor lun em em lehnghal a 15.5tons chauh a ritin a zawh theih leihlawn heti chen chena rei a awm reng le? National Highway ve lemahte chuan bungraw tumtlang tak tak phurh luh tur a tam awm si a, chuti chunga hetiang lek zawh theih leilawn hetia a awm tlat rengte chuan ram development-in a va tuar nasa dawn em ve le!

Ram hmasawn leh sawn lo tehna lian ber chu inkalpawhna kawng ṭhat leh ṭhat loh hi a ni tih kha zirlaibuahte kan lo zir tawh
ṭhin a, hetiang a nih chuan kan ram chu ram hmasawna chhiar a va har dawn ve le! National highway a nih mai bakah kan airport neih chhun pannna kawngpui a ni leh nghal si a, kan ram development ava ti sukuk nasa dawn em! Heti kawngte hian kan ram hruaitute hian suangtuahna an seng ve ang em le, nge kan NLUP ṭha mi, ruling party-te thlitfim sa sem hi development chu a ni e tiin kan ngai thu tak zawk le?

Tin, a leilawn hi a derthawng a, 15.5tons chauh zawh theih tih pawh tar nareng si a, duty pakhat te pawh dah lova heti chen chen kan department pawh hi a awm reng reng le? NH 54, Chhingchhip khaw chhunga bailey bridge dawhte khi chu darkar 24 chhung duty an dah a, khi vang khian a la chim lo niin a lang; duty awm lo chu ni ve ngat se chu hmana hmanah a chim daih tawh ang le! Kan driver-te chuan rit tak tak, an motor-in a zawh tawk ang ang an phur mai a, leilawn derthawn dan leh a chim mai theih lam an ngaihtuah lo. A dawhtu department, a leilawn derthawn dan leh engkim hre chiangtu khan a chim loh nan hma a la tur a ni zawk dawn lawm ni?

Tunah pawh Vanglaini ni 7-4-2016 chhuaka lei dawhna tur chak Kolkata aṭanga phurh mek a nih thu ziak han hmuh khan, hun engemaw chen atan chuan bailey bridge bawk dawh a ni leh rih dawn tih a lang. Hetiang a nih pawhin awm khauh deuh zawkin, bungraw tumtlang deuh zawk pawh phurh theihna turin dawh ni thei tawh se a ṭha hle awm e.Tih rualin duty pawh fel taka dah ni tawh se.

A leh lamah a lei zawhtu mipui lam pawhin thuawihna nun nei ila, zawh tawk aia rit zawh chu tum enah en lo ngam ila a ṭha hle awm e. Kan kawngpui lun lai bera leilawn hi a chhe rei ta em a, dawh zawh ni vat vat thei se, dawh zawh hnuah pawh mitinin dim tlang ila a ṭha awm e.

- Patrick Z, Chhingchhip